dasaka 25 പഞ്ചവിംശദശകഃ - മഹാസരസ്വത്യവതാരഃ

https://youtu.be/_5nwv52jXZI?si=rgFrat23ZpmucRxp

 

25 പഞ്ചവിംശദശകഃ - മഹാസരസ്വത്യവതാരഃ

സുംഭാദിവധം
അഥാമരാഃ ശത്രുവിനാശതൃപ്താശ്ചിരായ ഭക്ത്യാ ഭവതീം ഭജന്തഃ .
മന്ദീഭവദ്ഭക്തിഹൃദഃ ക്രമേണ പുനശ്ച ദൈത്യാഭിഭവം സമീയുഃ .. 25-1..

സുംഭോ നിസുംഭശ്ച സഹോദരൗ സ്വൈഃ പ്രസാദിതാത്പദ്മഭവാത്തപോഭിഃ .
സ്ത്രീമാത്രവധ്യത്വമവാപ്യ ദേവാൻ ജിത്വാ രണേഽധ്യൂഷതുരൈന്ദ്രലോകം .. 25-2..

ഭ്രഷ്ടശ്രിയസ്തേ തു ഗുരൂപദേശാദ്ധിമാദ്രിമാപ്താ നുനുവുഃ സുരാസ്ത്വാം .
തേഷാം പുരശ്ചാദ്രിസുതാഽഽവിരാസീത്സ്നാതും ഗതാ സാ കില ദേവനദ്യാം .. 25-3..

തദ്ദേഹകോശാത്ത്വമജാ പ്രജാതാ യതഃ പ്രസിദ്ധാ ഖലു കൗശികീതി .
മഹാസരസ്വത്യഭിധാം ദധാനാ ത്വം രാജസീശക്തിരിതീര്യസേ ച .. 25-4..

ഹിമാദ്രിശൃംഗേഷു മനോഹരാംഗീ സിംഹാധിരൂഢാ മൃദുഗാനലോലാ .
ശ്രോത്രാണി നേത്രാണ്യപി ദേഹഭാജാം ചകർഷിഥാഷ്ടാദശബാഹുയുക്താ .. 25-5..

വിജ്ഞായ സുംഭഃ കില ദൂതവാക്യാത്ത്വാം മോഹനാംഗീം ദയിതാം ചികീർഷുഃ .
ത്വദന്തികേ പ്രേഷയതിസ്മ ദൂതാനേകൈകശഃ സ്നിഗ്ധവചോവിലാസാൻ .. 25-6..

ത്വാം പ്രാപ്യ തേ കാലികയാ സമേതാമേകൈകശഃ സുംഭഗുണാൻ പ്രഭാഷ്യ .
പത്നീ ഭവാസ്യേതി കൃതോപദേശാസ്തത്പ്രാതികുല്യാത്കുപിതാ ബഭൂവുഃ .. 25-7..

സുംഭാജ്ഞയാ ധൂമ്രവിലോചനാഖ്യോ രണോദ്യതഃ കാലികയാ ഹതോഽഭൂത് .
ചണ്ഡം ച മുണ്ഡം ച നിഹത്യ കാലീ ത്വത്ഫാലജാ തദ്രുധിരം പപൗ ച .. 25-8..

ചാമുണ്ഡികേതി പ്രഥിതാ തതഃ സാ ത്വാം രക്തബീജോഽധ യുയുത്സുരാപ .
യദ്രക്തബിന്ദൂദ്ഭവരക്തബീജസംഘൈർജഗദ്വ്യാപ്തമഭൂദശേഷം .. 25-9..

ബ്രഹ്മേന്ദ്രപാശ്യാദികദേവശക്തികോട്യോ രണം ചക്രുരരാതിസംഘൈഃ .
തത്സംഗരം വർണയിതും ന ശക്തഃ സഹസ്രജിഹ്വോഽപി പുനഃ കിമന്യേ .. 25-10..

രണേഽതിഘോരേ വിവൃതാനനാ സാ കാലീ സ്വജിഹ്വാം ഖലു ചാലയന്തീ .
ത്വച്ഛസ്ത്രകൃത്താഖിലരക്തബീജരക്തം പപൗ ഗർജനഭീതദൈത്യാ .. 25-11..

