https://www.youtube.com/watch?v=H3U98v-m_BE
22 ദ്വാവിംശദശകഃ - കൃഷ്ണകഥാ
ശ്രിയഃപതിർഗോമലമൂത്രഗന്ധിന്യസ്തപ്രഭോ ഗോപകുലേ വിഷണ്ണഃ .
കൃഷ്ണാഭിധോ വത്സബകാദിഭീതോ രുദൻ സദാ ദേവീ നിനായ ബാല്യം .. 22-1..
ഹൈയംഗവീനം മഥിതം പയശ്ച ഗോപീർവിലജ്ജഃ സതതം യയാചേ .
സ ചാംബയാ ഗോരസചൗര്യചുഞ്ചുരുലൂഖലേ പാശവരേണ ബദ്ധഃ .. 22-2..
വനേഷു ഭീമാതപശുഷ്കഗാത്രോ ഗാശ്ചാരയൻ കണ്ടകവിദ്ധപാദഃ .
വന്യാംബുപായീ ഫലമൂലഭക്ഷീ ദിനേ ദിനേ ഗ്ലാനിമവാപ കൃഷ്ണഃ .. 22-3..
ദൈവേന മുക്തഃ സ ച ഗോപദാസ്യാദക്രൂരനീതോ മഥുരാം പ്രവിഷ്ടഃ .
കംസം നിഹത്യാപി ഹതാഭിലാഷസ്തത്രോഗ്രസേനസ്യ ബഭൂവ ദാസഃ .. 22-4..
ദൃഷ്ട്വാ ജരാസന്ധചമൂം ഭയേന സ ബന്ധുമിത്രോ മഥുരാം വിഹായ .
ധാവൻ കഥഞ്ചിദ്ബഹുദുർഗമാർതഃ സ ദ്വാരകാദ്വീപപുരം വിവേശ .. 22-5..
സ രുക്മിണീം ജാംബവതീം ച ഭാമാം കന്യാസ്തഥാ ദ്വ്യഷ്ടസഹസ്രമന്യാഃ .
സമുദ്വഹൻ സസ്മിതനർമലാപഃ ക്രീഡാമൃഗോഽഭൂത്സതതം വധൂനാം .. 22-6..
സ ദസ്യുവൃത്തിസ്ത്രിദിവാജ്ജഹാര ഭാമാനിയുക്തഃ സുരപാരിജാതം .
സത്യാ ച തം ഗോവൃഷവത്സരോഷം ബദ്ധ്വാ തരൗ ദുർവചസാഽഭ്യഷിഞ്ചത് .. 22-7..
ശ്രീനാരദായാതിഥയേ തയാ സ ദത്തോഥ മുക്തോ മുനിനാ ച നീതഃ .
തതസ്തയാഽസ്മൈ കനകം പ്രദായ പുനർഗൃഹീതസ്ത്രപയാഽഽപ മൗനം .. 22-8..
സൂതീഗൃഹാദ്ഭീഷ്മകജാസുതേ സ പ്രദ്യുമ്നനാമ്നീശ്വരി ശംബരേണ .
ഹൃതേ ശിശൗ നിർമഥിതാഭിമാന ഉച്ചൈ രുദംസ്ത്വാം ശരണം പ്രപന്നഃ .. 22-9..
പുത്രാർഥിനീം ജാംബവതീമപുത്രാം സ തോഷയിഷ്യന്നുപമന്യുശിഷ്യഃ .
മുണ്ഡീ ച ദണ്ഡീ ച ശിവസ്യ ശൈലേ മന്ത്രം ജപൻ ഘോരതപശ്ചകാര .. 22-10..
വരേണ ഭർഗസ്യ ദശാത്മജാൻ സാ പ്രാസൂത സർവാ ദയിതാശ്ച ശൗരേഃ .
തഥൈവ ലബ്ധ്വാ സ സുതായുതാനി സുഖം ന ലേഭേ നിജകർമദോഷാത് .. 22-11..
ശാപാദൃഷീണാം ധൃതരാഷ്ട്രപത്ന്യാശ്ചാന്യോന്യവൈരേണ കൃതാഹവേഷു .
സർവേ ഹതാ ഹന്ത കുലം യദൂനാം മഹത്പ്രദഗ്ധം വനമഗ്നിനേവ .. 22-12..
വ്യാധേഷുവിദ്ധോ മൃതിമാപ കൃഷ്ണഃ കുശസ്ഥലീ ചാബ്ധിജലാപ്ലുതാഽഭൂത് .
ഹാ ജഹ്രിരേ ദസ്യുഭിരേനസാഽഷ്ടാവക്രസ്യ ശാപേന യദുസ്ത്രിയശ്ച .. 22-13..
ഏവം ഹരിഃ കർമഫലാന്യഭുങ്ക്ത ന കോഽപി മുച്യേത ച കർമബന്ധാത് .
ദുഃഖം ത്വഭക്തസ്യ സുദുസ്സഹം സ്യാദ്ഭക്തസ്യ തേ തത്സുസഹം ഭവേച്ച .. 22-14..
ജാനാസ്യഹം തേ പദയോരഭക്തോ ഭക്തോ നു കിം വേതി ന ചൈവ ജാനേ .
ത്വം സർവശക്താ കുരു മാം സുശക്തം സർവത്ര ഭൂയോഽപി ശിവേ നമസ്തേ .. 22-15..
