1 prathamadaSakaH - dEvImahimA ೧ ಪ್ರಥಮದಶಕಃ - ದೇವೀಮಹಿಮಾ DEVI NARAYANEEYAM meaning kannada

https://youtu.be/16sRtwXzyjQ

೧ ಪ್ರಥಮದಶಕಃ  -    ದೇವೀಮಹಿಮಾ
ಯಸ್ಮಿನ್ನಿದಂ ಯತ ಇದಂ ಯದಿದಂ ಯದಸ್ಮಾತ್
     ಉತ್ತೀರ್ಣರೂಪಮಭಿಪಶ್ಯತಿ ಯತ್ಸಮಸ್ತಂ .
ನೋ ದೃಶ್ಯತೇ ಚ ವಚಸಾಂ ಮನಸಶ್ಚ ದೂರೇ
     ಯದ್ಭಾತಿ ಚಾದಿಮಹಸೇ ಪ್ರಣಮಾಮಿ ತಸ್ಮೈ .. ೧-೧..

ನ ಸ್ತ್ರೀ ಪುಮಾನ್ ನ ಸುರದೈತ್ಯನರಾದಯೋ ನ
     ಕ್ಲೀಬಂ ನ ಭೂತಮಪಿ ಕರ್ಮಗುಣಾದಯಶ್ಚ .
ಭೂಮಂಸ್ತ್ವಮೇವ ಸದನಾದ್ಯವಿಕಾರ್ಯನಂತಂ
     ಸರ್ವಂ ತ್ವಯಾ ಜಗದಿದಂ ವಿತತಂ ವಿಭಾತಿ .. ೧-೨..

ರೂಪಂ ನ ತೇಽಪಿ ಬಹುರೂಪಭೃದಾತ್ತಶಕ್ತಿ-
     ರ್ನಾಟ್ಯಂ ತನೋಷಿ ನಟವತ್ಖಲು ವಿಶ್ವರಂಗೇ .
ವರ್ಷಾಣಿ ತೇ ಸರಸನಾಟ್ಯಕಲಾವಿಲೀನಾ
     ಭಕ್ತಾ ಅಹೋ ಸಹೃದಯಾ ಕ್ಷಣವನ್ನಯಂತಿ .. ೧-೩..

ರೂಪಾನುಸಾರಿ ಖಲು ನಾಮ ತತೋ ಬುಧೈಸ್ತ್ವಂ
     ದೇವೀತಿ ದೇವ ಇತಿ ಚಾಸಿ ನಿಗದ್ಯಮಾನಾ .
ದೇವ್ಯಾಂ ತ್ವಯೀರ್ಯಸ ಉಮಾ ಕಮಲಾಽಥ ವಾಗ್ ವಾ
     ದೇವೇ ತು ಷಣ್ಮುಖ ಉಮಾಪತಿರಚ್ಯುತೋ ವಾ .. ೧-೪..

ತ್ವಂ ಬ್ರಹ್ಮ ಶಕ್ತಿರಪಿ ಧಾತೃರಮೇಶರುದ್ರೈಃ
     ಬ್ರಹ್ಮಾಂಡಸರ್ಗಪರಿಪಾಲನಸಂಹೃತೀಶ್ಚ .
ರಾಜ್ಞೀವ ಕಾರಯಸಿ ಸುಭ್ರು ನಿಜಾಜ್ಞಯೈವ
     ಭಕ್ತೇಷ್ವನನ್ಯಶರಣೇಷು ಕೃಪಾವತೀ ಚ .. ೧-೫..

ಮಾತಾ ಕರೋತಿ ತನಯಸ್ಯ ಕೃತೇ ಶುಭಾನಿ
     ಕರ್ಮಾಣಿ ತಸ್ಯ ಪತನೇ ಭೃಶಮೇತಿ ದುಃಖಂ .
ವೃದ್ಧೌ ಸುಖಂ ಚ ತವ ಕರ್ಮ ನ ನಾಪಿ ದುಃಖಂ
     ತ್ವಂ ಹ್ಯೇವ ಕರ್ಮಫಲದಾ ಜಗತಾಂ ವಿಧಾತ್ರೀ .. ೧-೬..

ಸರ್ವತ್ರ ವರ್ಷಸಿ ದಯಾಮತ ಏವ ವೃಷ್ಟ್ಯಾ
     ಸಿಕ್ತಃ ಸುಬೀಜ ಇವ ವೃದ್ಧಿಮುಪೈತಿ ಭಕ್ತಃ .
ದುರ್ಬೀಜವದ್ವ್ರಜತಿ ನಾಶಮಭಕ್ತ ಏವ
     ತ್ವಂ ನಿರ್ಘೃಣಾ ನ ವಿಷಮಾ ನ ಚ ಲೋಕಮಾತಃ .. ೧-೭..

ಸರ್ವೋಪರೀಶ್ವರಿ ವಿಭಾತಿ ಸುಧಾಸಮುದ್ರ-
     ಸ್ತನ್ಮಧ್ಯತಃ ಪರಿವೃತೇ ವಿವಿಧೈಃ ಸುದುರ್ಗೈಃ .
ಛತ್ರಾಯಿತೇ ತ್ರಿಜಗತಾಂ ಭವತೀ ಮಣಿದ್ವೀ-
     ಪಾಖ್ಯೇ ಶಿವೇ ನಿಜಪದೇ ಹಸಿತಾನನಾಽಽಸ್ತೇ .. ೧-೮..

ಯಸ್ತೇ ಪುಮಾನಭಿದಧಾತಿ ಮಹತ್ತ್ವಮುಚ್ಚೈ-
     ರ್ಯೋ ನಾಮ ಗಾಯತಿ ಶೃಣೋತಿ ಚ ತೇ ವಿಲಜ್ಜಃ .
ಯಶ್ಚಾತನೋತಿ ಭೃಶಮಾತ್ಮನಿವೇದನಂ ತೇ
     ಸ ಸ್ವಾನ್ಯಘಾನಿ ವಿಧುನೋತಿ ಯಥಾ ತಮೋಽರ್ಕಃ .. ೧-೯..

ತ್ವಾಂ ನಿರ್ಗುಣಾಂ ಚ ಸಗುಣಾಂ ಚ ಪುಮಾನ್ ವಿರಕ್ತೋ
     ಜಾನಾತಿ ಕಿಂಚಿದಪಿ ನೋ ವಿಷಯೇಷು ಸಕ್ತಃ .
ಜ್ಞೇಯಾ ಭವ ತ್ವಮಿಹ ಮೇ ಭವತಾಪಹಂತ್ರೀಂ
     ಭಕ್ತಿಂ ದದಸ್ವ ವರದೇ ಪರಿಪಾಹಿ ಮಾಂ ತ್ವಂ .. ೧-೧೦..

2 dvitIyadaSakaH - hayagrIvakathA ೨ ದ್ವಿತೀಯದಶಕಃ - ಹಯಗ್ರೀವಕಥಾ

 https://youtu.be/q0eeflzelIE

೨ ದ್ವಿತೀಯದಶಕಃ  -    ಹಯಗ್ರೀವಕಥಾ
ರಣೇಷು ದೈತ್ಯೇಷು ಹತೇಷು ದೇವಾಃ ಪುರಾ ಪ್ರಹೃಷ್ಟಾಃ ಸಹದಾತೃಶರ್ವಾಃ .
ಯಿಯಕ್ಷವೋ ಯಜ್ಞಪತಿಂ ವಿನೀತಾಃ ಪ್ರಪೇದಿರೇ ವಿಷ್ಣುಮನಂತವೀರ್ಯಂ .. ೨-೧..

ದೃಷ್ಟ್ವಾ ಚ ನಿದ್ರಾವಶಗಂ ಪ್ರಭುಂ ತಮಧಿಜ್ಯಚಾಪಾಗ್ರಸಮರ್ಪಿತಾಸ್ಯಂ .
ಆಶ್ಚರ್ಯಮಾಪುರ್ವಿಬುಧಾ ನ ಕೋಽಪಿ ಪ್ರಾಬೋಧಯತ್ತಂ ಖಲು ಪಾಪಭೀತ್ಯಾ .. ೨-೨..

ಹರೇಸ್ತದಾನೀಮಜಸೃಷ್ಟವಮ್ರ್ಯಾ ಮುಖಾರ್ಪಣಾಕುಂಚಿತಚಾಪಮೌರ್ವೀ .
ಭಗ್ನಾ ಧನುಶ್ಚಾರ್ಜವಮಾಪ ಸದ್ಯಸ್ತೇನಾಭವತ್ಸೋಽಪಿ ನಿಕೃತ್ತಕಂಠಃ .. ೨-೩..

ಕಾಯಾಚ್ಛಿರಸ್ತೂತ್ಪತಿತಂ ಮುರಾರೇಃ ಪಶ್ಯತ್ಸು ದೇವೇಷು ಪಪಾತ ಸಿಂಧೌ .
ಚೇತಃ ಸುರಾಣಾಂ ಕದನೇ ನಿಮಗ್ನಂ ಹಾಹೇತಿ ಶಬ್ದಃ ಸುಮಹಾನಭೂಚ್ಚ .. ೨-೪..

ಕಿಮತ್ರ ಕೃತ್ಯಂ ಪತಿತೇ ಹರೌ ನಃ ಕುರ್ಮಃ ಕಥಂ ವೇತಿ ಮಿಥೋ ಬ್ರುವಾಣಾನ್ .
ದೇವಾನ್ ವಿಧಾತಾಽಽಹ ಭವೇನ್ನ ಕಾರ್ಯಮಕಾರಣಂ ದೈವಮಹೋ ಬಲೀಯಃ .. ೨-೫..

ಧ್ಯಾಯೇತ ದೇವೀಂ ಕರುಣಾರ್ದ್ರಚಿತ್ತಾಂ ಬ್ರಹ್ಮಾಂಡಸೃಷ್ಟ್ಯಾದಿಕಹೇತುಭೂತಾಂ .
ಸರ್ವಾಣಿ ಕಾರ್ಯಾಣಿ ವಿಧಾಸ್ಯತೇ ನಃ ಸಾ ಸರ್ವಶಕ್ತಾ ಸಗುಣಾಽಗುಣಾ ಚ .. ೨-೬..

