17 സപ്തദശദശകഃ - സുദർശനകോസലപ്രാപ്തിഃ

DASAKAM 17MALAYALAM STORY@5G  SUDARSANA KATHA 4 SUDARSANA KOSALA PRAPTHI
https://youtu.be/s6IFoUoKxss
17 സപ്തദശദശകഃ  -    സുദർശനകോസലപ്രാപ്തിഃ


യുധാജിതം ശത്രുജിതം ച ഹത്വാ രണാംഗണസ്ഥാ നുതിഭിഃ പ്രസന്നാ .
സുബാഹുമുഖ്യാനനുഗൃഹ്യ ഭക്താൻ സർവേഷു പശ്യത്സു തിരോദധാഥ .. 17-1..

പൃഷ്ടോ നൃപാൻ പ്രാഹ സുദർശനസ്താൻ ദൃഷ്ടാ ഭവദ്ഭിഃ ഖലു സർവശക്താ .
യാ നിർഗുണാ യോഗിഭിരപ്യദൃശ്യാ ദൃശ്യാ ച ഭക്തൈഃ സഗുണാ വിനീതൈഃ .. 17-2..

യാ രാജസീദം സൃജതീവ ശക്തിര്യാ സാത്വികീ പാലയതീവ വിശ്വം .
യാ താമസീ സംഹരതീവ സർവം സദ്വസ്തു സൈവാന്യദസത്സമസ്തം .. 17-3..

ഭക്താർതിഹന്ത്രീ കരുണാമയീ സാ ഭക്തദ്രുഹാം ഭീതികരീ പ്രകാമം .
വസൻ ഭരദ്വാജതപോവനാന്തേ ചിരായ മാത്രാ സഹ താം ഭജേഽഹം .. 17-4..

താമേവ ഭക്ത്യാ ഭജതേഹ ഭുക്തിമുക്തിപ്രദാമസ്തു ശുഭം സദാ വഃ .
ശ്രുത്വേദമാനമ്രമുഖാസ്തഥേതി സമ്മന്ത്ര്യ ഭൂപാശ്ച തതോ നിവൃത്താഃ .. 17-5..

സുദർശനോ മാതൃവധൂസമേതഃ സുബാഹുമാപൃഛ്യ രഥാധിരൂഢഃ .
പുരീമയോധ്യാം പ്രവിശൻ പുരേവ സീതാപതിസ്തോഷയതി സ്മ സർവാൻ .. 17-6..

ലീലാവതീം പ്രാപ്യ വിമാതരം ച നത്വാ വിഷണ്ണാം ഹതപുത്രതാതാം .
സദുക്തിഭിഃ കർമഗതീഃ പ്രബോധ്യ സ സാന്ത്വയാമാസ മഹേശി ഭക്തഃ .. 17-7..

ജനേഷു പശ്യത്സു സുദർശനോഽത്ര ത്വാം പൂജയിത്വാ ഗുരുണാഽഭിഷിക്തഃ .
രാജ്യേ ത്വദീയം ഗൃഹമാശു കൃത്വാ പൂജാവിധാനാദി ച സംവൃധത്ത .. 17-8..

തസ്മിൻ നൃപേ ത്വത്സദനാനി കൃത്വാ ജനാഃ പ്രതിഗ്രാമമപൂജയംസ്ത്വാം .
കാശ്യാം സുബാഹുശ്ച തഥാഽകരോത്തേ സർവത്ര പേതുഃ കരുണാകടാക്ഷാഃ .. 17-9..

ന കർമണാ ന പ്രജയാ ധനേന ന യോഗസാംഖ്യാദിവിചിന്തയാ ച .
ന ച വ്രതേനാപി സുഖാനുഭൂതിർഭക്ത്യൈവ മർത്യഃ സുഖമേതി മാതഃ .. 17-10..

നാഹം സുബാഹുശ്ച സുദർശനശ്ച ന മേ ഭരദ്വാജമുനിഃ ശരണ്യഃ .
ഗുരുഃ സുഹൃദ്ബന്ധുരപി ത്വമേവ മഹേശ്വരി ത്വാം സതതം നമാമി .. 17-11..

