37 ಸಪ್ತತ್ರಿಂಶದಶಕಃ - ವಿಷ್ಣುಮಹತ್ತ್ವಂ

 

37 ಸಪ್ತತ್ರಿಂಶದಶಕಃ -    ವಿಷ್ಣುಮಹತ್ತ್ವಂ


ಪುರಾ ಹರಿಸ್ತ್ವಾಂ ಕಿಲ ಸಾತ್ತ್ವಿಕೇನ ಪ್ರಸಾದಯಾಮಾಸ ಮಖೇನ ದೇವಿ .
ಸುರೇಷು ತಂ ಶ್ರೇಷ್ಠತಮಂ ಚಕರ್ಥ ಸ ತೇನ ಸರ್ವತ್ರ ಬಭೂವ ಪೂಜ್ಯಃ .. 37-1..

ಅಧರ್ಮವೃದ್ಧಿಶ್ಚ ಯದಾ ತ್ರಿಲೋಕೇ ಧರ್ಮಕ್ಷಯಶ್ಚಾಪಿ ತದಾ ಭವತ್ಯಾ .
ಧರ್ಮಂ ಸಮುದ್ಧರ್ತುಮಧರ್ಮಮೃದ್ಧಂ ಮಾರ್ಷ್ಟುಂ ಚ ದೇವ್ಯೇಷ ನಿಯುಜ್ಯತೇ ಹಿ .. 37-2..

ಸ ಈಡ್ಯತೇ ಸರ್ವತ ಏವ ಸರ್ವೈಃ ಪತ್ನ್ಯಾ ಚ ಭೂತೈಶ್ಚ ಸಮಂ ಗಿರೀಶಃ .
ಇಲಾವೃತೇಽಪೂರುಷಸನ್ನಿಧಾನೇ ಸಂಕರ್ಷಣಾಖ್ಯಂ ಭಜತೇ ಮುರಾರಿಂ .. 37-3..

ತಮೇವ ಭದ್ರಶ್ರವಸೋ ಹಯಾಸ್ಯಂ ಭದ್ರಾಶ್ವವರ್ಷೇ ಮುನಯಃ ಸ್ತುವಂತಿ .
ಪ್ರಹ್ಲಾದ ಉಚ್ಚೈರ್ಹರಿವರ್ಷವಾಸೀ ವಿಶ್ವಾರ್ತಿಶಾಂತ್ಯೈ ನೃಹರಿಂ ಚ ನೌತಿ .. 37-4..

ಶ್ರೀಃ ಕೇತುಮಾಲೇ ಖಲು ಕಾಮರೂಪಂ ತಂ ರಮ್ಯಕೇ ಮತ್ಸ್ಯತನುಂ ಮನುಶ್ಚ .
ಹಿರಣ್ಮಯೇ ಕೂರ್ಮಶರೀರಭಾಜಂ ಸ್ತುವಂತಿ ನಾರಾಯಣಮರ್ಯಮಾ ಚ .. 37-5..

ಮಹಾವರಾಹಂ ಕುರುಷೂತ್ತರೇಷು ಭೂ ರಾಘವಂ ಕಿಂಪುರುಷೇ ಹನೂಮಾನ್ .
ತಂ ನಾರದೋ ಭಾರತವರ್ಷವರ್ತೀ ನರಂ ಚ ನಾರಾಯಣಮಾಶ್ರಯಂತೇ .. 37-6..

ಸತ್ಕರ್ಮಭೂಮಿರ್ಭರತಸ್ಯ ರಾಜ್ಯಂ ಸಂತ್ಯತ್ರ ವೈಕುಂಠಕಥೈಕಸಕ್ತಾಃ .
ತೀರ್ಥಾನಿ ಪುಣ್ಯಾಶ್ರಮಪರ್ವತಾಶ್ಚ ಜನ್ಮಾತ್ರ ದೇವಾಃ ಸ್ಪೃಹಯಂತ್ಯಜಸ್ರಂ .. 37-7..

ಪ್ರಹ್ಲಾದಪೌತ್ರಃ ಸುತಲಾಧಿವಾಸಃ ಸುರಕ್ಷಿತಶ್ಚಾತ್ಮನಿವೇದನೇನ .
ವಾರ್ಧಕ್ಯರೋಗಕ್ಲಮಭೀತಿಮುಕ್ತೋ ಮಹಾಬಲಿರ್ವಾಮನಮೇವ ನೌತಿ .. 37-8..

ಸಹಸ್ರಶೀರ್ಷಃ ಶಿರಸಾ ದಧತ್ ಕ್ಷ್ಮಾಂ ಹಲೀ ಹರೇಸ್ತಾಮಸಮೂರ್ತಿರಾರ್ಯೈಃ .
ಸಂಸ್ತೂಯಮಾನಃ ಸಹನಾಗಕನ್ಯಃ ಪಾತಾಲಮೂಲೇ ಚ ಸಲೀಲಮಾಸ್ತೇ .. 37-9..

ವಿಚಿತ್ರರೂಪಂ ಜಗತಾಂ ಹಿತಾಯ ಸರ್ವೇ ಸ್ತುವಂತ್ಯಚ್ಯುತಮಿದ್ಧಭಕ್ತ್ಯಾ .
ಏನಂ ಕುರು ತ್ವಂ ವರದಾನದಕ್ಷಂ ಮಾತಃ ಕೃಪಾರ್ದ್ರೇ ವರದೇ ನಮಸ್ತೇ .. 37-10..