40 ಚತ್ವಾರಿಂಶದಶಕಃ - ಪ್ರಾರ್ಥನಾ40devinarayaneeyam PraNAmam kannada st0ry@5G

 

40 ಚತ್ವಾರಿಂಶದಶಕಃ -    ಪ್ರಾರ್ಥನಾ

ಆದ್ಯೇತಿ ವಿದ್ಯೇತಿ ಚ ಕಥ್ಯತೇ ಯಾ ಯಾ ಚೋದಯೇದ್ಬುದ್ಧಿಮುಪಾಸಕಸ್ಯ .
ಧ್ಯಾಯಾಮಿ ತಾಮೇವ ಸದಾಽಪಿ ಸರ್ವಚೈತನ್ಯರೂಪಾಂ ಭವಮೋಚನೀಂ ತ್ವಾಂ .. 40-1..

ಪ್ರತಿಷ್ಠಿತಾಽನ್ತಃಕರಣೇಽಸ್ತು ವಾಙ್ಮೇ ವದಾಮಿ ಸತ್ಯಂ ನ ವದಾಮ್ಯಸತ್ಯಂ .
ಸತ್ಯೋಕ್ತಿರೇನಂ ಪರಿಪಾತು ಮಾಂ ಮೇ ಶ್ರುತಂ ಚ ಮಾ ವಿಸ್ಮೃತಿಮೇತು ಮಾತಃ .. 40-2..

ತೇಜಸ್ವಿ ಮೇಽಧೀತಮಜಸ್ರಮಸ್ತು ಮಾ ಮಾ ಪರದ್ವೇಷಮತಿಶ್ಚ ದೇವಿ .
ಕರೋಮಿ ವೀರ್ಯಾಣಿ ಸಮಂ ಸುಹೃದ್ಭಿರ್ವಿದ್ಯಾ ಪರಾ ಸಾಽವತು ಮಾಂ ಪ್ರಮಾದಾತ್ .. 40-3..

ತ್ವಂ ರಕ್ಷ ಮೇ ಪ್ರಾಣಶರೀರಕರ್ಮಜ್ಞಾನೇಂದ್ರಿಯಾಂತಃಕರಣಾನಿ ದೇವಿ .
ಭವಂತು ಧರ್ಮಾ ಮಯಿ ವೈದಿಕಾಸ್ತೇ ನಿರಾಕೃತಿರ್ಮಾಽಸ್ತು ಮಿಥಃ ಕೃಪಾರ್ದ್ರೇ .. 40-4..

ಯಚ್ಛ್ರೂಯತೇ ಯತ್ಖಲು ದೃಶ್ಯತೇ ಚ ತದಸ್ತು ಭದ್ರಂ ಸಕಲಂ ಯಜತ್ರೇ .
ತ್ವಾಂ ಸಂಸ್ತುವನ್ನಸ್ತಸಮಸ್ತರೋಗ ಆಯುಃ ಶಿವೇ ದೇವಹಿತಂ ನಯಾನಿ .. 40-5..

ಅವಿಘ್ನಮಾಯಾತ್ವಿಹ ವಿಶ್ವತೋ ಮೇ ಜ್ಞಾನಂ ಪ್ರಸನ್ನಾ ಮಮ ಬುದ್ಧಿರಸ್ತು .
ನಾವೇವ ಸಿಂಧುಂ ದುರಿತಂ ಸಮಸ್ತಂ ತ್ವತ್ಸೇವಯೈವಾತಿತರಾಮಿ ದೇವಿ .. 40-6..

ಉರ್ವಾರುಕಂ ಬಂಧನತೋ ಯಥೈವ ತಥೈವ ಮುಚ್ಯೇಯ ಚ ಕರ್ಮಪಾಶಾತ್ .
ತ್ವಾಂ ತ್ರ್ಯಂಬಕಾಂ ಕೀರ್ತಿಮತೀಂ ಯಜೇಯ ಸನ್ಮಾರ್ಗತೋ ಮಾಂ ನಯ ವಿಶ್ವಮಾತಃ .. 40-7..

ಕ್ಷೀಣಾಯುಷೋ ಮೃತ್ಯುಗತಾನ್ ಸ್ವಶಕ್ತ್ಯಾ ದೀರ್ಘಾಯುಷೋ ವೀತಭಯಾನ್ ಕರೋಷಿ .
ಸಂಗಚ್ಛತಃ ಸಂವದತಶ್ಚ ಸರ್ವಾನ್ ಪರೋಪಕಾರೈಕರತಾನ್ ಕುರುಷ್ವ .. 40-8..

ಮರ್ತ್ಯೋ ಹ್ಯಹಂ ಬಾಲಿಶಬುದ್ಧಿರೇವ ಧರ್ಮಾನಭಿಜ್ಞೋಽಪ್ಯಪರಾಧಕೃಚ್ಚ .
ಹಾ ದುರ್ಲಭಂ ಮೇ ಕಪಿಹಸ್ತಪುಷ್ಪಸುಮಾಲ್ಯವಚ್ಛೀರ್ಣಮಿದಂ ನೃಜನ್ಮ .. 40-9..

ಯಥಾ ಪಥಾ ವಾರಿ ಯಥಾ ಚ ಗೌಃ ಸ್ವಂ ವತ್ಸಂ ತಥಾಽಽಧಾವತು ಮಾಂ ಮನಸ್ತೇ .
ವಿಶ್ವಾನಿ ಪಾಪಾನಿ ವಿನಾಶ್ಯ ಮೇ ಯದ್ಭದ್ರಂ ಶಿವೇ ದೇಹಿ ತದಾರ್ತಿಹಂತ್ರಿ .. 40-10..

ಬಹೂಕ್ತಿಭಿಃ ಕಿಂ ವಿದಿತಸ್ತ್ವಯಾಽಹಂ ಪುತ್ರಃ ಶಿಶುಸ್ತೇ ನ ಚ ವೇದ್ಮಿ ಕಿಂಚಿತ್ .
ಆಗಚ್ಛ ಪಶ್ಯಾನಿ ಮುಖಾರವಿಂದಂ ಪದಾಂಬುಜಾಭ್ಯಾಂ ಸತತಂ ನಮಸ್ತೇ .. 40-11..