32st0ry@5G ദ്വാത്രിംശദശകഃ - യക്ഷകഥാ

https://youtu.be/MxlSrzDJeZ8

 

32 ദ്വാത്രിംശദശകഃ  -    യക്ഷകഥാ
പുരാ സുരാ വർഷശതം രണേഷു നിരന്തരേഷു ത്വദനുഗ്രഹേണ .
വിജിത്യ ദൈത്യാൻ ജനനീമപി ത്വാം വിസ്മൃത്യ ദൃപ്താ നിതരാം ബഭൂവുഃ .. 32-1..

മയൈവ ദൈത്യാ ബലവത്തരേണ ഹതാ ന ചാന്യൈരിതി ശക്രമുഖ്യാഃ .
ദേവാ അഭൂവന്നതിദർപവന്തസ്ത്വം ദേവി ചാന്തഃ കുരുഷേ സ്മ ഹാസം .. 32-2..

തച്ചിത്തദർപാസുരനാശനായ തേജോമയം യക്ഷവപുർദധാനാ .
ത്വം നാതിദൂരേ സ്വയമാവിരാസീസ്ത്വാം വാസവാദ്യാ ദദൃശുഃ സുരൗഘാഃ .. 32-3..

സദ്യഃ കിലാശങ്ക്യത തൈരിദം കിം മായാഽഽസുരീ വേതി തതോ മഘോനാ .
അഗ്നിർനിയുക്തോ ഭവതീമവാപ്തഃ പൃഷ്ടസ്ത്വയാ കോഽസി കുതോഽസി ചേതി .. 32-4..

സ ചാഹ സർവൈർവിദിതോഽഗ്നിരസ്മി മയ്യേവ തിഷ്ഠത്യഖിലം ജഗച്ച .
ശക്നോമി ദഗ്ധും സകലം ഹവിർഭുങ്മദ്വീര്യതോ ദൈത്യഗണാ ജിതാശ്ച .. 32-5..

ഇതീരിതാ ശുഷ്കതൃണം ത്വമേകം പുരോ നിധായാത്ഥ ദഹൈതദാശു .
ഏവം ജ്വലന്നഗ്നിരിദം ച ദഗ്ധും കുർവൻ പ്രയത്നം ന ശശാക മത്തഃ .. 32-6..

സ നഷ്ടഗർവഃ സഹസാ നിവൃത്തസ്തതോഽനിലോ വജ്രഭൃതാ നിയുക്തഃ .
ത്വാം പ്രാപ്തവാനഗ്നിവദേവ പൃഷ്ടോ ദേവി സ്വമാഹാത്മ്യവചോ ബഭാഷേ .. 32-7..

മാം മാതരിശ്വാനമവേഹി സർവേ വ്യാപാരവന്തോ ഹി മയൈവ ജീവാഃ .
ന പ്രാണിനഃ സന്തി മയാ വിനാ ച ഗൃഹ്ണാമി സർവം ചലയാമി വിശ്വം .. 32-8..

ഇത്യുക്തമാകർണ്യ തൃണം തദേവ പ്രദർശ്യ ചൈതച്ചലയേത്യഭാണീഃ .
പ്രഭഞ്ജനസ്തത്സ ച കർമ കർതുമശക്ത ഏവാസ്തമദോ നിവൃത്തഃ .. 32-9..

അഥാതിമാനീ ശതമന്യുരന്തരഗ്നിം ച വായും ച ഹസന്നവാപ .
ത്വാം യക്ഷരൂപാം സഹസാ തിരോഽഭൂഃ സോഽദഹ്യതാന്തഃ സ്വലഘുത്വഭീത്യാ .. 32-10..

അഥ ശ്രുതാകാശവചോഽനുസാരീ ഹ്രീങ്കാരമന്ത്രം സ ചിരായ ജപ്ത്വാ .
പശ്യന്നുമാം ത്വാം കരുണാശ്രുനേത്രാം നനാമ ഭക്ത്യാ ശിഥിലാഭിമാനഃ .. 32-11..

ജ്ഞാനം പരം ത്വന്മുഖതഃ സ ലബ്ധ്വാ കൃതാഞ്ജലിർനമ്രശിരാ നിവൃത്തഃ .
സർവാമരേഭ്യഃ പ്രദദൗ തതസ്തേ സർവം ത്വദിച്ഛാവശഗം വ്യജാനൻ .. 32-12..

തതഃ സുരാ ദംഭവിമുക്തിമാപുർഭവന്തു മർത്യാശ്ച വിനമ്രശീർഷാഃ .
അന്യോന്യസാഹായ്യകരാശ്ച സർവേ മാ യുദ്ധവാർതാ ഭുവനത്രയേഽസ്തു .. 32-13..

ത്വദിച്ഛയാ സൂര്യശശാങ്കവഹ്നിവായ്വാദയോ ദേവി സുരാഃ സ്വകാനി .
കർമാണി കുർവന്തി ന തേ സ്വതന്ത്രാസ്തസ്യൈ നമസ്തേഽസ്തു മഹാനുഭാവേ .. 32-14..