30 ത്രിംശദശകഃ - ശ്രീപാർവത്യവതാരഃ https://youtu.be/JLhgYVLiwx8

https://youtu.be/aspUWupH-Q0https://youtu.be/aspUWupH-Q0

 

30 ത്രിംശദശകഃ  -    ശ്രീപാർവത്യവതാരഃ
സമാധിമഗ്നേ ഗിരിശേ വിരിഞ്ചാത്തപഃപ്രസന്നാത്കില താരകാഖ്യഃ .
ദൈത്യോ വരം പ്രാപ്യ വിജിത്യ ദേവാൻ സബാന്ധവഃ സ്വർഗസുഖാന്യഭുങ്ക്ത 1 ..

വരൈഃ സ ഭർഗൗരസപുത്രമാത്രവധ്യത്വമാപ്തോഽസ്യ ച പത്ന്യഭാവാത് .
സർവാധിപത്യം സ്വബലം ച മോഹാന്മത്തോ ഭൃശം ശാശ്വതമേവ മേനേ .. 30-2..

നഷ്ടാഖിലാഃ ശ്രീഹരയേ സുരാസ്തേ നിവേദയാമാസുരശേഷദുഃഖം .
സ ചാഹ ദേവാ അനയേന നൂനമുപേക്ഷതേ നോ ജനനീ കൃപാർദ്രാ .. 30-3..

തദ്വിസ്മൃതേർജാതമിദം കരേണ യഷ്ട്യാ ച യാ താഡയതി സ്വപുത്രം .
താമേവ ബാലഃ സ നിജേഷ്ടദാത്രീം സാസ്രം രുദന്മാതരമഭ്യുപൈതി .. 30-4..

മാതാ ഹി നഃ ശക്തിരിമാം പ്രസന്നാം കുര്യാമ ഭക്ത്യാ തപസാ ച ശീഘ്രം .
സർവാപദഃ സൈവ ഹരിഷ്യതീതി ശ്രുത്വാമരാസ്ത്വാം നുനുവുർമഹേശി .. 30-5..

നിശമ്യ തേഷാം ശ്രുതിവാക്യഗർഭസ്തുതിം പ്രസന്നാ വിബുധാംസ്ത്വമാത്ഥ .
അലം വിഷാദേന സുരാഃ സമസ്തം ജാനേ ഹരിഷ്യാമി ഭയം ദ്രുതം വഃ .. 30-6..

ഹിമാദ്രിപുത്രീ വിബുധാസ്തദർഥം ജായേത ഗൗരീ മമ ശക്തിരേകാ .
സാ ച പ്രദേയാ വൃഷഭധ്വജായ തയോഃ സുതസ്തം ദിതിജം ച ഹന്യാത് .. 30-7..

ഇത്ഥം നിശമ്യാസ്തഭയേഷു ദേവേഷ്വഭ്യർഥിതാ ദേവി ഹിമാചലേന .
ത്വം വർണയന്തീ നിജതത്ത്വമേഭ്യഃ പ്രദർശയാമാസിഥ വിശ്വരൂപം .. 30-8..

സഹസ്രശീർഷം ച സഹസ്രവക്ത്രം സഹസ്രകർണം ച സഹസ്രനേത്രം .
സഹസ്രഹസ്തം ച സഹസ്രപാദമനേകവിദ്യുത്പ്രഭമുജ്ജ്വലം ച .. 30-9..

ദൃഷ്ട്വേദമീശ്വര്യഖിലൈർഭിയോക്താ ത്വം ചോപസംഹൃത്യ വിരാട്സ്വരൂപം .
കൃപാവതീ സ്മേരമുഖീ പുനശ്ച നിവൃത്തിമാർഗം ഗിരയേ ന്യഗാദീഃ .. 30-10..

ഉക്ത്വാഽഖിലം സംസൃതിമുക്തിമാർഗം സുരേഷു പശ്യത്സു തിരോദധാഥ .
ശ്രുത്വാഽദ്രിമുഖ്യാസ്തവ ഗീതമുച്ചൈർദേവാ ജപധ്യാനപരാ ബഭൂവുഃ .. 30-11..

അഥൈകദാ പ്രാദുരഭൂദ്ധിമാദ്രൗ ശാക്തം മഹോ ദക്ഷഗൃഹേ യഥാ പ്രാക് .
ക്രമേണ തദ്ദേവി ബഭൂവ കന്യാ സാ പാർവതീതി പ്രഥിതാ ജഗത്സു .. 30-12..

ഹിമാദ്രിണൈഷാ ച ഹരായ ദത്താ തയോഃ സുതഃ സ്കന്ദ ഇതി പ്രസിദ്ധഃ .
സ താരകാഖ്യം ദിതിജം നിഹത്യ രരക്ഷ ലോകാനഖിലാൻ മഹേശി .. 30-13..

ദുർവാസസഃ ശാപബലേന ശക്രോ നഷ്ടാഖിലശ്രീർവചനേന വിഷ്ണോഃ .
ക്ഷീരോദധിം സാസുരദേവസംഘോ മമന്ഥ തസ്മാദുദഭൂച്ച ലക്ഷ്മീഃ .. 30-14..

യാ പൂജിതേന്ദ്രേണ രമാ തവൈകാ ശക്തിഃ സ്വരൈശ്വര്യപുനഃപ്രദാനാത് .
ശാപാന്മുനേർദേവഗണാന്വിമോച്യ കടാക്ഷതസ്തേ ഹരിമാപ ഭൂയഃ .. 30-15..

ത്വം സർവശക്തിർന ജിതാഽസി കേനാപ്യന്യാൻ ജയസ്യേവ സദാ ശരണ്യാ .
മാതേവ പത്നീവ സുതേവ വാ ത്വം വിഭാസി ഭക്തസ്യ നമോ നമസ്തേ .. 30-16..