35 ಪಂಚತ್ರಿಂಶದಶಕಃ - ಅನುಗ್ರಹವೈಚಿತ್ರ್ಯಂ

 https://youtu.be/vVqp4qFCPfw

35 ಪಂಚತ್ರಿಂಶದಶಕಃ -    ಅನುಗ್ರಹವೈಚಿತ್ರ್ಯಂ
ಭಾಗ್ಯೋದಯೇ ತ್ರೀಣಿ ಭವಂತಿ ನೂನಂ ಮನುಷ್ಯತಾ ಸಜ್ಜನಸಂಗಮಶ್ಚ .
ತ್ವದೀಯಮಾಹಾತ್ಮ್ಯಕಥಾಶ್ರುತಿಶ್ಚ ಯತಃ ಪುಮಾಂಸ್ತ್ವತ್ಪದಭಕ್ತಿಮೇತಿ .. 35-1..

ತತಃ ಪ್ರಸೀದಸ್ಯಖಿಲಾರ್ಥಕಾಮಾನ್ ಭಕ್ತಸ್ಯ ಯಚ್ಛಸ್ಯಭಯಂ ಚ ಮಾತಃ .
ಕ್ಷಮಾಂ ಕೃತಾಗಸ್ಸು ಕರೋಷಿ ಚಾರ್ಯೋರನ್ಯೋನ್ಯವೈರಂ ಶಮಯಸ್ಯನೀಹಾ .. 35-2..

ದುಷ್ಕೀರ್ತಿಭೀತ್ಯಾ ಪೃಥಯಾ ಕುಮಾರ್ಯಾ ತ್ಯಕ್ತಂ ತಟಿನ್ಯಾಂ ಸುತಮರ್ಕಲಬ್ಧಂ .
ಸಂಪ್ರಾರ್ಥಿತಾ ತ್ವಂ ಪರಿಪಾಲಯಂತೀ ಪ್ರಾದರ್ಶಯಃ ಸ್ವಂ ಕರುಣಾಪ್ರವಾಹಂ .. 35-3..

ಸುತಾನ್ ಕುರುಕ್ಷೇತ್ರರಣೇ ಹತಾನ್ ಸ್ವಾನ್ ದಿದೃಕ್ಷವೇ ಮಾತೃಗಣಾಯ ಕೃಷ್ಣಃ .
ಸಂಪ್ರಾರ್ಥಿತಸ್ತ್ವತ್ಕರುಣಾಭಿಷಿಕ್ತಃ ಪ್ರದರ್ಶ್ಯ ಸರ್ವಾನ್ ಸಮತೋಷಯಚ್ಚ .. 35-4..

ವಣಿಕ್ ಸುಶೀಲಃ ಖಲು ನಷ್ಟವಿತ್ತೋ ವ್ರತಂ ಚರನ್ ಪ್ರಾಙ್ನವರಾತ್ರಮಾರ್ಯಃ .
ತ್ವಾಂ ದೇವಿ ಸಂಪೂಜ್ಯ ದರಿದ್ರಭಾವಾನ್ಮುಕ್ತಃ ಕ್ರಮಾದ್ವಿತ್ತಸಮೃದ್ಧಿಮಾಪ .. 35-5..

ದೇವದ್ರುಹೋ ದೇವಿ ರಣೇ ತ್ವಯೈವ ದೈತ್ಯಾ ಹತಾ ಗರ್ಹಿತಧರ್ಮಶಾಸ್ತ್ರಾಃ .
ಪ್ರಹ್ಲಾದಮುಖ್ಯಾನಸುರಾನ್ ಸ್ವಭಕ್ತಾನ್ ದೇವಾಂಶ್ಚ ಸಂತ್ಯಕ್ತರಣಾನಕಾರ್ಷೀಃ .. 35-6..

ಪುರಂದರೇ ಪಾಪತಿರೋಹಿತೇ ತತ್ಸ್ಥಾನಾಧಿರೂಢಾನ್ನಹುಷಾತ್ಸ್ಮರಾರ್ತಾತ್ .
ಭೀತಾ ಶಚೀ ತ್ವಾಂ ಪರಿಪೂಜ್ಯ ದೃಷ್ಟ್ವಾ ಪತಿಂ ಕ್ರಮಾದ್ಭೀತಿವಿಮುಕ್ತಿಮಾಪ .. 35-7..

ಶಪ್ತೋ ವಸಿಷ್ಠೇನ ನಿಮಿರ್ವಿದೇಹೋ ಭೂತ್ವಾಽಪಿ ದೇವಿ ತ್ವದನುಗ್ರಹೇಣ .
ಜ್ಞಾನಂ ಪರಂ ಪ್ರಾಪ ನಿಮೇಃ ಪ್ರಯೋಗಾನ್ನಿಮೇಷಿಣೋ ಜೀವಗಣಾ ಭವಂತಿ .. 35-8..

ಹಾ ಭಾರ್ಗವಾ ಲೋಭವಿಕೋಪಚಿತ್ತೈಃ ಪ್ರಪೀಡಿತಾ ಹೈಹಯವಂಶಜಾತೈಃ .
ಹಿಮಾದ್ರಿಮಾಪ್ತಾ ಭವತೀಂ ಪ್ರಪೂಜ್ಯ ಪ್ರಸಾದ್ಯ ಭೀತೇಃ ಖಲು ಮುಕ್ತಿಮಾಪುಃ .. 35-9..

ದಸ್ರೌ ಯುವಾನಾಂ ಚ್ಯವನಂ ಪತಿಂ ಚ ಸಮಾನರೂಪಾನಭಿದೃಶ್ಯ ಮುಗ್ಧಾ .
ಸತೀ ಸುಕನ್ಯಾ ತವ ಸಂಸ್ಮೃತಾಯಾ ಭಕ್ತ್ಯಾ ಪ್ರಸಾದಾತ್ಸ್ವಪತಿಂ ವ್ಯಾಜಾನಾತ್ .. 35-10..

ಸತ್ಯವ್ರತೋ ವಿಪ್ರವಧೂಂ ಪ್ರಸಹ್ಯ ಹರ್ತಾ ನಿರಸ್ತೋ ಜನಕೇನ ರಾಜ್ಯಾತ್ .
ವಸಿಷ್ಠಶಪ್ತೋಽಪಿ ತವ ಪ್ರಸಾದಾದ್ರಾಜ್ಯೇಽಭಿಷಿಕ್ತೋಽಥ ದಿವಂ ಗತಶ್ಚ .. 35-11..

ಹಾ ಹಾ ಹರಿಶ್ಚಂದ್ರನೃಪೋ ವಿಪತ್ಸು ಮಗ್ನಃ ಶತಾಕ್ಷೀಂ ಪರದೇವತಾಂ ತ್ವಾಂ .
ಸಂಸ್ಮೃತ್ಯ ಸದ್ಯಃ ಸ್ವವಿಪನ್ನಿವೃತ್ತಃ ಕಾರುಣ್ಯತಸ್ತೇ ಸುರಲೋಕಮಾಪ .. 35-12..

ಅಗಸ್ತ್ಯಪೂಜಾಂ ಪರಿಗೃಹ್ಯ ದೇವಿ ವಿಭಾಸಿ ವಿಂಧ್ಯಾದ್ರಿನಿವಾಸಿನೀ ತ್ವಂ .
ದ್ರಕ್ಷ್ಯೇ ಕದಾ ತ್ವಾಂ ಮಮ ದೇಹಿ ಭಕ್ತಿಂ ಕಾರುಣ್ಯಮೂರ್ತ್ತೇ ಸತತಂ ನಮಸ್ತೇ .. 35-13..