ಇತ್ಯೂಚುಷಃ ಪ್ರೇರಣಯಾ ವಿಧಾತುಸ್ತ್ವಾಮೇವ ವೇದಾ ನುನುವುಃ ಸುರಾಶ್ಚ .
ದಿವಿ ಸ್ಥಿತಾ ದೇವಗಣಾಂಸ್ತ್ವಮಾತ್ಥ ಭದ್ರಂ ಭವೇದ್ವೋ ಹರಿಣೇದೃಶೇನ .. ೨-೭..

ದೈತ್ಯೋ ಹಯಗ್ರೀವ ಇತಿ ಪ್ರಸಿದ್ಧೋ ಮಯೈವ ದತ್ತೇನ ವರೇಣ ವೀರಃ .
ವೇದಾನ್ ಮುನೀಂಶ್ಚಾಪಿ ಹಯಾಸ್ಯಮಾತ್ರವಧ್ಯೋ ಭೃಶಂ ಪೀಡಯತಿ ಪ್ರಭಾವಾತ್ .. ೨-೮..

ದೈವೇನ ಕೃತ್ತಂ ಹರಿಶೀರ್ಷಮದ್ಯ ಸಂಯೋಜ್ಯತಾಂ ವಾಜಿಶಿರೋಽಸ್ಯ ಕಾಯೇ .
ತತೋ ಹಯಗ್ರೀವತಯಾ ಮುರಾರಿರ್ದೈತ್ಯಂ ಹಯಗ್ರೀವಮರಂ ನಿಹಂತಾ .. ೨-೯..

ತ್ವಮೇವಮುಕ್ತ್ವಾ ಸದಯಂ ತಿರೋಧಾಸ್ತ್ವಷ್ಟ್ರಾ ಕಬಂಧೇಽಶ್ವಶಿರೋ ಮುರಾರೇಃ .
ಸಂಯೋಜಿತಂ ಪಶ್ಯತಿ ದೇವಸಂಘೇ ಹಯಾನನಃ ಶ್ರೀಹರಿರುತ್ಥಿತೋಽಭೂತ್ .. ೨-೧೦..

ದೈತ್ಯಂ ಹಯಗ್ರೀವಮಹನ್ ಹಯಾಸ್ಯೋ ರಣೇ ಮುರಾರಿಸ್ತ್ವದನುಗ್ರಹೇಣ .
ಸದಾ ಜಗನ್ಮಂಗಲದೇ ತ್ವದೀಯಾಃ ಪತಂತು ಮೇ ಮೂರ್ಧ್ನಿ ಕೃಪಾಕಟಾಕ್ಷಾಃ .. ೨-೧೧..

3 tRutIyadaSakaH - mahAkAlyavatAraH ೩ ತೃತೀಯದಶಕಃ - ಮಹಾಕಾಲ್ಯವತಾರಃ

 

https://youtu.be/LLOfUeZ19gI?si=0rOk6oP6hLnZS3B7

೩ ತೃತೀಯದಶಕಃ  -    ಮಹಾಕಾಲ್ಯವತಾರಃ
ಜಗತ್ಸು ಸರ್ವೇಷು ಪುರಾ ವಿಲೀನೇಷ್ವೇಕಾರ್ಣವೇ ಶೇಷತನೌ ಪ್ರಸುಪ್ತೇ .
ಹರೌ ಸುರಾರೀ ಮಧುಕೈಟಭಾಖ್ಯೌ ಮಹಾಬಲಾವಪ್ಸು ವಿಜಹ್ರತುರ್ದ್ವೌ .. ೩-೧..

ಸಮಾಃ ಸಹಸ್ರಂ ಯತಚಿತ್ತವೃತ್ತೀ ವಾಗ್ಬೀಜಮಂತ್ರಂ ವರದೇ ಜಪಂತೌ .
ಪ್ರಸಾದಿತಾಯಾ ಅಸುರೌ ಭವತ್ಯಾಃ ಸ್ವಚ್ಛಂದಮೃತ್ಯುತ್ವಮವಾಪತುಸ್ತೌ .. ೩-೨..

ಏಕಾಂಬುಧೌ ತೌ ತರಲೋರ್ಮಿಮಾಲೇ ನಿಮಜ್ಜನೋನ್ಮಜ್ಜನಕೇಲಿಲೋಲೌ .
ಯದೃಚ್ಛಯಾ ವೀಕ್ಷಿತಮಬ್ಜಯೋನಿಂ ರಣೋತ್ಸುಕಾವೂಚತುರಿದ್ಧಗರ್ವೌ .. ೩-೩..

ಪದ್ಮಾಸನಂ ವೀರವರೋಪಭೋಗ್ಯಂ ನ ಭೀರುಭೋಗ್ಯಂ ನ ವರಾಕಭೋಗ್ಯಂ .
ಮುಂಚೇದಮದ್ಯೈವ ನ ಯಾಸಿ ಚೇತ್ತ್ವಂ ಪ್ರದರ್ಶಯ ಸ್ವಂ ಯುಧಿ ಶೌರ್ಯವತ್ತ್ವಂ .. ೩-೪..

ಇದಂ ಸಮಾಕರ್ಣ್ಯ ಭಯಾದ್ವಿರಿಂಚಃ ಸುಷುಪ್ತಿನಿಷ್ಪಂದಮಮೋಘಶಕ್ತಿಂ .
ಪ್ರಬೋಧನಾರ್ಥಂ ಹರಿಮಿದ್ಧಭಕ್ತ್ಯಾ ತುಷ್ಟಾವ ನೈವಾಚಲದಂಬುಜಾಕ್ಷಃ .. ೩-೫..

ಅಸ್ಪಂದತಾ ತ್ವಸ್ಯ ಕಯಾಪಿ ಶಕ್ತ್ಯಾ ಕೃತೇತಿ ಮತ್ವಾ ಮತಿಮಾನ್ ವಿರಿಂಚಃ .
ಪ್ರಬೋಧಯೈನಂ ಹರಿಮೇವಮುಕ್ತ್ವಾ ಸ್ತೋತ್ರೈರ್ವಿಚಿತ್ರೈರ್ಭವತೀಮನೌಷೀತ್ .. ೩-೬..

ನುತಿಪ್ರಸನ್ನಾಽಬ್ಜಭವಸ್ಯ ತೂರ್ಣಂ ನಿಃಸೃತ್ಯ ವಿಷ್ಣೋಃ ಸಕಲಾಂಗತಸ್ತ್ವಂ .
ದಿವಿ ಸ್ಥಿತಾ ತತ್ಕ್ಷಣಮೇವ ದೇವೋ ನಿದ್ರಾವಿಮುಕ್ತೋ ಹರಿರುತ್ಥಿತೋಽಭೂತ್ .. ೩-೭..

ಅಥೈಷ ಭೀತಂ ಮಧುಕೈಟಭಾಭ್ಯಾಂ ವಿರಿಂಚಮಾಲೋಕ್ಯ ಹರಿರ್ಜಗಾದ .
ಅಲಂ ಭಯೇನಾಹಮಿಮೌ ಸುರಾರೀ ಹಂತಾಸ್ಮಿ ಶೀಘ್ರಂ ಸಮರೇಽತ್ರ ಪಶ್ಯ .. ೩-೮..

ಏವಂ ಹರೌ ವಕ್ತರಿ ತತ್ರ ದೈತ್ಯೌ ರಣೋತ್ಸುಕೌ ಪ್ರಾಪತುರಿದ್ಧಗರ್ವೌ .
ತಯೋರವಿಜ್ಞಾಯ ಬಲಂ ಮುರಾರಿರ್ಯುದ್ಧೋದ್ಯತೋಽಭೂದಜರಕ್ಷಣಾರ್ಥಂ .. ೩-೯..

ಬಿಭೇಮಿ ರಾಗಾದಿಮಹಾರಿಪುಭ್ಯೋ ಜೇತುಂ ಯತಿಷ್ಯೇಽಹಮಿಮಾನ್ ಸುಶಕ್ತಾನ್ .
ತದರ್ಥಶಕ್ತಿಂ ಮಮ ದೇಹಿ ನಿತ್ಯಂ ನಿದ್ರಾಲಸೋ ಮಾ ಚ ಭವಾನಿ ಮಾತಃ .. ೩-೧೦..

4 caturthadaSakaH - madhukaiTaBavadhaH ೪ ಚತುರ್ಥದಶಕಃ - ಮಧುಕೈಟಭವಧಃ

 https://youtu.be/QOXxl8K9_Zg

೪ ಚತುರ್ಥದಶಕಃ  -    ಮಧುಕೈಟಭವಧಃ
ತ್ವಂ ತಾಮಸೀ ಸುಪ್ತರಮಾಧವಾಂಗಜಾ ಶ್ಯಾಮಾ ರುಚಾ ಮೋಹನತಾಮ್ರಲೋಚನಾ .
ಏಕಾರ್ಣವೇ ಘೋರರಣೋತ್ಸುಕಾನ್ ಹರಿಂ ದೈತ್ಯೌ ಚ ತೌ ಸ್ಮೇರಮುಖೀ ಸಮೈಕ್ಷಥಾಃ .. ೪-೧..

ಪಶ್ಯತ್ಯಜೇ ಬಾಹುರಣಂ ಮುರಾರಿಣಾ ಕೃತ್ವಾ ಮಧುಃ ಶ್ರಾಂತಿಮವಾಪ ಸತ್ವರಂ .
ಅಭ್ಯೇತ್ಯ ಯುದ್ಧಂ ಕುರುತೇ ಸ್ಮ ಕೈಟಭಃ ಶ್ರಾಂತೇ ಚ ತಸ್ಮಿನ್ನಕೃತಾಹವಂ ಮಧುಃ .. ೪-೨..

ಏವಂ ಮುಹುಃ ಸಂಗರವಿಶ್ರಮಾವುಭೌ ಪರ್ಯಾಯತೋ ವರ್ಷಸಹಸ್ರಪಂಚಕಂ .
ಗ್ಲಾನಿಂ ವಿನಾ ಚಕ್ರತುರಚ್ಯುತಃ ಕ್ಲಮಾದ್ವಿಶ್ರಾಂತಿಮಿಚ್ಛನ್ನಸುರೌ ಜಗಾದ ತೌ .. ೪-೩..