ത്വയാ നിസുംഭസ്യ ശീരോ നികൃത്തം സുംഭസ്യ തത്കാലികയാഽപി ചാന്തേ .
അന്യേഽസുരാസ്ത്വാം ശിരസാ പ്രണമ്യ പാതാലമാപുസ്ത്വദനുഗ്രഹേണ .. 25-12..

ഹതേഷു ദേവാ രിപുഷു പ്രണമ്യ ത്വാം തുഷ്ടുവുഃ സ്വർഗമഗുഃ പുനശ്ച .
തേ പൂർവവദ്യജ്ഞഹവിർഹരന്തോ ഭൂമാവവർഷൻ ജഹൃഷുശ്ച മർത്യാഃ .. 25-13..

മാതർമദീയേ ഹൃദി സന്തി ദംഭദർപാഭിമാനാദ്യസുരാ ബലിഷ്ഠാഃ .
നിഹത്യ താൻ ദേഹ്യഭയം സുഖം ച ത്വമേവ മാതാ മമ തേ നമോഽസ്തു .. 25-14..

40 ചത്വാരിംശദശകഃ - പ്രാർഥനാ

 

40 ചത്വാരിംശദശകഃ -    പ്രാർഥനാ
ആദ്യേതി വിദ്യേതി ച കഥ്യതേ യാ യാ ചോദയേദ്ബുദ്ധിമുപാസകസ്യ .
ധ്യായാമി താമേവ സദാഽപി സർവചൈതന്യരൂപാം ഭവമോചനീം ത്വാം .. 40-1..

പ്രതിഷ്ഠിതാഽന്തഃകരണേഽസ്തു വാങ്മേ വദാമി സത്യം ന വദാമ്യസത്യം .
സത്യോക്തിരേനം പരിപാതു മാം മേ ശ്രുതം ച മാ വിസ്മൃതിമേതു മാതഃ .. 40-2..

തേജസ്വി മേഽധീതമജസ്രമസ്തു മാ മാ പരദ്വേഷമതിശ്ച ദേവി .
കരോമി വീര്യാണി സമം സുഹൃദ്ഭിർവിദ്യാ പരാ സാഽവതു മാം പ്രമാദാത് .. 40-3..

ത്വം രക്ഷ മേ പ്രാണശരീരകർമജ്ഞാനേന്ദ്രിയാന്തഃകരണാനി ദേവി .
ഭവന്തു ധർമാ മയി വൈദികാസ്തേ നിരാകൃതിർമാഽസ്തു മിഥഃ കൃപാർദ്രേ .. 40-4..

യച്ഛ്രൂയതേ യത്ഖലു ദൃശ്യതേ ച തദസ്തു ഭദ്രം സകലം യജത്രേ .
ത്വാം സംസ്തുവന്നസ്തസമസ്തരോഗ ആയുഃ ശിവേ ദേവഹിതം നയാനി .. 40-5..

അവിഘ്നമായാത്വിഹ വിശ്വതോ മേ ജ്ഞാനം പ്രസന്നാ മമ ബുദ്ധിരസ്തു .
നാവേവ സിന്ധും ദുരിതം സമസ്തം ത്വത്സേവയൈവാതിതരാമി ദേവി .. 40-6..

ഉർവാരുകം ബന്ധനതോ യഥൈവ തഥൈവ മുച്യേയ ച കർമപാശാത് .
ത്വാം ത്ര്യംബകാം കീർതിമതീം യജേയ സന്മാർഗതോ മാം നയ വിശ്വമാതഃ .. 40-7..

ക്ഷീണായുഷോ മൃത്യുഗതാൻ സ്വശക്ത്യാ ദീർഘായുഷോ വീതഭയാൻ കരോഷി .
സംഗച്ഛതഃ സംവദതശ്ച സർവാൻ പരോപകാരൈകരതാൻ കുരുഷ്വ .. 40-8..

മർത്യോ ഹ്യഹം ബാലിശബുദ്ധിരേവ ധർമാനഭിജ്ഞോഽപ്യപരാധകൃച്ച .
ഹാ ദുർലഭം മേ കപിഹസ്തപുഷ്പസുമാല്യവച്ഛീർണമിദം നൃജന്മ .. 40-9..