15 പഞ്ചദശദശകഃ - സുദർശനകഥാ - ദേവീദർശനം

DASAKAM 15 MALAYALAM STORY GR DEVIDARSANAM
https://youtu.be/L9eraSDMdfM
15 പഞ്ചദശദശകഃ  -    സുദർശനകഥാ - ദേവീദർശനം
ഏവം തവൈവ കൃപയാ മുനിവര്യശീതച്ഛായാശ്രിതോ ഹതഭയഃ സ സുദർശനോഽയം .
വേദധ്വനിശ്രവണപൂതഹൃദാശ്രമാന്തേ സമ്മോദയൻ മുനിജനാൻ വവൃധേ കുമാരഃ .. 15-1..

ആബാല്യമേഷ മുനിബാലകസംഗമേന ക്ലീം ക്ലീമിതീശ്വരി സദാ തവ ബീജമന്ത്രം .
തത്രോച്ചചാര കൃപയാഽസ്യ പുരഃ കദാചിദാവിർബഭൂവിഥ നതം തമഭാഷഥാശ്ച .. 15-2..

പ്രീതാഽസ്മി തേ സുത ജഗജ്ജനനീമവേഹി മാം സർവകാമവരദാം തവ ഭദ്രമസ്തു .
ചന്ദ്രാനനാം ശശികലാം വിമലാം സുബാഹോഃ കാശീശ്വരസ്യ തനയാം വിധിനോദ്വഹ ത്വം .. 15-3..

നഷ്ടാ ഭവേയുരചിരേണ തവാരിവർഗാ രാജ്യം ച യൈരപഹൃതം പുനരേഷ്യസി ത്വം .
മാതൃദ്വയേന സചിവൈശ്ച സമം സ്വധർമാൻ കുര്യാഃ സദേതി സമുദീര്യ തിരോദധാഥ .. 15-4..

സ്വപ്നേ ത്വയാ ശശികലാ കഥിതാഽസ്തി ഭാരദ്വാജാശ്രമേ പ്രഥിതകോസലവംശജാതഃ .
ധീമാൻ സുദർശന ഇതി ധ്രുവസന്ധിപുത്ര ഏനം പതിം വൃണു തവാസ്തു ശുഭം സദേതി .. 15-5..

സ്വപ്നാനുഭൂതമനൃതം കിമൃതം ന വേതി സുപ്തോത്ഥിതാ തു മതിമത്യപി ന വ്യജാനാത് .
പൃഷ്ടാത്സുദർശനകഥാം സുമുഖീ ദ്വിജാത്സാ ശ്രുത്വാഽനുരക്തഹൃദയൈവ ബഭൂവ ദേവി .. 15-6..

ജ്ഞാത്വാ സുബാഹുരിദമാകുലമാനസസ്താമസ്മാന്നിവർത്തയിതുമാശു സഹേഷ്ടപത്ന്യാ .
കൃത്വാ പ്രയത്നമഖിലം വിഫലം ച പശ്യന്നിച്ഛാസ്വയംവരവിധിം ഹിതമേവ മേനേ .. 15-7..

കശ്ചിത്കദാചന സുദർശനമേത്യ വിപ്രഃ പ്രാഹാഗതഃ ശശികലാവചസാഽഹമത്ര .
സാ ത്വാം ബ്രവീതി- നൃപപുത്ര ജഗജ്ജനന്യാ വാചാ വൃതോഽസി പതിരസ്മി തവൈവ ദാസീ .. 15-8..

അത്രാഗതാ നൃപതയോ ബഹവസ്ത്വമേത്യ തേഷാം സുധീര മിഷതാം നയ മാം പ്രിയാം തേ .
ഏവം വധൂവചനമാനയ താം സുശീലാം ഭദ്രം തവാസ്ത്വിദമുദീര്യ ജഗാമ വിപ്രഃ .. 15-9..

സ്വപ്നേ ച ജാഗ്രതി ച പശ്യതി ഭക്തവര്യസ്ത്വാം സന്തതം തവ വചോ മധുരം ശൃണോതി .
ഐശ്വര്യമാശു ലഭതേഽപി ച മുക്തിമേതി ത്വദ്ഭക്തിമേവ മമ ദേഹി നമോ ജനന്യൈ .. 15-10..

