41 ಏಕಚತ್ವಾರಿಂಶದಶಕಃ - ಪ್ರಣಾಮಂ dasakam 41devinarayaneeyam kannada,

41 ಏಕಚತ್ವಾರಿಂಶದಶಕಃ -    ಪ್ರಣಾಮಂ
ದೇವಿ ತ್ವದಾವಾಸ್ಯಮಿದಂ ನ ಕಿಂಚಿದ್ವಸ್ತು ತ್ವದನ್ಯದ್ಬಹುಧೇವ ಭಾಸಿ .
ದೇವಾಸುರಾಸೃಕ್ಪನರಾದಿರೂಪಾ ವಿಶ್ವಾತ್ಮಿಕೇ ತೇ ಸತತಂ ನಮೋಽಸ್ತು .. 41-1..

ನ ಜನ್ಮ ತೇ ಕರ್ಮ ಚ ದೇವಿ ಲೋಕಕ್ಷೇಮಾಯ ಜನ್ಮಾನಿ ದಧಾಸಿ ಮಾತಃ .
ಕರೋಷಿ ಕರ್ಮಾಣಿ ಚ ನಿಸ್ಪೃಹಾ ತ್ವಂ ಜಗದ್ವಿಧಾತ್ರ್ಯೈ ಸತತಂ ನಮಸ್ತೇ .. 41-2..

ತತ್ತ್ವತ್ಪದಂ ಯದ್ಧ್ರುವಮಾರುರುಕ್ಷುಃ ಪುಮಾನ್ ವ್ರತೀ ನಿಶ್ಚಲದೇಹಚಿತ್ತಃ .
ಕರೋತಿ ತೀವ್ರಾಣಿ ತಪಾಂಸಿ ಯೋಗೀ ತಸ್ಯೈ ನಮಸ್ತೇ ಜಗದಂಬಿಕಾಯೈ .. 41-3..

ತ್ವದಾಜ್ಞಯಾ ವಾತ್ಯನಿಲೋಽನಲಶ್ಚ ಜ್ವಲತ್ಯುದೇತಿ ದ್ಯುಮಣಿಃ ಶಶೀ ಚ .
ನಿಜೈರ್ನಿಜೈಃ ಕರ್ಮಭಿರೇವ ಸರ್ವೇ ತ್ವಾಂ ಪೂಜಯಂತೇ ವರದೇ ನಮಸ್ತೇ .. 41-4..

ಭಕ್ತಿರ್ನ ವಂಧ್ಯಾ ಯತ ಏವ ದೇವಿ ರಾಗಾದಿರೋಗಾಭಿಭವಾದ್ವಿಮುಕ್ತಾಃ .
ಮರ್ತ್ತ್ಯಾದಯಸ್ತ್ವತ್ಪದಮಾಪ್ನುವಂತಿ ತಸ್ಯೈ ನಮಸ್ತೇ ಭುವನೇಶಿ ಮಾತಃ .. 41-5..

ಸರ್ವಾತ್ಮನಾ ಯೋ ಭಜತೇ ತ್ವದಂಘ್ರಿಂ ಮಾಯಾ ತವಾಮುಷ್ಯ ಸುಖಂ ದದಾತಿ .
ದುಃಖಂ ಚ ಸಾ ತ್ವದ್ವಿಮುಖಸ್ಯ ದೇವಿ ಮಾಯಾಧಿನಾಥೇ ಸತತಂ ನಮಸ್ತೇ .. 41-6..

ದುಃಖಂ ನ ದುಃಖಂ ನ ಸುಖಂ ಸುಖಂ ಚ ತ್ವದ್ವಿಸ್ಮೃತಿರ್ದುಃಖಮಸಹ್ಯಭಾರಂ .
ಸುಖಂ ಸದಾ ತ್ವತ್ಸ್ಮರಣಂ ಮಹೇಶಿ ಲೋಕಾಯ ಶಂ ದೇಹಿ ನಮೋ ನಮಸ್ತೇ .. 41-7..

ಪತಂತು ತೇ ದೇವಿ ಕೃಪಾಕಟಾಕ್ಷಾಃ ಸರ್ವತ್ರ ಭದ್ರಾಣಿ ಭವಂತು ನಿತ್ಯಂ .
ಸರ್ವೋಽಪಿ ಮೃತ್ಯೋರಮೃತತ್ವಮೇತು ನಶ್ಯಂತ್ವಭದ್ರಾಣಿ ಶಿವೇ ನಮಸ್ತೇ .. 41-8..

ನಮೋ ನಮಸ್ತೇಽಖಿಲಶಕ್ತಿಯುಕ್ತೇ ನಮೋ ನಮಸ್ತೇ ಜಗತಾಂ ವಿಧಾತ್ರಿ .
ನಮೋ ನಮಸ್ತೇ ಕರುಣಾರ್ದ್ರಚಿತ್ತೇ ನಮೋ ನಮಸ್ತೇ ಸಕಲಾರ್ತಿಹಂತ್ರಿ .. 41-9..

ದುರ್ಗೇ ಮಹಾಲಕ್ಷ್ಮಿ ನಮೋ ನಮಸ್ತೇ ಭದ್ರೇ ಮಹಾವಾಣಿ ನಮೋ ನಮಸ್ತೇ .
ಕಲ್ಯಾಣಿ ಮಾತಂಗಿ ರಮೇ ಭವಾನಿ ಸರ್ವಸ್ವರೂಪೇ ಸತತಂ ನಮಸ್ತೇ .. 41-10..

ಯತ್ ಕಿಂಚಿದಜ್ಞಾತವತೇಹ ದೇವೀನಾರಾಯಣೀಯಂ ರಚಿತಂ ಮಯೇದಂ .
ಅಭದ್ರನಾಶಾಯ ಸತಾಂ ಹಿತಾಯ ತವ ಪ್ರಸಾದಾಯ ಚ ನಿತ್ಯಮಸ್ತು .. 41-11..

ಶುಭಂ41 ಏಕಚತ್ವಾರಿಂಶದಶಕಃ -    ಪ್ರಣಾಮಂ dasakam 41 praNAmam ,devinarayaneeyam kannada st0ry@5G