ಶ್ರಾಂತೇನ ಭೀತೇನ ಚ ಬಾಲಕೇನ ಚ ಪ್ರಭುಃ ಪುಮಾನ್ನೈವ ಕರೋತಿ ಸಂಯುಗಂ .
ಮಧ್ಯೇರಣಂ ದ್ವೌ ಕೃತವಿಶ್ರಮೌ ಯುವಾಮೇಕಃ ಕರೋಮ್ಯೇವ ನಿರಂತರಾಹವಂ .. ೪-೪..

ಜ್ಞಾತ್ವಾ ಹರಿಂ ಶ್ರಾಂತಮುಭೌ ವಿದೂರತಃ ಸಂತಸ್ಥತುರ್ವಿಶ್ರಮಸೌಖ್ಯವಾಂಸ್ತತಃ .
ತ್ವಾಮೇವ ತುಷ್ಟಾವ ಕೃಪಾತರಂಗಿಣೀಂ ಸರ್ವೇಶ್ವರೀಂ ದೈತ್ಯಜಯಾಯ ಮಾಧವಃ .. ೪-೫..

ದೇವಿ ಪ್ರಸೀದೈಷ ರಣೇ ಜಿತೋಽಸ್ಮ್ಯಹಂ ದೈತ್ಯದ್ವಯೇನಾಬ್ಜಭವಂ ಜಿಘಾಂಸುನಾ .
ಸರ್ವಂ ಕಟಾಕ್ಷೈಸ್ತವ ಸಾಧ್ಯಮತ್ರ ಮಾಂ ರಕ್ಷೇತಿ ವಕ್ತಾರಮಭಾಷಥಾ ಹರಿಂ .. ೪-೬..

ಯುದ್ಧಂ ಕುರು ತ್ವಂ ಜಹಿ ತೌ ಮಯಾ ಭೃಶಂ ಸಮ್ಮೋಹಿತೌ ವಕ್ರದೃಶೇತ್ಯಯಂ ತ್ವಯಾ .
ಸಂಚೋದಿತೋ ಹೃಷ್ಟಮನಾ ಮಹಾರ್ಣವೇ ತಸ್ಥೌ ರಣಾಯಾಯಯತುಶ್ಚ ದಾನವೌ .. ೪-೭..

ಭೂಯೋಽಪಿ ಕುರ್ವನ್ ರಣಮಚ್ಯುತೋ ಹಸನ್ ಕಾಮಾತುರೌ ತೇ ಮುಖಪದ್ಮದರ್ಶನಾತ್ .
ತಾವಾಹ ತುಷ್ಟೋಽಸ್ಮ್ಯತುಲೌ ರಣೇ ಯುವಾಂ ದದಾಮ್ಯಹಂ ವಾಂ ವರಮೇಷ ವಾಂಛಿತಂ .. ೪-೮..

ತಾವೂಚತುರ್ವಿದ್ಧಿ ಹರೇ ನ ಯಾಚಕಾವಾವಾಂ ದದಾವಸ್ತವ ವಾಂಛಿತಂ ವರಂ .
ನಾಸತ್ಯವಾಚೌ ಸ್ವ ಇತೀರಿತೋ ಹರಿಸ್ತ್ವಾಂ ಸಂಸ್ಮರನ್ ಶತ್ರುಜಿಗೀಷಯಾಽಬ್ರವೀತ್ .. ೪-೯..

ಮಹ್ಯಂ ವರಂ ಯಚ್ಛತಮದ್ಯ ಮೇ ಯತೋ ವಧ್ಯೌ ಯುವಾಂ ಸ್ಯಾತಮಿತೀರಿತಾವುಭೌ .
ದೃಷ್ಟ್ವಾಽಪ್ಸು ಲೀನಂ ಸಕಲಂ ಸಮೂಚತುಸ್ತ್ವಂ ಸತ್ಯವಾಙ್ನೌ ಜಹಿ ನಿರ್ಜಲೇ ಸ್ಥಲೇ .. ೪-೧೦..

ಅಸ್ತ್ವೇವಮಿತ್ಯಾದೃತವಾಙ್ಮುದಾ ಹರಿಃ ಸ್ವೋರೌ ಪೃಥಾವುನ್ನಮಿತೇ ಜಲೋಪರಿ .
ಕೃತ್ವಾಽರಿಣಾ ತಚ್ಛಿರಸೀ ತದಾಽಚ್ಛಿನತ್ಸ್ವಚ್ಛಂದಮೃತ್ಯೂ ತವ ಮಾಯಯಾ ಹತೌ .. ೪-೧೧..

ದ್ವೇಷಶ್ಚ ರಾಗಶ್ಚ ಸದಾ ಮಮಾಂಬಿಕೇ ದೈತ್ಯೌ ಹೃದಿ ಸ್ತೋಽತ್ರ ವಿವೇಕಮಾಧವಃ .
ಆಭ್ಯಾಂ ಕರೋತ್ಯೇವ ರಣಂ ಜಯತ್ವಯಂ ತುಭ್ಯಂ ಮಹಾಕಾಲಿ ನಮಃ ಪ್ರಸೀದ ಮೇ .. ೪-೧೨..

5 paMcamadaSakaH - sudyumnakathA ೫ ಪಂಚಮದಶಕಃ - ಸುದ್ಯುಮ್ನಕಥಾ

  https://youtu.be/qQtfk7Ppvsk

೫ ಪಂಚಮದಶಕಃ  -     ಸುದ್ಯುಮ್ನಕಥಾ
ಜಾತಾ ಸುತೇಲಾ ಮನುಸಪ್ತಮಸ್ಯ ಸಂಪ್ರಾರ್ಥಿತೋಽನೇನ ಮುನಿರ್ವಸಿಷ್ಠಃ .
ಶಂಭೋಃ ಕಟಾಕ್ಷೇಣ ಸುತಾಂ ಕುಮಾರಂ ಚಕ್ರೇ ಸ ಕಾಲೇನ ಬಭೂವ ರಾಜಾ .. ೫-೧..

ಸುದ್ಯುಮ್ನನಾಮಾ ಮೃಗಯಾವಿಹಾರೀ ಗತೋ ಹಯಾರೂಢ ಇಲಾವೃತಂ ಸಃ .
ಸ್ತ್ರೀತ್ವಂ ಪುನಃ ಪ್ರಾಪ್ಯ ಸುತಂ ಹಿಮಾಂಶೋರ್ವವ್ರೇ ಪತಿಂ ಪುತ್ರಮಸೂತ ಚೈಷಾ .. ೫-೨..

ನ್ಯವೇದಯತ್ಸಾ ಗುರವೇ ವಸಿಷ್ಠಾಯೈಷಾ ಕದಾಚಿನ್ನಿಜಪುಂಸ್ತ್ವಕಾಮಂ .
ತತ್ಸಾಧನಾರ್ಥಂ ಹರಮೇವ ದಧ್ಯೌ ಮುನಿಃ ಪ್ರಸನ್ನಸ್ತಮುವಾಚ ಶಂಭುಃ .. ೫-೩..

ಇಲಾವೃತಂ ಮಾ ಪುರುಷಃ ಪ್ರಯಾತು ಪ್ರಯಾತಿ ಚೇತ್ಸೋಽಸ್ತ್ವಬಲಾ ತದೈವ .
ಏವಂ ಮಯಾ ನಿಶ್ಚಿತಮೇವ ಸೌಮ್ಯ ಗೌರ್ಯಾಃ ಪ್ರಸಾದಾಯ ಭವಾನ್ ಪ್ರಿಯೋ ಮೇ .. ೫-೪..

ನ ಪಕ್ಷಭೇದೋಽತ್ರ ಮಮಾಸ್ತಿ ಗೌರೀ ಭವಾಂಶ್ಚ ತೃಪ್ತೌ ಭವತಾಂ ಮದೀಯೌ .
ಇತಃ ಪರಂ ತಸ್ಯ ಮನೋರಪತ್ಯಂ ಮಾಸಂ ಪುಮಾನ್ ಸ್ಯಾದ್ವನಿತಾ ಚ ಮಾಸಂ .. ೫-೫..

ಏವಂ ಶಿವೋಕ್ತೇನ ಮನೋರಪತ್ಯಂ ಲಬ್ಧ್ವಾ ಚ ಪುಂಸ್ತ್ವಂ ಧರಣೀಂ ಶಶಾಸ .
ಸ್ತ್ರೀತ್ವೇ ಚ ಹರ್ಮ್ಯೇಷು ನಿನಾಯ ಕಾಲಂ ಜನೋ ನ ಚೈನಂ ನೃಪಮಭ್ಯನಂದತ್ .. ೫-೬..

ಪುರೂರವಸ್ಯಾತ್ಮಸುತೇಽರ್ಪಯಿತ್ವಾ ರಾಜ್ಯಂ ವಿರಕ್ತೋ ವನಮೇತ್ಯ ಭೂಪಃ .
ಶ್ರೀನಾರದಾಲ್ಲಬ್ಧನವಾರ್ಣಮಂತ್ರೋ ಭಕ್ತ್ಯಾ ಸ ದಧ್ಯೌ ಭವತಾರಿಣೀಂ ತ್ವಾಂ .. ೫-೭..

ಸಿಂಹಾಧಿರೂಢಾಮರುಣಾಬ್ಜನೇತ್ರಾಂ ತ್ವಾಂ ಸುಪ್ರಸನ್ನಾಮಭಿವೀಕ್ಷ್ಯ ನತ್ವಾ .
ಸ್ತುತ್ವಾ ಚ ಭಕ್ತ್ಯಾ ಸ್ಥಿರಪುಂಸ್ತ್ವಮೇಷ ಲೇಭೇಽಥ ಸಾಯುಜ್ಯಮವಾಪ ಚಾಂತೇ .. ೫-೮..

ಶೌರ್ಯಂ ನ ವೀರ್ಯಂ ನ ಚ ಪೌರುಷಂ ಮೇ ನೈವಾಸ್ತಿ ಚ ಸ್ತ್ರೀಸಹಜಾ ತಿತಿಕ್ಷಾ .
ಮೂಢೋ ನ ಜಾನಾಮ್ಯಶುಭಂ ಶುಭಂ ಚ ದೇಯಂ ತ್ವಯಾ ಮೇ ಶುಭಮೇವ ಮಾತಃ .. ೫-೯..

