22 ದ್ವಾವಿಂಶದಶಕಃ - ಕೃಷ್ಣಕಥಾ KANNADA NARRATI0N Pr0fManjula Bharadwaj ST0RY@5G

 

https://www.youtube.com/watch?v=0mlBsNMAAJ8
22 ದ್ವಾವಿಂಶದಶಕಃ  -    ಕೃಷ್ಣಕಥಾ  
ಶ್ರಿಯಃಪತಿರ್ಗೋಮಲಮೂತ್ರಗಂಧಿನ್ಯಸ್ತಪ್ರಭೋ ಗೋಪಕುಲೇ ವಿಷಣ್ಣಃ .
ಕೃಷ್ಣಾಭಿಧೋ ವತ್ಸಬಕಾದಿಭೀತೋ ರುದನ್ ಸದಾ ದೇವೀ ನಿನಾಯ ಬಾಲ್ಯಂ .. 22-1..

ಹೈಯಂಗವೀನಂ ಮಥಿತಂ ಪಯಶ್ಚ ಗೋಪೀರ್ವಿಲಜ್ಜಃ ಸತತಂ ಯಯಾಚೇ .
ಸ ಚಾಂಬಯಾ ಗೋರಸಚೌರ್ಯಚುಂಚುರುಲೂಖಲೇ ಪಾಶವರೇಣ ಬದ್ಧಃ .. 22-2..

ವನೇಷು ಭೀಮಾತಪಶುಷ್ಕಗಾತ್ರೋ ಗಾಶ್ಚಾರಯನ್ ಕಂಟಕವಿದ್ಧಪಾದಃ .
ವನ್ಯಾಂಬುಪಾಯೀ ಫಲಮೂಲಭಕ್ಷೀ ದಿನೇ ದಿನೇ ಗ್ಲಾನಿಮವಾಪ ಕೃಷ್ಣಃ .. 22-3..

ದೈವೇನ ಮುಕ್ತಃ ಸ ಚ ಗೋಪದಾಸ್ಯಾದಕ್ರೂರನೀತೋ ಮಥುರಾಂ ಪ್ರವಿಷ್ಟಃ .
ಕಂಸಂ ನಿಹತ್ಯಾಪಿ ಹತಾಭಿಲಾಷಸ್ತತ್ರೋಗ್ರಸೇನಸ್ಯ ಬಭೂವ ದಾಸಃ .. 22-4..

ದೃಷ್ಟ್ವಾ ಜರಾಸಂಧಚಮೂಂ ಭಯೇನ ಸ ಬಂಧುಮಿತ್ರೋ ಮಥುರಾಂ ವಿಹಾಯ .
ಧಾವನ್ ಕಥಂಚಿದ್ಬಹುದುರ್ಗಮಾರ್ತಃ ಸ ದ್ವಾರಕಾದ್ವೀಪಪುರಂ ವಿವೇಶ .. 22-5..

ಸ ರುಕ್ಮಿಣೀಂ ಜಾಂಬವತೀಂ ಚ ಭಾಮಾಂ ಕನ್ಯಾಸ್ತಥಾ ದ್ವ್ಯಷ್ಟಸಹಸ್ರಮನ್ಯಾಃ .
ಸಮುದ್ವಹನ್ ಸಸ್ಮಿತನರ್ಮಲಾಪಃ ಕ್ರೀಡಾಮೃಗೋಽಭೂತ್ಸತತಂ ವಧೂನಾಂ .. 22-6..

ಸ ದಸ್ಯುವೃತ್ತಿಸ್ತ್ರಿದಿವಾಜ್ಜಹಾರ ಭಾಮಾನಿಯುಕ್ತಃ ಸುರಪಾರಿಜಾತಂ .
ಸತ್ಯಾ ಚ ತಂ ಗೋವೃಷವತ್ಸರೋಷಂ ಬದ್ಧ್ವಾ ತರೌ ದುರ್ವಚಸಾಽಭ್ಯಷಿಂಚತ್ .. 22-7..

