20 ವಿಂಶದಶಕಃ - ದೇವಕೀಪುತ್ರವಧಂ

 PPT

AUDIO

VIDEO

https://youtu.be/li9kMWpp-4w

20 ವಿಂಶದಶಕಃ  -    ದೇವಕೀಪುತ್ರವಧಂ
ಅಥೋರುಪುಣ್ಯೇ ಮಥುರಾಪುರೇ ತು ವಿಭೂಷಿತೇ ಮೌಕ್ತಿಕಮಾಲಿಕಾಭಿಃ .
ಶ್ರೀದೇವಕೀಶೌರಿವಿವಾಹರಂಗೇ ಸರ್ವೈಃ ಶ್ರುತಂ ವ್ಯೋಮವಚಃ ಸ್ಫುಟಾರ್ಥಂ .. 20-1..

ಅವೇಹಿ ಭೋ ದೇವಕನಂದನಾಯಾಃ ಸುತೋಽಷ್ಟಮಃ ಕಂಸ ತವಾಂತಕಃ ಸ್ಯಾತ್ .
ಶ್ರುತ್ವೇತಿ ತಾಂ ಹಂತುಮಸಿಂ ದಧಾನಃ ಕಂಸೋ ನಿರುದ್ಧೋ ವಸುದೇವಮುಖ್ಯೈಃ .. 20-2..

ಅಥಾಹ ಶೌರಿಃ ಶೃಣು ಕಂಸ ಪುತ್ರಾನ್ ದದಾಮಿ ತೇಽಸ್ಯಾಃ ಶಪಥಂ ಕರೋಮಿ .
ಏತದ್ವಚೋ ಮೇ ವ್ಯಭಿಚರ್ಯತೇ ಚೇನ್ಮತ್ಪೂರ್ವಜಾತಾ ನರಕೇ ಪತಂತು .. 20-3..

ಶ್ರದ್ಧಾಯ ಶೌರೇರ್ವಚನಂ ಪ್ರಶಾಂತಸ್ತಾಂ ದೇವಕೀಂ ಭೋಜಪತಿರ್ಮುಮೋಚ .
ಸರ್ವೇ ಚ ತುಷ್ಟಾ ಯದವೋ ನಗರ್ಯಾಂ ತೌ ದಂಪತೀ ಚೋಷತುರಾತ್ತಮೋದಂ .. 20-4..

ಕಾಲೇ ಸತೀ ಪುತ್ರಮಸೂತ ತಾತಃ ಕಂಸಾಯ ನಿಶ್ಶಂಕಮದಾತ್ಸುತಂ ಸ್ವಂ .
ಹಂತಾ ನ ಮೇಽಯಂ ಶಿಶುರಿತ್ಯುದೀರ್ಯ ತಂ ಪ್ರತ್ಯದಾದ್ಭೋಜಪತಿಶ್ಚ ತಸ್ಮೈ .. 20-5..

ಅಥಾಶು ಭೂಭಾರವಿನಾಶನಾಖ್ಯತ್ವನ್ನಾಟಕಪ್ರೇಕ್ಷಣಕೌತುಕೇನ .
ಶ್ರೀನಾರದಃ ಸರ್ವವಿದೇತ್ಯ ಕಂಸಮದೃಶ್ಯಹಾಸಂ ಸಕಲಂ ಜಗಾದ .. 20-6..

ತ್ವಂ ಭೂಪ ದೈತ್ಯಃ ಖಲು ಕಾಲನೇಮಿರ್ಜಗತ್ಪ್ರಸಿದ್ಧೋ ಹರಿಣಾ ಹತಶ್ಚ .
ತತೋಽತ್ರ ಜಾತೋಽಸಿ ಸುರಾ ಹರಿಶ್ಚ ತ್ವಾಂ ಹಂತುಮಿಚ್ಛಂತ್ಯಧುನಾಽಪಿ ಶತ್ರುಂ .. 20-7..