ಪಶ್ಯಾನಿ ಮಾತಃ ಪ್ರವರಾನ್ಗುರೂಂಸ್ತೇ ಕಾರುಣ್ಯತೋ ಮಾಂ ಸುಪಥಾ ನಯಂತು .
ಸತ್ಸಂಗಸಂಭಾವಿತಚಿತ್ತವೃತ್ತಿರ್ಭವಾನಿ ತೇ ದೇವಿ ನಮಃ ಪ್ರಸೀದ .. ೫-೧೦..

6 ShaShThadaSakaH - vyAsanAradasamAgamaH ೬ ಷಷ್ಠದಶಕಃ - ವ್ಯಾಸನಾರದಸಮಾಗಮಃ

 https://youtu.be/jvZLjiO_7MY

೬ ಷಷ್ಠದಶಕಃ  -    ವ್ಯಾಸನಾರದಸಮಾಗಮಃ
ತ್ವದಿಚ್ಛಯಾ ದೇವಿ ಪುಲಸ್ತ್ಯವಾಚಾ ಪರಾಶರಾದ್ವಿಷ್ಣುಪುರಾಣಕರ್ತುಃ .
ಮುನೇರ್ಹರಿರ್ಲೋಕಹಿತಾಯ ದೀಪಾದ್ಯಥಾ ಪ್ರದೀಪೋಽಜನಿ ಕೃಷ್ಣನಾಮಾ .. ೬-೧..

ವೇದಂ ಚತುರ್ಧಾ ವ್ಯದಧತ್ಸ ಕೃಷ್ಣದ್ವೈಪಾಯನೋ ವ್ಯಾಸ ಇತಿ ಪ್ರಸಿದ್ಧಃ .
ವೇದಾಂತಸೂತ್ರಾಣಿ ಪುರಾಣಜಾಲಂ ಮಹೇತಿಹಾಸಂ ಚ ಮಹಾಂಶ್ಚಕಾರ .. ೬-೨..

ತಪಃ ಪ್ರವೃತ್ತಃ ಕಲವಿಂಕಪೋತಂ ಮಾತ್ರಾ ಸ ಸಂಲಾಲಿತಮಾಶ್ರಮಾಂತೇ .
ಪಶ್ಯನ್ನಧನ್ಯಾಮನಪತ್ಯತಾಂ ಸ್ವಾಂ ಸಪುತ್ರಭಾಗ್ಯಾತಿಶಯಂ ಚ ದಧ್ಯೌ .. ೬-೩..

ಸತ್ಪುತ್ರಲಾಭಾಯ ತಪಶ್ಚಿಕೀರ್ಷುಸ್ತೀವ್ರಂ ಮಹಾಮೇರುಸಮೀಪಮೇತ್ಯ .
ಆರಾಧನೀಯಃ ಕ ಇತಿ ಕ್ಷಣಂ ಸ ಚಿಂತಾಽಽತುರೋ ಲೋಕಗುರುಃ ಸ್ಥಿತೋಽಭೂತ್ .. ೬-೪..

ಶ್ರೀನಾರದಸ್ತತ್ರ ಸಮಾಗತಸ್ತ್ವತ್ಕೃಪಾಕಟಾಕ್ಷಾಂಕುರವನ್ಮಹರ್ಷಿಃ .
ಅರ್ಘ್ಯಾದಿಸಂಪೂಜಿತ ಆಸನಸ್ಥೋ ವ್ಯಾಸೇನ ಪೃಷ್ಟಃ ಪ್ರಹಸನ್ನಿವಾಹ .. ೬-೫..

ಕಿಂ ಚಿಂತಯಾ ಕೃಷ್ಣ ಭಜಸ್ವ ದೇವೀಂ ಕೃಪಾವತೀ ವಾಂಛಿತದಾನದಕ್ಷಾ .
ಅಹೇತುರೇಷಾ ಖಲು ಸರ್ವಹೇತುರ್ನಿರಸ್ತಸಾಮ್ಯಾತಿಶಯಾ ನಿರೀಹಾ .. ೬-೬..

ಸೈಷಾ ಮಹಾಶಕ್ತಿರಿತಿ ಪ್ರಸಿದ್ಧಾ ಯದಾಜ್ಞಯಾ ಬ್ರಹ್ಮರಮೇಶರುದ್ರಾಃ .
ಬ್ರಹ್ಮಾಂಡಸರ್ಗಸ್ಥಿತಿಸಂಹೃತೀಶ್ಚ ಕುರ್ವಂತಿ ಕಾಲೇ ನ ಚ ತೇ ಸ್ವತಂತ್ರಾಃ .. ೬-೭..

ಯಸ್ಯಾಶ್ಚ ತೇ ಶಕ್ತಿಭಿರೇವ ಸರ್ವಕರ್ಮಾಣಿ ಕುರ್ವಂತಿ ಸುರಾಸುರಾದ್ಯಾಃ .
ಮರ್ತ್ಯಾ ಮೃಗಾಃ ಕೃಷ್ಣ ಪತತ್ರಿಣಶ್ಚ ಶಕ್ತೇರ್ವಿಧೇಯಾಃ ಕ ಇಹಾವಿಧೇಯಃ .. ೬-೮..

ಪ್ರತ್ಯಕ್ಷಮುಖ್ಯೈರ್ನ ಚ ಸಾ ಪ್ರಮಾಣೈರ್ಜ್ಞೇಯಾ ತಪೋಭಿಃ ಕಠಿನೈರ್ವ್ರತೈಶ್ಚ .
ನ ವೇದಶಾಸ್ತ್ರಾಧ್ಯಯನೇನ ಚಾಪಿ ಭಕ್ತ್ಯೈವ ಜಾನಾತಿ ಪುಮಾನ್ ಮಹೇಶೀಂ .. ೬-೯..

ತಾಮೇವ ಭಕ್ತ್ಯಾ ಸತತಂ ಭಜಸ್ವ ಸರ್ವಾರ್ಥದಾಂ ಕೃಷ್ಣ ತವಾಸ್ತು ಭದ್ರಂ .
ಇತ್ಯೂಚುಷಿ ಬ್ರಹ್ಮಸುತೇ ಗತೇ ಸ ವ್ಯಾಸಸ್ತಪೋಽರ್ಥಂ ಗಿರಿಮಾರುರೋಹ .. ೬-೧೦..

ಇಹಾಸ್ಮಿ ಪರ್ಯಾಕುಲಚಿತ್ತವೃತ್ತಿರ್ಗುರುಂ ನ ಪಶ್ಯಾಮಿ ಮಹತ್ತಮಂ ಚ .
ಸನ್ಮಾರ್ಗತೋ ಮಾಂ ನಯ ವಿಶ್ವಮಾತಃ ಪ್ರಸೀದ ಮೇ ತ್ವಾಂ ಶರಣಂ ವ್ರಜಾಮಿ .. ೬-೧೧..

7 saptamadaSakaH - SukOtpattiH ೭ ಸಪ್ತಮದಶಕಃ - ಶುಕೋತ್ಪತ್ತಿಃ

  

https://youtu.be/TeYW6n0WNNs

೭ ಸಪ್ತಮದಶಕಃ  -    ಶುಕೋತ್ಪತ್ತಿಃ
ಕೃಷ್ಣಸ್ಯ ತಸ್ಯಾರಣಿತಃ ಶುಕಾಖ್ಯಸ್ತವ ಪ್ರಸಾದಾದಜನಿಷ್ಟ ಪುತ್ರಃ .
ಹೃಷ್ಟೋ ಮುನಿರ್ಮಂಗಲಕರ್ಮ ಚಕ್ರೇ ತತ್ರಾದಿತೇಯಾ ವವೃಷುಃ ಸುಮಾನಿ .. ೭-೧..

ಕೇಚಿಜ್ಜಗುಃ ಕೇಚನ ವಾದ್ಯಘೋಷಂ ಚಕ್ರುಶ್ಚ ನಾಕೇ ನನೃತುಃ ಸ್ತ್ರಿಯಶ್ಚ .
ವಾಯುರ್ವವೌ ಸ್ಪರ್ಶಸುಖಃ ಸುಗಂಧಃ ಶುಕೋದ್ಭವೇ ಸರ್ವಜನಾಃ ಪ್ರಹೃಷ್ಟಾಃ .. ೭-೨..

ಬಾಲಃ ಸ ಸದ್ಯೋ ವವೃಧೇ ಸುಚೇತಾಃ ಬೃಹಸ್ಪತೇರಾತ್ತಸಮಸ್ತವಿದ್ಯಃ .
ದತ್ವಾ ವಿನೀತೋ ಗುರುದಕ್ಷಿಣಾಂ ಚ ಪ್ರತ್ಯಾಗತೋ ಹರ್ಷಯತಿ ಸ್ಮ ತಾತಂ .. ೭-೩..

ಯುವಾನಮೇಕಾಂತತಪಃಪ್ರವೃತ್ತಂ ವ್ಯಾಸಃ ಕದಾಚಿಚ್ಛುಕಮೇವಮೂಚೇ .
ವೇದಾಂಶ್ಚ ಶಾಸ್ತ್ರಾಣಿ ಚ ವೇತ್ಸಿ ಪುತ್ರ ಕೃತ್ವಾ ವಿವಾಹಂ ಭವ ಸದ್ಗೃಹಸ್ಥಃ .. ೭-೪..

ಸರ್ವಾಶ್ರಮಾಣಾಂ ಕವಯೋ ವಿಶಿಷ್ಟಾ ಗೃಹಾಶ್ರಮಂ ಶ್ರೇಷ್ಠತರಂ ವದಂತಿ .
ತಮಾಶ್ರಿತಸ್ತಿಷ್ಠತಿ ಲೋಕ ಏಷ ಯಜಸ್ವ ದೇವಾನ್ ವಿಧಿವತ್ಪಿತೄಂಶ್ಚ .. ೭-೫..

ತವಾಸ್ತು ಸತ್ಪುತ್ರ ಋಣಾದಹಂ ಚ ಮುಚ್ಯೇಯ ಮಾಂ ತ್ವಂ ಸುಖಿನಂ ಕುರುಷ್ವ .
ಪುತ್ರಃ ಸುಖಾಯಾತ್ರ ಪರತ್ರ ಚ ಸ್ಯಾತ್ತ್ವಾಂ ಪುತ್ರ ತೀವ್ರೈರಲಭೇ ತಪೋಭಿಃ .. ೭-೬..