14 ചതുർദശദശകഃ - സുദർശനകഥാ - ഭരദ്വാജാശ്രമപ്രവേശം

Daskam14 malayalam story@5G sudarsanakatha1 bharadwajaashramapravesa Read By Dr Ganga Raamachandranhttps://youtu.be/1tATaKx4ea0 

14 ചതുർദശദശകഃ -    സുദർശനകഥാ - ഭരദ്വാജാശ്രമപ്രവേശം
രാജാ പുരാഽഽസീത്കില കോസലേഷു ധർമൈകനിഷ്ഠോ ധ്രുവസന്ധിനാമാ .
ആസ്താം പ്രിയേ അസ്യ മനോരമാ ച ലീലാവതീ ചേതി ദൃഢാനുരക്തേ .. 14-1..

മനോരമാഽസൂത സുദർശനാഖ്യം കുമാരകം ശത്രുജിതം ച സാഽന്യാ .
സംവർധയംസ്തൗ മൃഗയാവിഹാരീ വനേ നൃപോ ഹാ ഹരിണാ ഹതോഽഭൂത് .. 14-2..

വിചിന്തയൻ രാജകുലസ്യ വൃത്തം തജ്ജ്യേഷ്ഠപുത്രസ്യ സുദർശനസ്യ .
രാജ്യാഭിഷേകായ ഗുരുർവസിഷ്ഠശ്ചകാര മന്ത്രം സചിവൈഃ സമേതഃ .. 14-3..

മാതാമഹഃ ശത്രുജിതോ യുധാജിദഭ്യേത്യ സദ്യോഽമിതവീര്യശാലീ .
രാജ്യേ സ്വദൗഹിത്രമിഹാഭിഷിക്തം കർതും കുബുദ്ധിഃ കുരുതേ സ്മ യത്നം .. 14-4..

മനോരമായാ അപി വീരസേനഃ പിതാഽഭ്യുപേത്യാശു രുരോധ തസ്യ .
യത്നം ബലീ സ്വസ്വസുതാസുതാഭിഷേകൈകബുദ്ധീ ഖലു താവഭൂതാം .. 14-5..

കൃത്വാ വിവാദം ച തതോ നൃപൗ ദ്വൗ ഘോരം രണം ചക്രതുരിദ്ധരോഷൗ .
യുധാജിതാ തത്ര തു വീരസേനോ ദൈവാദ്ധതോഽഭൂദ്ധരിണാ കരീവ .. 14-6..

രാജ്യേഽഭിഷിക്തഃ ഖലു ശത്രുജിത്സ ബാലസ്തതോഽയം രിപുഭിദ്യുധാജിത് .
ദൗഹിത്രരാജ്യം സുഖമേകനാഥഃ ശശാസ വജ്രീവ ദിവം മഹേശി .. 14-7..

പത്യുഃ പിതുശ്ചാപി മൃതേരനാഥാ ഭീതാ വിദല്ലാഭിധമന്ത്രിയുക്താ .
മനോരമാ ബാലസുതാ ത്വരണ്യേ യയൗ ഭരദ്വാജമുനിം ശരണ്യം .. 14-8..

തപോനിധിർദീനജനാനുകമ്പീ ജ്ഞാത്വാ മുനിസ്താം ധ്രുവസന്ധിപത്നീം .
ഉവാച- വത്സേ വസ നിർഭയൈവ തപോവനേഽത്രാസ്തു ശുഭം തവേതി .. 14-9..

അല്പോഽപ്യുപേക്ഷ്യോ ന രിപുർന രോഗോഽപ്യേവം സ്മരന്നാശു നൃപോ യുധാജിത് .
താം ഹർതുകാമഃ സസുതാം മഹർഷേഃ പ്രാപാശ്രമം മന്ത്രിവരേണ സാകം .. 14-10..

ന മാനിതസ്തേന തപസ്വിനാ സ മനോരമാം നൈവ സുതം ച ലേഭേ .
പ്രഹർതുകാമോഽപി മുനിം സ മന്ത്രിവാചാ നിവൃത്തഃ ശ്രുതകൗശികോഽഭൂത് .. 14-11..

ഏവം മുനിസ്താം സസുതാം രരക്ഷ ഭീതോഽസ്മി സംസാരയുധാജിതോഽഹം .
ന മേ സഹായോഽസ്തി വിനാ ത്വയൈഷ സനൂപുരം തേ ചരണം നമാമി .. 14-12..