ದೇವಾಸ್ತದರ್ಥಂ ನರರೂಪಿಣೋಽತ್ರ ವ್ರಜೇ ಚ ಜಾತಾ ವಸುದೇವಮುಖ್ಯಾಃ .
ನಂದಾದಯಶ್ಚ ತ್ರಿದಶಾ ಇಮೇ ನ ವಿಸ್ರಂಭಣೀಯಾ ನ ಚ ಬಾಂಧವಾಸ್ತೇ .. 20-8..

ತ್ವಂ ವ್ಯೋಮವಾಣೀಂ ಸ್ಮರ ದೇವಕಸ್ಯ ಪುತ್ರ್ಯಾಃ ಸುತೇಷ್ವಷ್ಟಮತಾಂ ಗತಃ ಸನ್ .
ಸ ತ್ವಾಂ ನಿಹಂತಾ ಹರಿರೇವ ಶತ್ರುರಲ್ಪೋಽಪಿ ನೋಪೇಕ್ಷ್ಯ ಇತೀರ್ಯತೇ ಹಿ .. 20-9..

ಸರ್ವಾತ್ಮಜಾನಾಂ ನೃಪ ಮೇಲನೇಽಸ್ಯಾಃ ಸರ್ವೇಽಷ್ಟಮಾಃ ಸ್ಯುಃ ಪ್ರಥಮೇ ಚ ಸರ್ವೇ .
ಮಾಯಾವಿನಂ ವಿದ್ಧಿ ಹರಿಂ ಸದೇತಿ ಗತೇ ಮುನೌ ಕ್ರೋಧಮಿಯಾಯ ಕಂಸಃ .. 20-10..

ಸ ದೇವಕೀಸೂನುಮರಂ ಜಘಾನ ಕಾರಾಗೃಹೇ ತಾಂ ಪತಿಮಪ್ಯಬಧ್ನಾತ್ .
ತಯೋಃ ಸುತಾನ್ ಷಟ್ ಖಲು ಜಾತಮಾತ್ರಾನ್ ಹತ್ವಾ ಕೃತಂ ಸ್ವಂ ಹಿತಮೇವ ಮೇನೇ .. 20-11..

ಕಾಯೇನ ವಾಚಾ ಮನಸೇಂದ್ರಿಯೈರ್ವಾ ಮಾ ಜಾತು ಪಾಪಂ ಕರವಾಣಿ ದೇವಿ .

ಮಮಾಸ್ತು ಸತ್ಕರ್ಮರತಿಃ ಪ್ರಿಯಸ್ತೇ ಭವಾನಿ ಭಕ್ತಂ ಕುರು ಮಾಂ ನಮಸ್ತೇ .. 20-12..

20 ವಿಂಶದಶಕಃ - ದೇವಕೀಪುತ್ರವಧಂ

19 ಏಕೋನವಿಂಶದಶಕಃ - ಭೂಮ್ಯಾಃ ದುಃಖಂ 1

VIDEO 

PPT

AUDIO

19 ಏಕೋನವಿಂಶದಶಕಃ -    ಭೂಮ್ಯಾಃ ದುಃಖಂ 1

ಪುರಾ ಧರಾ ದುರ್ಜನಭಾರದೀನಾ ಸಮಂ ಸುರಭ್ಯಾ ವಿಬುಧೈಶ್ಚ ದೇವಿ .

ವಿಧಿಂ ಸಮೇತ್ಯ ಸ್ವದಶಾಮುವಾಚ ಸ ಚಾನಯತ್ಕ್ಷೀರಪಯೋನಿಧಿಂ ತಾನ್ .. 19-1..

ಸ್ತುತೋ ಹರಿಃ ಪದ್ಮಭವೇನ ಸರ್ವಂ ಜ್ಞಾತ್ವಾಽಖಿಲಾನ್ ಸಾಂಜಲಿಬದ್ಧಮಾಹ .
ಬ್ರಹ್ಮನ್ ಸುರಾ ನೈವ ವಯಂ ಸ್ವತಂತ್ರಾ ದೈವಂ ಬಲೀಯಃ ಕಿಮಹಂ ಕರೋಮಿ .. 19-2..