ಕಿಂಚ ಪ್ರಮಾಥೀನಿ ಸದೇಂದ್ರಿಯಾಣಿ ಹರಂತಿ ಚಿತ್ತಂ ಪ್ರಸಭಂ ನರಸ್ಯ .
ಪಶ್ಯನ್ ಪಿತಾ ಮೇ ಜನನೀಂ ತಪಸ್ವೀ ಪರಾಶರೋಽಪಿ ಸ್ಮರಮೋಹಿತೋಽಭೂತ್ .. ೭-೭..

ಯ ಆಶ್ರಮಾದಾಶ್ರಮಮೇತಿ ತತ್ತತ್ಕರ್ಮಾಣಿ ಕುರ್ವನ್ ಸ ಸುಖೀ ಸದಾ ಸ್ಯಾತ್ .
ಗೃಹಾಶ್ರಮೋ ನೈವ ಚ ಬಂಧಹೇತುಸ್ತ್ವಯಾ ಚ ಧೀಮನ್ ಕ್ರಿಯತಾಂ ವಿವಾಹಃ .. ೭-೮..

ಏವಂ ಬ್ರುವಾಣೋಽಪಿ ಶುಕಂ ವಿವಾಹಾದ್ಯಸಕ್ತಮಾಜ್ಞಾಯ ಪಿತೇವ ರಾಗೀ .
ಪುರಾಣಕರ್ತ್ತಾ ಚ ಜಗದ್ಗುರುಃ ಸ ಮಾಯಾನಿಮಗ್ನೋಽಶ್ರುವಿಲೋಚನೋಽಭೂತ್ .. ೭-೯..

ಭೋಗೇಷು ಮೇ ನಿಸ್ಪೃಹತಾಽಸ್ತು ಮಾತಃ ಪ್ರಲೋಭಿತೋ ಮಾ ಕರವಾಣಿ ಪಾಪಂ .
ಮಾ ಬಾಧತಾಂ ಮಾಂ ತವ ದೇವಿ ಮಾಯಾ ಮಾಯಾಧಿನಾಥೇ ಸತತಂ ನಮಸ್ತೇ .. ೭-೧೦..

8 aShTamadaSakaH - paramaj~jAnOpadESaH ೮ ಅಷ್ಟಮದಶಕಃ - ಪರಮಜ್ಞಾನೋಪದೇಶಃ

 https://youtu.be/risIDGd_w0c?si=_4LeMhG51Xu9lzrI

೮ ಅಷ್ಟಮದಶಕಃ  -    ಪರಮಜ್ಞಾನೋಪದೇಶಃ 
ಅಥಾಹ ಕೃಷ್ಣಃ ಶೃಣು ಚಿಂತಯಾಽಲಂ ಗೃಹಾಶ್ರಮಸ್ತೇ ನ ಚ ಬಂಧಕೃತ್ಸ್ಯಾತ್ .
ಬಂಧಸ್ಯ ಮುಕ್ತೇಶ್ಚ ಮನೋ ಹಿ ಹೇತುರ್ಮನೋಜಯಾರ್ಥಂ ಭಜ ವಿಶ್ವಧಾತ್ರೀಂ .. ೮-೧..

ಯಸ್ಯಾಃ ಪ್ರಸಾದೇ ಸಫಲಂ ಸಮಸ್ತಂ ಯದಪ್ರಸಾದೇ ವಿಫಲಂ ಸಮಸ್ತಂ .
ಮಾಹಾತ್ಮ್ಯಮಸ್ಯಾ ವಿದಿತಂ ಜಗತ್ಸು ಮಯಾ ಕೃತಂ ಭಾಗವತಂ ಶೃಣು ತ್ವಂ .. ೮-೨..

ವಿಷ್ಣುರ್ಜಗತ್ಯೇಕಸಮುದ್ರಲೀನೇ ಬಾಲಃ ಶಯಾನೋ ವಟಪತ್ರ ಏಕಃ .
ಸ್ವಬಾಲತಾಹೇತುವಿಚಾರಮಗ್ನಃ ಶುಶ್ರಾವ ಕಾಮಪ್ಯಶರೀರಿವಾಚಂ .. ೮-೩..

ಸನಾತನಂ ಸತ್ಯಮಹಂ ಮದನ್ಯತ್ಸತ್ಯಂ ನ ಚ ಸ್ಯಾದಹಮೇವ ಸರ್ವಂ .
ಶ್ರುತ್ವೇದಮುನ್ಮೀಲಿತದೃಷ್ಟಿರೇಷ ಸ್ಮಿತಾನನಾಂ ತ್ವಾಂ ಜನನೀಂ ದದರ್ಶ .. ೮-೪..

ಚತುರ್ಭುಜಾ ಶಂಖಗದಾರಿಪದ್ಮಧರಾ ಕೃಪಾದ್ಯೈಃ ಸಹ ಶಕ್ತಿಜಾಲೈಃ .
ಸ್ಥಿತಾ ಜಲೋಪರ್ಯಮಲಾಂಬರಾ ತ್ವಂ ಪ್ರಹೃಷ್ಟಚಿತ್ತಂ ಹರಿಮೇವಮಾತ್ಥ .. ೮-೫..

ಕಿಂ ವಿಸ್ಮಯೇನಾಚ್ಯುತ ವಿಸ್ಮೃತಾಽಹಂ ತ್ವಯಾ ಪರಾಶಕ್ತಿಮಹಾಪ್ರಭಾವಾತ್ .
ಸಾ ನಿರ್ಗುಣಾ ವಾಙ್ಮನಸೋರಗಮ್ಯಾ ಮಾಂ ಸಾತ್ವಿಕೀಂ ಶಕ್ತಿಮವೇಹಿ ಲಕ್ಷ್ಮೀಂ .. ೮-೬..

ಶ್ರುತಸ್ತ್ವಯಾ ಯಸ್ತ್ವಶರೀರಿಶಬ್ದೋ ಹಿತಾಯ ತೇ ದೇವ ತಯಾ ಸ ಉಕ್ತಃ .
ಅಯಂ ಹಿ ಸರ್ವಶ್ರುತಿಶಾಸ್ತ್ರಸಾರೋ ಮಾ ವಿಸ್ಮರೇಮಂ ಹೃದಿ ರಕ್ಷಣೀಯಂ .. ೮-೭..

ನಾತಃ ಪರಂ ಜ್ಞೇಯಮವೇಹಿ ಕಿಂಚಿತ್ಪ್ರಿಯೋಽಸಿ ದೇವ್ಯಾಃ ಶೃಣು ಮೇ ವಚಸ್ತ್ವಂ .
ತ್ವನ್ನಾಭಿಪದ್ಮಾದ್ದ್ರುಹಿಣೋ ಭವೇತ್ಸ ಕರ್ತಾ ಜಗತ್ಪಾಲಯ ತತ್ಸಮಸ್ತಂ .. ೮-೮..

ಭ್ರೂಮಧ್ಯತಃ ಪದ್ಮಭವಸ್ಯ ಕೋಪಾದ್ರುದ್ರೋ ಭವಿಷ್ಯನ್ ಸಕಲಂ ಹರೇಚ್ಚ .
ದೇವೀಂ ಸದಾ ಸಂಸ್ಮರ ತೇಽಸ್ತು ಭದ್ರಮೇವಂ ನಿಗದ್ಯಾಶು ತಿರೋದಧಾಥ .. ೮-೯..

ಹರೇರಿದಂ ಜ್ಞಾನಮಜಸ್ಯ ಲಬ್ಧಮಜಾತ್ಸುರರ್ಷೇಶ್ಚ ತತೋ ಮಮಾಪಿ .
ಮಯಾ ತ್ವಿದಂ ವಿಸ್ತರತಃ ಸುತೋಕ್ತಂ ಯತ್ಸೂರಯೋ ಭಾಗವತಂ ವದಂತಿ .. ೮-೧೦..

ದೇವ್ಯಾ ಮಹತ್ತ್ವಂ ಖಲು ವರ್ಣ್ಯತೇಽತ್ರ ಯದ್ಭಕ್ತಿಮಾಪ್ತಸ್ಯ ಗೃಹೇ ನ ಬಂಧಃ .
ಯದ್ಭಕ್ತಿಹೀನಸ್ತ್ವಗೃಹೇಽಪಿ ಬದ್ಧೋ ರಾಜಾಽಪಿ ಮುಕ್ತೋ ಜನಕೋ ಗೃಹಸ್ಥಃ .. ೮-೧೧..

ವಿದೇಹರಾಜಂ ತಮವಾಪ್ಯ ಪೃಷ್ಟ್ವಾ ಸ್ವಧರ್ಮಶಂಕಾಃ ಪರಿಹೃತ್ಯ ಧೀರಃ .
ಫಲೇಷ್ವಸಕ್ತಃ ಕುರು ಕರ್ಮ ತೇನ ಕರ್ಮಕ್ಷಯಃ ಸ್ಯಾತ್ತವ ಭದ್ರಮಸ್ತು .. ೮-೧೨..

ಶ್ರುತ್ವೇತಿ ಸದ್ಯಃ ಶುಕ ಆಶ್ರಮಾತ್ಸ ಪ್ರಸ್ಥಾಯ ವೈದೇಹಪುರಂ ಸಮೇತ್ಯ .
ಪ್ರತ್ಯುದ್ಗತಃ ಸರ್ವಜನೈರ್ನೃಪಾಯ ನ್ಯವೇದಯತ್ಸ್ವಾಗಮನಸ್ಯ ಹೇತುಂ .. ೮-೧೩..

ಗೃಹಸ್ಥಧರ್ಮಸ್ಯ ಮಹತ್ತ್ವಮಸ್ಮಾದ್ವಿಜ್ಞಾಯ ಧೀಮಾನ್ ಸ ಶುಕೋ ನಿವೃತ್ತಃ .
ಪಿತ್ರಾಶ್ರಮಂ ಪ್ರಾಪ್ಯ ಸುತಾಂ ಪಿತೄಣಾಂ ವ್ಯಾಸೇಽತಿಹೃಷ್ಟೇ ಗೃಹಿಣೀಂ ಚಕಾರ .. ೮-೧೪..

ಉತ್ಪಾದ್ಯ ಪುತ್ರಾಂಶ್ಚತುರಃ ಸುತಾಂ ಚ ಗೃಹಸ್ಥಧರ್ಮಾನ್ ವಿಧಿನಾಽಽಚರನ್ ಸಃ .
ಪ್ರದಾಯ ಚೈನಾಂ ಮುನಯೇಽಣುಹಾಯ ಬಭೂವ ಕಾಲೇ ಕೃತಸರ್ವಕೃತ್ಯಃ .. ೮-೧೫..