ಶ್ರೀನಾರದಾಯಾತಿಥಯೇ ತಯಾ ಸ ದತ್ತೋಥ ಮುಕ್ತೋ ಮುನಿನಾ ಚ ನೀತಃ .
ತತಸ್ತಯಾಽಸ್ಮೈ ಕನಕಂ ಪ್ರದಾಯ ಪುನರ್ಗೃಹೀತಸ್ತ್ರಪಯಾಽಽಪ ಮೌನಂ .. 22-8..

ಸೂತೀಗೃಹಾದ್ಭೀಷ್ಮಕಜಾಸುತೇ ಸ ಪ್ರದ್ಯುಮ್ನನಾಮ್ನೀಶ್ವರಿ ಶಂಬರೇಣ .
ಹೃತೇ ಶಿಶೌ ನಿರ್ಮಥಿತಾಭಿಮಾನ ಉಚ್ಚೈ ರುದಂಸ್ತ್ವಾಂ ಶರಣಂ ಪ್ರಪನ್ನಃ .. 22-9..

ಪುತ್ರಾರ್ಥಿನೀಂ ಜಾಂಬವತೀಮಪುತ್ರಾಂ ಸ ತೋಷಯಿಷ್ಯನ್ನುಪಮನ್ಯುಶಿಷ್ಯಃ .
ಮುಂಡೀ ಚ ದಂಡೀ ಚ ಶಿವಸ್ಯ ಶೈಲೇ ಮಂತ್ರಂ ಜಪನ್ ಘೋರತಪಶ್ಚಕಾರ .. 22-10..

ವರೇಣ ಭರ್ಗಸ್ಯ ದಶಾತ್ಮಜಾನ್ ಸಾ ಪ್ರಾಸೂತ ಸರ್ವಾ ದಯಿತಾಶ್ಚ ಶೌರೇಃ .
ತಥೈವ ಲಬ್ಧ್ವಾ ಸ ಸುತಾಯುತಾನಿ ಸುಖಂ ನ ಲೇಭೇ ನಿಜಕರ್ಮದೋಷಾತ್ .. 22-11..

ಶಾಪಾದೃಷೀಣಾಂ ಧೃತರಾಷ್ಟ್ರಪತ್ನ್ಯಾಶ್ಚಾನ್ಯೋನ್ಯವೈರೇಣ ಕೃತಾಹವೇಷು .
ಸರ್ವೇ ಹತಾ ಹಂತ ಕುಲಂ ಯದೂನಾಂ ಮಹತ್ಪ್ರದಗ್ಧಂ ವನಮಗ್ನಿನೇವ .. 22-12..

ವ್ಯಾಧೇಷುವಿದ್ಧೋ ಮೃತಿಮಾಪ ಕೃಷ್ಣಃ ಕುಶಸ್ಥಲೀ ಚಾಬ್ಧಿಜಲಾಪ್ಲುತಾಽಭೂತ್ .
ಹಾ ಜಹ್ರಿರೇ ದಸ್ಯುಭಿರೇನಸಾಽಷ್ಟಾವಕ್ರಸ್ಯ ಶಾಪೇನ ಯದುಸ್ತ್ರಿಯಶ್ಚ .. 22-13..

ಏವಂ ಹರಿಃ ಕರ್ಮಫಲಾನ್ಯಭುಂಕ್ತ ನ ಕೋಽಪಿ ಮುಚ್ಯೇತ ಚ ಕರ್ಮಬಂಧಾತ್ .
ದುಃಖಂ ತ್ವಭಕ್ತಸ್ಯ ಸುದುಸ್ಸಹಂ ಸ್ಯಾದ್ಭಕ್ತಸ್ಯ ತೇ ತತ್ಸುಸಹಂ ಭವೇಚ್ಚ .. 22-14..

ಜಾನಾಸ್ಯಹಂ ತೇ ಪದಯೋರಭಕ್ತೋ ಭಕ್ತೋ ನು ಕಿಂ ವೇತಿ ನ ಚೈವ ಜಾನೇ .
ತ್ವಂ ಸರ್ವಶಕ್ತಾ ಕುರು ಮಾಂ ಸುಶಕ್ತಂ ಸರ್ವತ್ರ ಭೂಯೋಽಪಿ ಶಿವೇ ನಮಸ್ತೇ .. 22-15..