ದೈವೇನ ನೀತಃ ಖಲು ಮತ್ಸ್ಯಕೂರ್ಮಕೋಲಾದಿಜನ್ಮಾನ್ಯವಶೋಽಹಮಾಪ್ತಃ .
ನೃಸಿಂಹಭಾವಾದತಿಭೀಕರತ್ವಂ ಹಯಾನನತ್ವಾತ್ಪರಿಹಾಸ್ಯತಾಂ ಚ .. 19-3..

ಜಾತಃ ಪುನರ್ದಾಶರಥಿಶ್ಚ ದುಃಖಾದ್ದುಃಖಂ ಗತೋಽಹಂ ವಿಪಿನಾಂತಚಾರೀ .
ರಾಜ್ಯಂ ಚ ನಷ್ಟಂ ದಯಿತಾ ಹೃತಾ ಮೇ ಪಿತಾ ಮೃತೋ ಹಾ ಪ್ಲವಗಾಃ ಸಹಾಯಾಃ .. 19-4..

ಕೃತ್ವಾ ರಣಂ ಭೀಮಮರಿಂ ನಿಹತ್ಯ ಪತ್ನೀಂ ಚ ರಾಜ್ಯಂ ಚ ಪುನರ್ಗೃಹೀತ್ವಾ .
ದುಷ್ಟಾಪವಾದೇನ ಪತಿವ್ರತಾಂ ತಾಂ ವಿಹಾಯ ಹಾ ದುರ್ಯಶಸಾಽಭಿಷಿಕ್ತಃ .. 19-5..

ಯದಿ ಸ್ವತಂತ್ರೋಽಸ್ಮಿ ಮಮೈವಮಾರ್ತಿರ್ನ ಸ್ಯಾದ್ವಯಂ ಕರ್ಮಕಲಾಪಬದ್ಧಾಃ .
ಸದಾಽಪಿ ಮಾಯವಶಗಾಸ್ತತೋಽತ್ರ ಮಾಯಾಧಿನಾಥಾಂ ಶರಣಂ ವ್ರಜಾಮಃ .. 19-6..

ಇತೀರಿತೈರ್ಭಕ್ತಿವಿನಮ್ರಶೀರ್ಷೈರ್ನಿಮೀಲಿತಾಕ್ಷೈರ್ವಿಬುಧೈಃ ಸ್ಮೃತಾ ತ್ವಂ .
ಪ್ರಭಾತಸಂಧ್ಯೇವ ಜಪಾಸುಮಾಂಗೀ ತಮೋನಿಹಂತ್ರೀ ಚ ಪುರಃ ಸ್ಥಿತಾಽಽತ್ಥ .. 19-7..

ಜಾನೇ ದಶಾಂ ವೋ ವಸುದೇವಪುತ್ರೋ ಭೂತ್ವಾ ಹರಿರ್ದುಷ್ಟಜನಾನ್ ನಿಹಂತಾ .
ತದರ್ಥಶಕ್ತೀರಹಮಸ್ಯ ದದ್ಯಾಮಂಶೇನ ಜಾಯೇಯ ಚ ನಂದಪುತ್ರೀ .. 19-8..

ಯೂಯಂ ಚ ಸಾಹಾಯ್ಯಮಮುಷ್ಯ ಕರ್ತುಮಂಶೇನ ದೇವಾ ದಯಿತಾಸಮೇತಾಃ .
ಜಾಯೇಧ್ವಮುರ್ವ್ಯಾಂ ಜಗತೋಽಸ್ತು ಭದ್ರಮೇವಂ ವಿನಿರ್ದಿಶ್ಯ ತಿರೋದಧಾಥ .. 19-9..

ವಿಚಿತ್ರದುಷ್ಟಾಸುರಭಾವಭಾರನಿಪೀಡಿತಂ ಮೇ ಹೃದಯಂ ಮಹೇಶಿ .
ಅತ್ರಾವತೀರ್ಯೇದಮಪಾಕುರು ತ್ವಂ ಮಾತಾ ಹಿ ಮೇ ತೇ ವರದೇ ನಮೋಽಸ್ತು .. 19-10..