ಹಿತ್ವಾಽಽಶ್ರಮಂ ತಾತಮಪೀಶಶೈಲಶೃಂಗೇ ತಪಸ್ವೀ ಸಹಸೋತ್ಪತನ್ ಖೇ .
ಬಭೌ ಸ ಭಾಸ್ವಾನಿವ ತದ್ವಿಯೋಗಖಿನ್ನಂ ಶಿವೋ ವ್ಯಾಸಮಸಾಂತ್ವಯಚ್ಚ .. ೮-೧೬..

ಸರ್ವತ್ರ ಶಂಕಾಕುಲಮೇವ ಚಿತ್ತಂ ಮಮೇಹ ವಿಕ್ಷಿಪ್ತಮಧೀರಮಾರ್ತಂ .
ಕರ್ತವ್ಯಮೂಢೋಽಸ್ಮಿ ಸದಾ ಶಿವೇ ಮಾಂ ಧೀರಂ ಕುರು ತ್ವಂ ವರದೇ ನಮಸ್ತೇ .. ೮-೧೭..

9 navamadaSakaH - BuvanESvarIdarSanaH ೯ ನವಮದಶಕಃ - ಭುವನೇಶ್ವರೀದರ್ಶನಃ

 

https://youtu.be/sHuX_qZYHSU

೯ ನವಮದಶಕಃ  -    ಭುವನೇಶ್ವರೀದರ್ಶನಃ
ಏಕಾರ್ಣವೇಽಸ್ಮಿನ್ ಜಗತಿ ಪ್ರಲೀನೇ ದೈತ್ಯೌ ಹರಿರ್ಬ್ರಹ್ಮವಧೋದ್ಯತೌ ತೌ .
ಜಘಾನ ದೇವಿ ತ್ವದನುಗ್ರಹೇಣ ತ್ವದಿಚ್ಛಯೈವಾಗಮದತ್ರ ರುದ್ರಃ .. ೯-೧..

ಏಕೋ ವಿಮಾನಸ್ತರಸಾಽಽಗತಃ ಖಾತ್ತ್ರಿಮೂರ್ತ್ಯವಿಜ್ಞಾತಗತಿಸ್ತ್ವದೀಯಃ .
ತ್ವತ್ಪ್ರೇರಿತಾ ಆರುರುಹುಸ್ತಮೇತೇ ಸ ಚೋತ್ಪತನ್ ವ್ಯೋಮ್ನಿ ಚಚಾರ ಶೀಘ್ರಂ .. ೯-೨..

ವೈಮಾನಿಕಾಶ್ಚೋದ್ಗತಯಃ ಸಶಕ್ರಂ ದಿವಂ ಸಪದ್ಮೋದ್ಭವಸತ್ಯಲೋಕಂ .
ಸರುದ್ರಕೈಲಾಸಮಮೀ ಸವಿಷ್ಣುವೈಕುಂಠಮಪ್ಯುತ್ಪುಲಕಾ ಅಪಶ್ಯನ್ .. ೯-೩..

ಅದೃಷ್ಟಪೂರ್ವಾನಿತರಾಂಸ್ತ್ರಿಮೂರ್ತೀನ್ ಸ್ಥಾನಾನಿ ತೇಷಾಮಪಿ ದೃಷ್ಟವಂತಃ .
ತ್ರಿಮೂರ್ತಯಸ್ತೇ ಚ ವಿಮೋಹಮಾಪುಃ ಪ್ರಾಪ್ತೋ ವಿಮಾನಶ್ಚ ಸುಧಾಸಮುದ್ರಂ .. ೯-೪..

ತ್ವದ್ಭ್ರೂಲತಾಲೋಲತರಂಗಮಾಲಂ ತ್ವದೀಯಮಂದಸ್ಮಿತಚಾರುಫೇನಂ .
ತ್ವನ್ಮಂಜುಮಂಜೀರಮೃದುಸ್ವನಾಢ್ಯಂ ತ್ವತ್ಪಾದಯುಗ್ಮೋಪಮಸೌಖ್ಯದಂ ಚ .. ೯-೫..

ತನ್ಮಧ್ಯತಸ್ತೇ ದದೃಶುರ್ವಿಚಿತ್ರಪ್ರಾಕಾರನಾನಾದ್ರುಲತಾಪರೀತಂ .
ಸ್ಥಾನಂ ಮಣಿದ್ವೀಪಮದೃಷ್ಟಪೂರ್ವಂ ಕ್ರಮಾಚ್ಛಿವೇ ತ್ವಾಂ ಚ ಸಖೀಸಮೇತಾಂ .. ೯-೬..

ಜ್ಞಾತ್ವಾ ದ್ರುತಂ ತ್ವಾಂ ಹರಿರಾಹ ದಾತಸ್ತ್ರಿನೇತ್ರ ಧನ್ಯಾ ವಯಮದ್ಯ ನೂನಂ .
ಸುಧಾಸಮುದ್ರೋಽಯಮನಲ್ಪಪುಣ್ಯೈಃ ಪ್ರಾಪ್ಯಾ ಜಗನ್ಮಾತೃನಿವಾಸಭೂಮಿಃ .. ೯-೭..

ಸಾ ದೃಶ್ಯತೇ ರಾಗಿಜನೈರದೃಶ್ಯಾ ಮಂಚೇ ನಿಷಣ್ಣಾ ಬಹುಶಕ್ತಿಯುಕ್ತಾ .
ಏಷೈವ ದೃಕ್ ಸರ್ವಮಿದಂ ಚ ದೃಶ್ಯಮಹೇತುರೇಷಾ ಖಲು ಸರ್ವಹೇತುಃ .. ೯-೮..

ಬಾಲಃ ಶಯಾನೋ ವಟಪತ್ರ ಏಕ ಏಕಾರ್ಣವೇಽಪಶ್ಯಮಿಮಾಂ ಸ್ಮಿತಾಸ್ಯಾಂ .
ಯಯೈವ ಮಾತ್ರಾ ಪರಿಲಾಲಿತೋಽಹಮೇನಾಂ ಸಮಸ್ತಾರ್ತಿಹರಾಂ ವ್ರಜೇಮ .. ೯-೯..

ರುಧ್ಯಾಮಹೇ ದ್ವಾರಿ ಯದಿ ಸ್ತುವಾಮಸ್ತತ್ರ ಸ್ಥಿತಾ ಏವ ವಯಂ ಮಹೇಶೀಂ .
ಇತ್ಯಚ್ಯುತೇನಾಭಿಹಿತೇ ವಿಮಾನಸ್ತ್ವದ್ಗೋಪುರದ್ವಾರಮವಾಪ ದೇವಿ .. ೯-೧೦..

ಆಯಾಮ್ಯಹಂ ಚಿತ್ತನಿರೋಧರೂಪವಿಮಾನತಸ್ತೇ ಪದಮದ್ವಿತೀಯಂ .
ನ ಕೇನಚಿದ್ರುದ್ಧಗತೋ ಭವಾನಿ ತ್ವಾಮೇವ ಮಾತಃ ಶರಣಂ ವ್ರಜಾಮಿ .. ೯-೧೧..

10 daSamadaSakaH - SaktipradAnaM ೧೦ ದಶಮದಶಕಃ - ಶಕ್ತಿಪ್ರದಾನಂ

https://youtu.be/vIjDJXfOq3s

೧೦ ದಶಮದಶಕಃ - ಶಕ್ತಿಪ್ರದಾನಂ

ತತೋ ವಿಮಾನಾದಜವಿಷ್ಣುರುದ್ರಾಸ್ತ್ವದ್ಗೋಪುರದ್ವಾರ್ಯವರುಹ್ಯ ಸದ್ಯಃ .
ಸ್ತ್ರಿಯಃ ಕೃತಾ ದೇವಿ ತವೇಚ್ಛಯೈವ ಸವಿಸ್ಮಯಾಸ್ತ್ವನ್ನಿಕಟಂ ಸಮೀಯುಃ .. ೧೦-೧..

ಕೃತಪ್ರಣಾಮಾಸ್ತವ ಪಾದಯುಗ್ಮನಖೇಷು ವಿಶ್ವಂ ಪ್ರತಿಬಿಂಬಿತಂ ತೇ .
ವಿಲೋಕ್ಯ ಸಾಶ್ಚರ್ಯಮಮೋಘವಾಗ್ಭಿಃ ಪೃಥಕ್ಪೃಥಕ್ ತುಷ್ಟುವುರಂಬಿಕೇ ತ್ವಾಂ .. ೧೦-೨..

ನುತಿಪ್ರಸನ್ನಾ ನಿಜಸರ್ಗಶಕ್ತಿಂ ಮಹಾಸರಸ್ವತ್ಯಭಿಧಾಮಜಾಯ .
ರಕ್ಷಾರ್ಥಶಕ್ತಿಂ ಹರಯೇ ಮಹಾಲಕ್ಷ್ಮ್ಯಾಖ್ಯಾಂ ಚ ಲೀಲಾನಿರತೇ ದದಾಥ .. ೧೦-೩..

ಗೌರೀಂ ಮಹಾಕಾಲ್ಯಭಿಧಾಂ ಚ ದತ್ವಾ ಸಂಹಾರಶಕ್ತಿಂ ಗಿರಿಶಾಯ ಮಾತಃ .
ನವಾಕ್ಷರಂ ಮಂತ್ರಮುದೀರಯಂತೀ ಬದ್ಧಾಂಜಲೀಂಸ್ತಾನ್ ಸ್ಮಿತಪೂರ್ವಮಾತ್ಥ .. ೧೦-೪..

ಬ್ರಹ್ಮನ್ ಹರೇ ರುದ್ರ ಮದೀಯಶಕ್ತಿತ್ರಯೇಣ ದತ್ತೇನ ಸುಖಂ ಭವಂತಃ .
ಬ್ರಹ್ಮಾಂಡಸರ್ಗಸ್ಥಿತಿಸಂಹೃತೀಶ್ಚ ಕುರ್ವಂತು ಮೇ ಶಾಸನಯಾ ವಿನೀತಾಃ .. ೧೦-೫..

