23 ത്രയോവിംശദശകഃ - മഹാലക്ഷ്മ്യവതാരഃ DASAKAM23 MALAYALAM STORY@5G read by Swaminathan N

https://youtu.be/vY_D-J_0lDU 

23 ത്രയോവിംശദശകഃ - മഹാലക്ഷ്മ്യവതാരഃ

രംഭസ്യ പുത്രോ മഹിഷാസുരഃ പ്രാക് തീവ്രൈസ്തപോഭിർദ്രുഹിണാത്പ്രസന്നാത് .
അവധ്യതാം പുംഭിരവാപ്യ ധൃഷ്ടോ ന മേ മൃതിഃ സ്യാദിതി ച വ്യചിന്തീത് .. 23-1..

സ ചിക്ഷുരാദ്യൈരസുരൈഃ സമേതഃ ശക്രാദിദേവാന്യുധി പദ്മജം ച .
രുദ്രം ച വിഷ്ണും ച വിജിത്യ നാകേ വസൻ ബലാദ്യജ്ഞഹവിർജഹാര .. 23-2..

ചിരം ഭൃശം ദൈത്യനിപീഡിതാസ്തേ ദേവാഃ സമം പദ്മജശങ്കരാഭ്യാം .
ഹരിം സമേത്യാസുരദൗഷ്ട്യമൂചൂസ്ത്വാം സംസ്മരൻ ദേവി മുരാരിരാഹ .. 23-3..

സുരാ വയം തേന രണേഽതിഘോരേ പരാജിതാ ദൈത്യവരോ ബലിഷ്ഠഃ .
മത്തോ ഭൃശം പുംഭിരവധ്യഭാവാന്ന നഃ സ്ത്രിയോ യുദ്ധവിചക്ഷണാശ്ച .. 23-4..

തേജോഭിരേകാ ഭവതീഹ നശ്ചേത്സൈവാസുരാൻ ഭീമബലാന്നിഹന്താ .
യഥാ ഭവത്യേതദരം തഥൈവ സമ്പ്രാർഥയാമോഽവതു നോ മഹേശീ .. 23-5..

ഏവം ഹരൗ വക്തരി പദ്മജാതാത്തേജോഽഭവദ്രാജസരക്തവർണം .
ശിവാദഭൂത്താമസരൗപ്യവർണം നീലപ്രഭം സാത്ത്വികമച്യുതാച്ച .. 23-6..

തേജാംസ്യഭൂവൻ വിവിധാനി ശക്രമുഖാമരേഭ്യോ മിഷതോഽഖിലസ്യ .
സമ്യോഗതസ്താന്യചിരേണ മാതഃ സ്ത്രീരൂപമഷ്ടാദശഹസ്തമാപുഃ .. 23-7..

തത്തു ത്വമാസീഃ ശുഭദേ മഹാലക്ഷ്മ്യാഖ്യാ ജഗന്മോഹനമോഹനാംഗീ .
ത്വം ഹ്യേവ ഭക്താഭയദാനദക്ഷാ ഭക്തദ്രുഹാം ഭീതികരീ ച ദേവി .. 23-8..

സദ്യസ്ത്വമുച്ചൈശ്ചകൃഷേഽട്ടഹാസം സുരാഃ പ്രഹൃഷ്ടാ വസുധാ ചകമ്പേ .
ചുക്ഷോഭ സിന്ധുർഗിരയോ വിചേലുർദൈത്യശ്ച മത്തോ മഹിഷശ്ചുകോപ .. 23-9..

ത്വാം സുന്ദരീം ചാരമുഖാത് സ ദൈത്യോ വിജ്ഞായ കാമീ വിസസർജ ദൂതം .
സ ചേശ്വരീം ദൈത്യഗുണാൻ പ്രവക്താ ത്വാം നേതുകാമോ വിഫലോദ്യമോഽഭൂത് .. 23-10..

പ്രലോഭനൈസ്ത്വാമഥ ദേവശക്തിം ജ്ഞാത്വാഽപി വാക്യൈരനുനേതുകാമഃ .
ഏകൈകശഃ പ്രേഷയതിസ്മ ദൂതാൻ ത്വാം കാമിനീം കർതുമിമേ ന ശേകുഃ .. 23-11..

അവേഹി മാം പുച്ഛവിഷാണഹീനം ഭാരം വഹന്തം മഹിഷം ദ്വിപാദം .
ഹിംസന്തി മാം സ്വർഥിജനാസ്ത്വമേവ രക്ഷാകരീ മേ ശുഭദേ നമസ്തേ .. 23-12..