https://youtu.be/2eemhJHrOHY
24 ചതുർവിംശദശകഃ - മഹിഷാസുരവധം - ദേവീസ്തുതിഃ
ദേവി ത്വയാ ബാഷ്കലദുർമുഖാദിദൈത്യേഷു വീരേഷു രണേ ഹതേഷു .
സദ്വാക്യതസ്ത്വാമനുനേതുകാമോ മോഘപ്രയത്നോ മഹിഷശ്ചുകോപ .. 24-1..
ത്വാം കാമരൂപഃ ഖുരപുച്ഛശൃംഗൈർനാനാസ്ത്രശസ്ത്രൈശ്ച ഭൃശം പ്രഹർതാ .
ഗർജൻ വിനിന്ദൻ പ്രഹസൻ ധരിത്രീം പ്രകമ്പയംശ്ചാസുരരാഡ്യുയോധ .. 24-2..
ജപാരുണാക്ഷീ മധുപാനതുഷ്ടാ ത്വം ചാരിണാഽരേർമഹിഷസ്യ കണ്ഠം .
ഛിത്വാ ശിരോ ഭൂമിതലേ നിപാത്യ രണാംഗണസ്ഥാ വിബുധൈഃ സ്തുതാഽഭൂഃ .. 24-3..
മാതസ്ത്വയാ നോ വിപദോ നിരസ്താ അശക്യമന്യൈരിദമദ്ഭുതാംഗി .
ബ്രഹ്മാണ്ഡസർഗസ്ഥിതിനാശകർത്രീം കസ്ത്വാം ജയേത് കേന കഥം കുതോ വാ .. 24-4..
വിദ്യാസ്വരൂപാഽസി മഹേശി യസ്മിൻ സ വൈ പരേഷാം സുഖദഃ കവിശ്ച .
ത്വം വർതസേ യത്ര സദാഽപ്യവിദ്യാസ്വരൂപിണീ സ ത്വധമഃ പശുഃ സ്യാത് .. 24-5..
കൃപാകടാക്ഷാസ്തവ ദേവി യസ്മിൻ പതന്തി തസ്യാത്മജവിത്തദാരാഃ .
യച്ഛന്തി സൗഖ്യം ന പതന്തി യസ്മിൻ ത ഏവ ദുഃഖം ദദതേഽസ്യ നൂനം .. 24-6..
പശ്യാമ നിത്യം തവ രൂപമേതത്കഥാശ്ച നാമാനി ച കീർതയാമ .
നമാമ മൂർധ്നാ പദപങ്കജേ തേ സ്മരാമ കാരുണ്യമഹാപ്രവാഹം .. 24-7..
ത്വമേവ മാതാഽസി ദിവൗകസാം നോ നാന്യാ ദ്വിതീയാ ഹിതദാനദക്ഷാ .
അന്യേ സുതാ വാ തവ സന്തി നോ വാ ന രക്ഷിതാ നസ്ത്വദൃതേ മഹേശി .. 24-8..
ക്വ ത്വം വയം ക്വേതി വിചിന്ത്യ സർവം ക്ഷമസ്വ നോ ദേവ്യപരാധജാലം .
യദാ യദാ നോ വിപദോ ഭവന്തി തദാ തദാ പാലയ പാലയാസ്മാൻ .. 24-9..
ഇതി സ്തുവത്സു ത്രിദശേഷു സദ്യഃ കൃപാശ്രുനേത്രൈവ തിരോദധാഥ .
തതോ ജഗദ്ദേവി വിഭൂതിപൂർണം ബഭൂവ ധർമിഷ്ഠസമസ്തജീവം .. 24-10..
ത്വാം സംസ്മരേയം ന ച വാ സ്മരേയം വിപത്സു മാ വിസ്മര മാം വിമൂഢം .
രുദൻ ബിഡാലാർഭകവന്ന കിഞ്ചിച്ഛക്നോമി കർതും ശുഭദേ നമസ്തേ .. 24-11..