ಮಾನ್ಯಾ ಭವದ್ಭಿಃ ಖಲು ಶಕ್ತಯೋ ಮೇ ಸ್ಯಾಚ್ಛಕ್ತಿಹೀನಂ ಸಕಲಂ ವಿನಿಂದ್ಯಂ .
ಸ್ಮರೇತ ಮಾಂ ಸಂತತಮೇವಮುಕ್ತ್ವಾ ಪ್ರಸ್ಥಾಪಯಾಮಾಸಿಥ ತಾಂಸ್ತ್ರಿಮೂರ್ತೀನ್ .. ೧೦-೬..

ನತ್ವಾ ತ್ರಯಸ್ತೇ ಭವತೀಂ ನಿವೃತ್ತಾಃ ಪುಂಸ್ತ್ವಂ ಗತಾ ಆರುರುಹುರ್ವಿಮಾನಂ .
ಸದ್ಯಸ್ತಿರೋಧಾಃ ಸ ಸುಧಾಸಮುದ್ರೋ ದ್ವೀಪೋ ವಿಮಾನಶ್ಚ ತಿರೋಬಭೂವುಃ .. ೧೦-೭..

ಏಕಾರ್ಣವೇ ಪಂಕಜಸನ್ನಿಧೌ ಚ ಹತಾಸುರೇ ತೇ ಖಲು ತಸ್ಥಿವಾಂಸಃ .
ದೃಷ್ಟಂ ನು ಸತ್ಯಂ ಕಿಮು ಬುದ್ಧಿಮೋಹಃ ಸ್ವಪ್ನೋ ನು ಕಿಂ ವೇತಿ ಚ ನ ವ್ಯಜಾನನ್ .. ೧೦-೮..

ತತಸ್ತ್ರಯಸ್ತೇ ಖಲು ಸತ್ಯಲೋಕವೈಕುಂಠಕೈಲಾಸಕೃತಾಧಿವಾಸಾಃ .
ಬ್ರಹ್ಮಾಂಡಸೃಷ್ಟ್ಯಾದಿಷು ದತ್ತಚಿತ್ತಾಸ್ತ್ವಾಂ ಸರ್ವಶಕ್ತಾಮಭಜಂತ ದೇವಿ .. ೧೦-೯..

ಸುಧಾಸಮುದ್ರಂ ತರಲೋರ್ಮಿಮಾಲಂ ಸ್ಥಾನಂ ಮಣಿದ್ವೀಪಮನೋಪಮಂ ತೇ .
ಮಂಚೇ ನಿಷಣ್ಣಾಂ ಭವತೀಂ ಚ ಚಿತ್ತೇ ಪಶ್ಯಾನಿ ತೇ ದೇವಿ ನಮಃ ಪ್ರಸೀದ .. ೧೦-೧೦..

11೧೧ ಏಕಾದಶದಶಕಃ - ಬ್ರಹ್ಮನಾರದಸಂವಾದಃ 11 EkAdaSadaSakaH - brahmanAradasaMvAdaH

  https://youtu.be/SNibwPz1HMY

೧೧ ಏಕಾದಶದಶಕಃ -    ಬ್ರಹ್ಮನಾರದಸಂವಾದಃ 
ಶ್ರೀನಾರದಃ ಪದ್ಮಜಮೇಕದಾಽಽಹ ಪಿತಸ್ತ್ವಯಾ ಸೃಷ್ಟಮಿದಂ ಜಗತ್ಕಿಂ .
ಕಿಂ ವಿಷ್ಣುನಾ ವಾ ಗಿರಿಶೇನ ವಾ ಕಿಮಕರ್ತೃಕಂ ವಾ ಸಕಲೇಶ್ವರಃ ಕಃ .. ೧೧-೧..

ಇತೀರಿತೋಽಜಃ ಸುತಮಾಹ ಸಾಧು ಪೃಷ್ಟಂ ತ್ವಯಾ ನಾರದ ಮಾಂ ಶೃಣು ತ್ವಂ .
ವಿಭಾತಿ ದೇವೀ ಖಲು ಸರ್ವಶಕ್ತಿಸ್ವರೂಪಿಣೀ ಸಾ ಭುವನಸ್ಯ ಹೇತುಃ .. ೧೧-೨..

ಏಕಂ ಪರಂ ಬ್ರಹ್ಮ ಸದದ್ವಿತೀಯಮಾತ್ಮೇತಿ ವೇದಾಂತವಚೋಭಿರುಕ್ತಾ .
ನ ಸಾ ಪುಮಾನ್ ಸ್ತ್ರೀ ಚ ನ ನಿರ್ಗುಣಾ ಸಾ ಸ್ತ್ರೀತ್ವಂ ಚ ಪುಂಸ್ತ್ವಂ ಚ ಗುಣೈರ್ದಧಾತಿ .. ೧೧-೩..

ಸರ್ವಂ ತದಾವಾಸ್ಯಮಿದಂ ಜಗತ್ಸಾ ಜಾತಾ ನ ಸರ್ವಂ ತತ ಏವ ಜಾತಂ .
ತತ್ರೈವ ಸರ್ವಂ ಚ ಭವೇತ್ಪ್ರಲೀನಂ ಸೈವಾಖಿಲಂ ನಾಸ್ತಿ ಚ ಕಿಂಚನಾನ್ಯತ್ .. ೧೧-೪..

ಗೌಣಾನಿ ಚಾಂತಃಕರಣೇಂದ್ರಿಯಾಣಿ ಸಾ ನಿರ್ಗುಣಾಽವಾಙ್ಮತಿಗೋಚರಾ ಚ .
ಸಾ ಸ್ತೋತ್ರಮಂತ್ರೈಃ ಸಗುಣಾ ಮಹದ್ಭಿಃ ಸಂಸ್ತೂಯತೇ ಭಕ್ತವಿಪನ್ನಿಹಂತ್ರೀ .. ೧೧-೫..

ಸುಧಾಸಮುದ್ರೇ ವಸತೀಯಮಾರ್ಯಾ ದ್ವೀಪೇ ವಿಚಿತ್ರಾದ್ಭುತಶಕ್ತಿಯುಕ್ತಾ .
ಸರ್ವಂ ಜಗದ್ಯದ್ವಶಗಂ ವಯಂ ಚ ತ್ರಿಮೂರ್ತಯೋ ನಾಮ ಯದಾಶ್ರಿತಾಃ ಸ್ಮಃ .. ೧೧-೬..

ತದ್ದತ್ತಶಕ್ತಿತ್ರಯಮಾತ್ರಭಾಜಸ್ತ್ರಿಮೂರ್ತಯಃ ಪುತ್ರ ವಯಂ ವಿನೀತಾಃ .
ತದಾಜ್ಞಯಾ ಸಾಧು ಸದಾಽಪಿ ಕುರ್ಮೋ ಬ್ರಹ್ಮಾಂಡಸರ್ಗಸ್ಥಿತಿಸಂಹೃತೀಶ್ಚ .. ೧೧-೭..

ದೈವೇನ ಮೂಢಂ ಕವಿಮಾತನೋತಿ ಸಾ ದುರ್ಬಲಂ ತು ಪ್ರಬಲಂ ಕರೋತಿ .
ಪಂಗುಂ ಗಿರಿಂ ಲಂಘಯತೇ ಚ ಮೂಕಂ ಕೃಪಾವತೀ ಚಾಽತನುತೇ ಸುವಾಚಂ .. ೧೧-೮..

ಯತ್ಕಿಂಚಿದಜ್ಞಾಯಿ ಮಯಾ ಮಹತ್ತ್ವಂ ದೇವ್ಯಾಸ್ತದುಕ್ತಂ ತವ ಸಂಗ್ರಹೇಣ .
ಸರ್ವತ್ರ ತದ್ವರ್ಣಯ ವಿಸ್ತರೇಣ ವಿಧತ್ಸ್ವ ಭಕ್ತಿಂ ಹೃದಯೇ ಜನಾನಾಂ .. ೧೧-೯..

ಇತೀರಿತೋಽಜೇನ ಮುನಿಃ ಪ್ರಸನ್ನಸ್ತವ ಪ್ರಭಾವಂ ಕರುಣಾರ್ದ್ರಚಿತ್ತೇ .
ವ್ಯಾಸಂ ತಥಾಽನ್ಯಾಂಶ್ಚ ಯಥೋಚಿತಂ ಸ ಪ್ರಬೋಧಯಾಮಸ ಪವಿತ್ರವಾಗ್ಭಿಃ .. ೧೧-೧೦..

ನ ಮೇ ಗುರುಸ್ತ್ವಚ್ಚರಿತಸ್ಯ ವಕ್ತಾ ನ ಮೇ ಮತಿಸ್ತ್ವತ್ಸ್ಮರಣೈಕಸಕ್ತಾ .
ಅವಾಚ್ಯವಕ್ತಾಽಹಮಕಾರ್ಯಕರ್ತಾ ನಮಾಮಿ ಮಾತಶ್ಚರಣಾಂಬುಜಂ ತೇ .. ೧೧-೧೧..

12೧೨ ದ್ವಾದಶದಶಕಃ - ಉತಥ್ಯಜನನಂ 12 dvAdaSadaSakaH - utathyajananaM

  https://youtu.be/QSIpbOu4Iv0

೧೨ ದ್ವಾದಶದಶಕಃ  -    ಉತಥ್ಯಜನನಂ
ಪುರಾ ದ್ವಿಜಃ ಕಶ್ಚನ ದೇವದತ್ತೋ ನಾಮ ಪ್ರಜಾರ್ಥಂ ತಮಸಾಸಮೀಪೇ .
ಕುರ್ವನ್ ಮಖಂ ಗೋಭಿಲಶಾಪವಾಚಾ ಲೇಭೇ ಸುತಂ ಮೂಢಮನಂತದುಃಖಃ .. ೧೨-೧..

ಉತಥ್ಯನಾಮಾ ವವೃಧೇ ಸ ಬಾಲೋ ಮೂಢಸ್ತು ದೃಷ್ಟಂ ನ ದದರ್ಶ ಕಿಂಚಿತ್ .
ಶ್ರುತಂ ನ ಶುಶ್ರಾವ ಜಗಾದ ನೈವ ಪೃಷ್ಟೋ ನ ಚ ಸ್ನಾನಜಪಾದಿ ಚಕ್ರೇ .. ೧೨-೨..