യഥാ പഥാ വാരി യഥാ ച ഗൗഃ സ്വം വത്സം തഥാഽഽധാവതു മാം മനസ്തേ .
വിശ്വാനി പാപാനി വിനാശ്യ മേ യദ്ഭദ്രം ശിവേ ദേഹി തദാർതിഹന്ത്രി .. 40-10..

ബഹൂക്തിഭിഃ കിം വിദിതസ്ത്വയാഽഹം പുത്രഃ ശിശുസ്തേ ന ച വേദ്മി കിഞ്ചിത് .
ആഗച്ഛ പശ്യാനി മുഖാരവിന്ദം പദാംബുജാഭ്യാം സതതം നമസ്തേ .. 40-11..

41 ഏകചത്വാരിംശദശകഃ - പ്രണാമംST0RY@5G https://youtu.be/hmH3AXRsjXQ ANVAYA https://youtu.be/CXVS9VP0nxQ

https://youtu.be/h

mH3AXRsjXQ

 

41 ഏകചത്വാരിംശദശകഃ -    പ്രണാമം
ദേവി ത്വദാവാസ്യമിദം ന കിഞ്ചിദ്വസ്തു ത്വദന്യദ്ബഹുധേവ ഭാസി .
ദേവാസുരാസൃക്പനരാദിരൂപാ വിശ്വാത്മികേ തേ സതതം നമോഽസ്തു .. 41-1..

ന ജന്മ തേ കർമ ച ദേവി ലോകക്ഷേമായ ജന്മാനി ദധാസി മാതഃ .
കരോഷി കർമാണി ച നിസ്പൃഹാ ത്വം ജഗദ്വിധാത്ര്യൈ സതതം നമസ്തേ .. 41-2..

തത്ത്വത്പദം യദ്ധ്രുവമാരുരുക്ഷുഃ പുമാൻ വ്രതീ നിശ്ചലദേഹചിത്തഃ .
കരോതി തീവ്രാണി തപാംസി യോഗീ തസ്യൈ നമസ്തേ ജഗദംബികായൈ .. 41-3..

ത്വദാജ്ഞയാ വാത്യനിലോഽനലശ്ച ജ്വലത്യുദേതി ദ്യുമണിഃ ശശീ ച .
നിജൈർനിജൈഃ കർമഭിരേവ സർവേ ത്വാം പൂജയന്തേ വരദേ നമസ്തേ .. 41-4..

ഭക്തിർന വന്ധ്യാ യത ഏവ ദേവി രാഗാദിരോഗാഭിഭവാദ്വിമുക്താഃ .
മർത്ത്യാദയസ്ത്വത്പദമാപ്നുവന്തി തസ്യൈ നമസ്തേ ഭുവനേശി മാതഃ .. 41-5..

സർവാത്മനാ യോ ഭജതേ ത്വദംഘ്രിം മായാ തവാമുഷ്യ സുഖം ദദാതി .
ദുഃഖം ച സാ ത്വദ്വിമുഖസ്യ ദേവി മായാധിനാഥേ സതതം നമസ്തേ .. 41-6..

ദുഃഖം ന ദുഃഖം ന സുഖം സുഖം ച ത്വദ്വിസ്മൃതിർദുഃഖമസഹ്യഭാരം .
സുഖം സദാ ത്വത്സ്മരണം മഹേശി ലോകായ ശം ദേഹി നമോ നമസ്തേ .. 41-7..

പതന്തു തേ ദേവി കൃപാകടാക്ഷാഃ സർവത്ര ഭദ്രാണി ഭവന്തു നിത്യം .
സർവോഽപി മൃത്യോരമൃതത്വമേതു നശ്യന്ത്വഭദ്രാണി ശിവേ നമസ്തേ .. 41-8..

നമോ നമസ്തേഽഖിലശക്തിയുക്തേ നമോ നമസ്തേ ജഗതാം വിധാത്രി .
നമോ നമസ്തേ കരുണാർദ്രചിത്തേ നമോ നമസ്തേ സകലാർതിഹന്ത്രി .. 41-9..

