38 ಅಷ್ಟಾತ್ರಿಂಶದಶಕಃ - ಚಿತ್ತಶುದ್ಧಿಪ್ರಾಧಾನ್ಯಂ

 

38 ಅಷ್ಟಾತ್ರಿಂಶದಶಕಃ -    ಚಿತ್ತಶುದ್ಧಿಪ್ರಾಧಾನ್ಯಂ

ಅಂತರ್ಮುಖೋ ಯಃ ಸ್ವಶುಭೇಚ್ಛಯೈವ ಸ್ವಯಂ ವಿಮರ್ಶೇನ ಮನೋಮಲಾನಿ .
ದೃಷ್ಟ್ವಾ ಶಮಾದ್ಯೈರ್ಧುನುತೇ ಸಮೂಲಂ ಸ ಭಾಗ್ಯವಾಂದೇವಿ ತವ ಪ್ರಿಯಶ್ಚ .. 38-1..

ನ ವೇದಶಾಸ್ತ್ರಾಧ್ಯಯನೇನ ತೀರ್ಥಸಂಸೇವಯಾ ದಾನತಪೋವ್ರತೈರ್ವಾ .
ಶುದ್ಧಿಂ ಮನೋ ಯಾತಿ ತವ ಸ್ಮೃತೇಸ್ತದ್ವೈಶದ್ಯಮಾದರ್ಶವದೇತಿ ಮಾತಃ .. 38-2..

ಶುದ್ಧಿರ್ನ ಯಜ್ಞೇನ ಯಜನ್ ಶಶಾಂಕಃ ಪತ್ನೀಂ ಗುರೋಃ ಪ್ರಾಪ ಭೃಶಂ ಸ್ಮರಾರ್ತಃ .
ಶತಕ್ರತುರ್ಗೌತಮಧರ್ಮಪತ್ನೀಮಗಾದಹಲ್ಯಾಂ ಮದನೇಷು ವಿದ್ಧಃ .. 38-3..

ಸ ವಿಘ್ನಕಾರೀ ತಪಸಾಂ ಮುನೀನಾಂ ಗತಸ್ಪೃಹಂ ಯೋಗಿವರಂ ಪ್ರಶಾಂತಂ .
ಹಾ ವಿಶ್ವರೂಪಂ ಪವಿನಾ ಜಘಾನ ನ ಕಿಂಚನಾಕಾರ್ಯಮಧರ್ಮಬುದ್ಧೇಃ .. 38-4..

ಮುನಿರ್ವಸಿಷ್ಠಃ ಖಲು ತೀರ್ಥಸೇವೀ ತಪೋನಿಧಿರ್ಗಾಧಿಸುತಶ್ಚ ಕೋಪಾತ್ .
ಉಭೌ ಮಿಥಃ ಶೇಪತುರಾಡಿಭಾವಂ ಪ್ರಾಪ್ತಃ ಕಿಲೈಕೋ ಬಕತಾಂ ಪರಶ್ಚ .. 38-5..

ಧನಾನಿ ಪೃಷ್ಟಾನಿ ಗುರೂನದಾತೄನ್ ಸ್ವಾನ್ ಭಾರ್ಗವಾನ್ ಪುತ್ರಕಲತ್ರಭಾಜಃ .
ಕ್ರುದ್ಧಾಃ ಪರಂ ಹೈಹಯಭೂಮಿಪಾಲಾ ನ್ಯಪೀಡಯನ್ ಕೋಽತ್ರ ವಿಶುದ್ಧಚಿತ್ತಃ .. 38-6..

ಕುರ್ಯಾನ್ನ ಕಿಂ ಲೋಭಹತೋ ಮನುಷ್ಯೋ ಯುಧಿಷ್ಠಿರಾದ್ಯಾ ಅಪಿ ಧರ್ಮನಿಷ್ಠಾಃ .
ಪಿತಾಮಹಂ ಬಂಧುಜನಾನ್ ಗುರೂಂಶ್ಚ ರಣೇ ನಿಜಘ್ನುಃ ಖಲು ರಾಜ್ಯಲೋಭಾತ್ .. 38-7..

ಕೃಷ್ಣೋಪದಿಷ್ಟೋ ಜನಮೇಜಯಸ್ತು ಶುದ್ಧಾಂತರಂಗಃ ಪಿತರಂ ಮಖೇನ .
ಪರೀಕ್ಷಿತಂ ಪಾಪವಿಮುಕ್ತಮಾರ್ಯಂ ವಿಧಾಯ ತೇ ಪ್ರಾಪಯತಿಸ್ಮ ಲೋಕಂ .. 38-8..

ಸದಾ ಸದಾಚಾರರತೋ ವಿವಿಕ್ತೇ ದೇಶೇ ನಿಷಣ್ಣಶ್ಚರಣಾಂಬುಜೇ ತೇ .
ಧ್ಯಾಯನ್ನಜಸ್ರಂ ನಿಜವಾಸನಾ ಯೋ ನಿರ್ಮಾರ್ಷ್ಟಿ ಸ ತ್ವನ್ಮಯತಾಮುಪೈತಿ .. 38-9..

ಜ್ಞಾನಂ ನ ಭಕ್ತಿರ್ನ ತಪೋ ನ ಯೋಗಬುದ್ಧಿರ್ನ ಮೇ ಚಿತ್ತಜಯೋಽಪಿ ಮಾತಃ .
ಅಂಧಂ ತಮೋಽಹಂ ಪ್ರವಿಶಾಮಿ ಮೃತ್ಯೋಃ ಸಮುದ್ಧರೇಮಂ ವರದೇ ನಮಸ್ತೇ .. 38-10..