ಇತಸ್ತತೋಽಟನ್ ಸಮವಾಪ್ತಗಂಗೋ ಜಲೇ ನಿಮಜ್ಜನ್ ಪ್ರಪಿಬಂಸ್ತದೇವ .
ವಸನ್ ಮುನೀನಾಮುಟಜೇಷು ವೇದಮಂತ್ರಾಂಶ್ಚ ಶೃಣ್ವನ್ ಸ ದಿನಾನಿ ನಿನ್ಯೇ .. ೧೨-೩..

ಕ್ರಮೇಣ ಸತ್ಸಂಗವಿವೃದ್ಧಸತ್ತ್ವಃ ಸತ್ಯವ್ರತಃ ಸತ್ಯತಪಾಶ್ಚ ಭೂತ್ವಾ .
ನಾಸತ್ಯವಾಕ್ ತ್ವತ್ಕೃಪಯಾ ಸ ಮೂಢೋಽಪ್ಯುನ್ಮೀಲಿತಾಂತರ್ನಯನೋ ಬಭೂವ .. ೧೨-೪..

ಕುಲಂ ಪವಿತ್ರಂ ಜನನೀ ವಿಶುದ್ಧಾ ಪಿತಾ ಚ ಸತ್ಕರ್ಮರತಃ ಸದಾ ಮೇ .
ಮಯಾ ಕೃತಂ ನೈವ ನಿಷಿದ್ಧಕರ್ಮ ತಥಾಽಪಿ ಮೂಢೋಽಸ್ಮಿ ಜನೈಶ್ಚ ನಿಂದ್ಯಃ .. ೧೨-೫..

ಜನ್ಮಾಂತರೇ ಕಿಂ ನು ಕೃತಂ ಮಯಾಽಘಂ ಕಿಂ ವಾ ನ ವಿದ್ಯಾಽರ್ಥಿಜನಸ್ಯ ದತ್ತಾ .
ಗ್ರಂಥೋಽಪ್ಯದತ್ತಃ ಕಿಮು ಪೂಜ್ಯಪೂಜಾ ಕೃತಾ ನ ಕಿಂ ವಾ ವಿಧಿವನ್ನ ಜಾನೇ .. ೧೨-೬..

ನಾಕಾರಣಂ ಕಾರ್ಯಮಿತೀರ್ಯತೇ ಹಿ ದೈವಂ ಬಲಿಷ್ಠಂ ದುರತಿಕ್ರಮಂ ಚ .
ತತೋಽತ್ರ ಮೂಢೋ ವಿಫಲೀಕೃತೋಽಸ್ಮಿ ವಂಧ್ಯದ್ರುವನ್ನಿರ್ಜಲಮೇಘವಚ್ಚ .. ೧೨-೭..

ಇತ್ಯಾದಿ ಸಂಚಿಂತ್ಯ ವನೇ ಸ್ಥಿತಃ ಸ ಕದಾಚಿದೇಕಂ ರುಧಿರಾಪ್ಲುತಾಂಗಂ .
ಬೀಭತ್ಸರೂಪಂ ಕಿಟಿಮೇಷ ಪಶ್ಯನ್ನಯ್ಯಯ್ಯ ಇತ್ಯುತ್ಸ್ವನಮುಚ್ಚಚಾರ .. ೧೨-೮..

ಶರೇಣ ವಿದ್ಧಃ ಸ ಕಿರಿರ್ಭಯಾರ್ತಃ ಪ್ರವೇಪಮಾನೋ ಮುನಿವಾಸದೇಶೇ .
ಅಂತರ್ನಿಕುಂಜಸ್ಯ ಗತಶ್ಚ ದೈವಾದದೃಶ್ಯತಾಮಾಪ ಭಯಾರ್ತಿಹಂತ್ರಿ .. ೧೨-೯..

ವಿನಾ ಮಕಾರಂ ಚ ವಿನಾ ಚ ಭಕ್ತಿಮುಚ್ಚಾರ್ಯ ವಾಗ್ಬೀಜಮನುಂ ಪವಿತ್ರಂ .
ಪ್ರಸನ್ನಬುದ್ಧಿಃ ಕೃಪಯಾ ತವೈಷ ಬಭೂವ ದೂರೀಕೃತಸರ್ವಪಾಪಃ .. ೧೨-೧೦..

ನಾಹಂ ಕವಿರ್ಗಾನವಿಚಕ್ಷಣೋ ನ ನಟೋ ನ ಶಿಲ್ಪಾದಿಷು ನ ಪ್ರವೀಣಃ .
ಪಶ್ಯಾತ್ರ ಮಾಂ ಮೂಢಮನನ್ಯಬಂಧುಂ ಪ್ರಸನ್ನಬುದ್ಧಿಂ ಕುರು ಮಾಂ ನಮಸ್ತೇ .. ೧೨-೧೧..

13೧೩ ತ್ರಯೋದಶದಶಕಃ - ಉತಥ್ಯಮಹಿಮಾ Dasaka udatthyamahima

https://youtu.be/jrPebAgCfbE 

೧೩ ತ್ರಯೋದಶದಶಕಃ -    ಉತಥ್ಯಮಹಿಮಾ
ಅಥಾಗತಃ ಕಶ್ಚಿದಧಿಜ್ಯಧನ್ವಾ ಮುನಿಂ ನಿಷಾದಃ ಸಹಸಾ ಜಗಾದ .
ತ್ವಂ ಸತ್ಯವಾಗ್ಬ್ರೂಹಿ ಮುನೇ ತ್ವಯಾ ಕಿಂ ದೃಷ್ಟಃ ಕಿಟಿಃ ಸಾಯಕವಿದ್ಧದೇಹಃ .. ೧೩-೧..

ದೃಷ್ಟಸ್ತ್ವಯಾ ಚೇದ್ವದ ಸೂಕರಃ ಕ್ವ ಗತೋ ನ ವಾಽದೃಶ್ಯತ ಕಿಂ ಮುನೀಂದ್ರ .
ಅಹಂ ನಿಷಾದಃ ಖಲು ವನ್ಯವೃತ್ತಿರ್ಮಮಾಸ್ತಿ ದಾರಾದಿಕಪೋಷ್ಯವರ್ಗಃ .. ೧೩-೨..

ಶ್ರುತ್ವಾ ನಿಷಾದಸ್ಯ ವಚೋ ಮುನಿಃ ಸ ತೂಷ್ಣೀಂ ಸ್ಥಿತಶ್ಚಿಂತಯತಿ ಸ್ಮ ಗಾಢಂ .
ವದಾಮಿ ಕಿಂ ದೃಷ್ಟ ಇತೀರ್ಯತೇ ಚೇದ್ಧನ್ಯಾದಯಂ ತಂ ಮಮ ಚಾಪ್ಯಘಂ ಸ್ಯಾತ್ .. ೧೩-೩..

ಸತ್ಯಂ ನರಂ ರಕ್ಷತಿ ರಕ್ಷಿತಂ ಚೇದಸತ್ಯವಕ್ತಾ ನರಕಂ ವ್ರಜೇಚ್ಚ .
ಸತ್ಯಂ ಹಿ ಸತ್ಯಂ ಸದಯಂ ನ ಕಿಂಚಿತ್ಸತ್ಯಂ ಕೃಪಾಶೂನ್ಯಮಿದಂ ಮತಂ ಮೇ .. ೧೩-೪..

ಏವಂ ಮುನೇಶ್ಚಿಂತಯತಃ ಸ್ವಕಾರ್ಯವ್ಯಗ್ರೋ ನಿಷಾದಃ ಪುನರೇವಮೂಚೇ .
ದೃಷ್ಟಸ್ತ್ವಯಾ ಕಿಂ ಸ ಕಿಟಿರ್ನ ಕಿಂ ವಾ ದೃಷ್ಟಃ ಸ ಶೀಘ್ರಂ ಕಥಯಾತ್ರ ಸತ್ಯಂ .. ೧೩-೫..

ಮುನಿಸ್ತಮಾಹಾತ್ರ ಪುನಃ ಪುನಃ ಕಿಂ ನಿಷಾದ ಮಾಂ ಪೃಚ್ಛಸಿ ಮೋಹಮಗ್ನಃ .
ಪಶ್ಯನ್ ನ ಭಾಷೇತ ನ ಚ ಬ್ರುವಾಣಃ ಪಶ್ಯೇದಲಂ ವಾಗ್ಭಿರವೇಹಿ ಸತ್ಯಂ .. ೧೩-೬..

ಉನ್ಮಾದಿನೋ ಜಲ್ಪನಮೇತದೇವಂ ಮತ್ವಾ ನಿಷಾದಃ ಸಹಸಾ ಜಗಾಮ .
ನ ಸತ್ಯಮುಕ್ತಂ ಮುನಿನಾ ನ ಕೋಲೋ ಹತಶ್ಚ ಸರ್ವಂ ತವ ದೇವಿ ಲೀಲಾಃ .. ೧೩-೭..

ದ್ರಷ್ಟಾ ಪರಂ ಬ್ರಹ್ಮ ತದೇವ ಚ ಸ್ಯಾದಿತಿ ಶ್ರುತಿಃ ಪ್ರಾಹ ನ ಭಾಷತೇ ಸಃ .
ಸದಾ ಬ್ರುವಾಣಸ್ತು ನ ಪಶ್ಯತೀದಮಯಂ ಹಿ ಸತ್ಯವ್ರತವಾಕ್ಯಸಾರಃ .. ೧೩-೮..

ಭೂಯಃ ಸ ಸಾರಸ್ವತಬೀಜಮಂತ್ರಂ ಚಿರಂ ಜಪನ್ ಜ್ಞಾನನಿಧಿಃ ಕವಿಶ್ಚ .
ವಾಲ್ಮೀಕಿವತ್ಸರ್ವದಿಶಿ ಪ್ರಸಿದ್ಧೋ ಬಭೂವ ಬಂಧೂನ್ ಸಮತರ್ಪಯಚ್ಚ .. ೧೩-೯..

ಸ್ಮೃತಾ ನತಾ ದೇವಿ ಸುಪೂಜಿತಾ ವಾ ಶ್ರುತಾ ನುತಾ ವಾ ಖಲು ವಂದಿತಾ ವಾ .
ದದಾಸಿ ನಿತ್ಯಂ ಹಿತಮಾಶ್ರಿತೇಭ್ಯಃ ಕೃಪಾರ್ದ್ರಚಿತ್ತೇ ಸತತಂ ನಮಸ್ತೇ .. ೧೩-೧೦..