ദുർഗേ മഹാലക്ഷ്മി നമോ നമസ്തേ ഭദ്രേ മഹാവാണി നമോ നമസ്തേ .
കല്യാണി മാതംഗി രമേ ഭവാനി സർവസ്വരൂപേ സതതം നമസ്തേ .. 41-10..

യത് കിഞ്ചിദജ്ഞാതവതേഹ ദേവീനാരായണീയം രചിതം മയേദം .
അഭദ്രനാശായ സതാം ഹിതായ തവ പ്രസാദായ ച നിത്യമസ്തു .. 41-11..

ശുഭം

39 ഏകോനചത്വാരിംശദശകഃ - മണിദ്വീപനിവാസിനീ

https://www.youtube.com/watch?v=vRZIJSbjEF4

 

39 ഏകോനചത്വാരിംശദശകഃ -    മണിദ്വീപനിവാസിനീ
സുധാസമുദ്രോ ജഗതാം ത്രയാണാം ഛത്രീഭവൻ മഞ്ജുതരംഗഫേനഃ .
സവാലുകാശംഖവിചിത്രരത്നഃ സതാരകവ്യോമസമോ വിഭാതി .. 39-1..

തന്മധ്യദേശേ വിമലം മണിദ്വീപാഖ്യാം പദം ദേവി വിരാജതേ തേ .
യദുച്യതേ സംസൃതിനാശകാരി സർവോത്തരം പാവനപാവനം ച .. 39-2..

തത്രാസ്ത്യയോധാതുമയോ മനോജ്ഞഃ സാലോ മഹാസാരമയസ്തതശ്ച .
ഏവം ച താമ്രാദിമയാഃ കിലാഷ്ടാദശാതിചിത്രാ വരണാ ലസന്തി .. 39-3..

തൈരാവൃതം തേ പദമദ്വിതീയം വിഭാതി ചിന്താമണിസദ്മ ദേവി .
സന്ത്യത്ര സത്സ്തംഭസഹസ്രരമ്യശൃംഗാരമുക്ത്യാദികമണ്ഡപാശ്ച .. 39-4..

ബ്രഹ്മാണ്ഡകോടീഃ സുഖമാവസന്ത ഉപാസകാസ്തേ മനുജാഃ സുരാശ്ച .
ദൈത്യാശ്ച സിദ്ധാശ്ച തഥേതരേ ച യദന്തതോ യാന്തി പദം തദേതത് .. 39-5..

ത്വം മണ്ഡപസ്ഥാ ബഹുശക്തിയുക്താ ശൃണോഷി ദേവീകലഗീതകാനി .
ജ്ഞാനം വിമുക്തിം ച ദദാസി ലോകരക്ഷാമജസ്രം കുരുഷേ ച ദേവി .. 39-6..

മഞ്ചോഽസ്തി ചിന്താമണിഗേഹതസ്തേ ബ്രഹ്മാ ഹരീ രുദ്ര ഇഹേശ്വരശ്ച .
ഖുരാ ഭവന്ത്യസ്യ സദാശിവസ്തു വിരാജതേ സത്ഫലകത്വമാപ്തഃ .. 39-7..

തസ്യോപരി ശ്രീഭുവനേശ്വരി ത്വം സർവേശവാമാങ്കതലേ നിഷണ്ണാ .
ചതുർഭുജാ ഭൂഷണഭൂഷിതാംഗീ നിർവ്യാജകാരുണ്യവതീ വിഭാസി .. 39-8..

പ്രതിക്ഷണം കാരയസി ത്വമിച്ഛാജ്ഞാനക്രിയാശക്തിസമന്വിതാഽത്ര .
ത്രിമൂർതിഭിഃ ശക്തിസഹസ്രയുക്താ ബ്രഹ്മാണ്ഡസർഗസ്ഥിതിസംഹൃതീശ്ച .. 39-9..

സാ ത്വം ഹി വാചാം മനസോഽപ്യഗമ്യാ വിചിത്രരൂപാഽസി സദാഽപ്യരൂപാ .
പുരഃ സതാം സന്നിഹിതാ കൃപാർദ്രാ സദാ മണിദ്വീപനിവാസിനീ ച .. 39-10..

മാതർമദന്തഃകരണേ നിഷണ്ണാ വിദ്യാമയം മാം കുരു ബന്ധമുക്തം .
ബന്ധം ച മോക്ഷം ച ദദാസ്യസക്താ ദാസോഽസ്മി തേ ദേവി നമോ നമസ്തേ .. 39-11..

38 അഷ്ടാത്രിംശദശകഃ - ചിത്തശുദ്ധിപ്രാധാന്യം

https://youtu.be/hTiN2ysThZE

 

38 അഷ്ടാത്രിംശദശകഃ -    ചിത്തശുദ്ധിപ്രാധാന്യം
അന്തർമുഖോ യഃ സ്വശുഭേച്ഛയൈവ സ്വയം വിമർശേന മനോമലാനി .
ദൃഷ്ട്വാ ശമാദ്യൈർധുനുതേ സമൂലം സ ഭാഗ്യവാന്ദേവി തവ പ്രിയശ്ച .. 38-1..

ന വേദശാസ്ത്രാധ്യയനേന തീർഥസംസേവയാ ദാനതപോവ്രതൈർവാ .
ശുദ്ധിം മനോ യാതി തവ സ്മൃതേസ്തദ്വൈശദ്യമാദർശവദേതി മാതഃ .. 38-2..

ശുദ്ധിർന യജ്ഞേന യജൻ ശശാങ്കഃ പത്നീം ഗുരോഃ പ്രാപ ഭൃശം സ്മരാർതഃ .
ശതക്രതുർഗൗതമധർമപത്നീമഗാദഹല്യാം മദനേഷു വിദ്ധഃ .. 38-3..

സ വിഘ്നകാരീ തപസാം മുനീനാം ഗതസ്പൃഹം യോഗിവരം പ്രശാന്തം .
ഹാ വിശ്വരൂപം പവിനാ ജഘാന ന കിഞ്ചനാകാര്യമധർമബുദ്ധേഃ .. 38-4..

മുനിർവസിഷ്ഠഃ ഖലു തീർഥസേവീ തപോനിധിർഗാധിസുതശ്ച കോപാത് .
ഉഭൗ മിഥഃ ശേപതുരാഡിഭാവം പ്രാപ്തഃ കിലൈകോ ബകതാം പരശ്ച .. 38-5..

ധനാനി പൃഷ്ടാനി ഗുരൂനദാതൄൻ സ്വാൻ ഭാർഗവാൻ പുത്രകലത്രഭാജഃ .
ക്രുദ്ധാഃ പരം ഹൈഹയഭൂമിപാലാ ന്യപീഡയൻ കോഽത്ര വിശുദ്ധചിത്തഃ .. 38-6..

കുര്യാന്ന കിം ലോഭഹതോ മനുഷ്യോ യുധിഷ്ഠിരാദ്യാ അപി ധർമനിഷ്ഠാഃ .
പിതാമഹം ബന്ധുജനാൻ ഗുരൂംശ്ച രണേ നിജഘ്നുഃ ഖലു രാജ്യലോഭാത് .. 38-7..

കൃഷ്ണോപദിഷ്ടോ ജനമേജയസ്തു ശുദ്ധാന്തരംഗഃ പിതരം മഖേന .
പരീക്ഷിതം പാപവിമുക്തമാര്യം വിധായ തേ പ്രാപയതിസ്മ ലോകം .. 38-8..

സദാ സദാചാരരതോ വിവിക്തേ ദേശേ നിഷണ്ണശ്ചരണാംബുജേ തേ .
ധ്യായന്നജസ്രം നിജവാസനാ യോ നിർമാർഷ്ടി സ ത്വന്മയതാമുപൈതി .. 38-9..

ജ്ഞാനം ന ഭക്തിർന തപോ ന യോഗബുദ്ധിർന മേ ചിത്തജയോഽപി മാതഃ .
അന്ധം തമോഽഹം പ്രവിശാമി മൃത്യോഃ സമുദ്ധരേമം വരദേ നമസ്തേ .. 38-10..