31 ಏಕತ್ರಿಂಶದಶಕಃ - ಭ್ರಾಮರ್ಯವತಾರಃKANNADA NARRATI0N Pr0fManjula Bharadwaj ST0RY@5G

 

https://www.youtube.com/watch?v=LbfPZfRRlWM

31 ಏಕತ್ರಿಂಶದಶಕಃ -    ಭ್ರಾಮರ್ಯವತಾರಃ
ಕಶ್ಚಿತ್ಪುರಾ ಮಂತ್ರಮುದೀರ್ಯ ಗಾಯತ್ರೀತಿ ಪ್ರಸಿದ್ಧಂ ದಿತಿಜೋಽರುಣಾಖ್ಯಃ .
ಚಿರಾಯ ಕೃತ್ವಾ ತಪ ಆತ್ಮಯೋನೇಃ ಪ್ರಸಾದಿತಾದಾಪ ವರಾನಪೂರ್ವಾನ್ .. 31-1..

ಸ್ತ್ರೀಪುಂಭಿರಸ್ತ್ರೈಶ್ಚ ರಣೇ ದ್ವಿಪಾದೈಶ್ಚತುಷ್ಪದೈಶ್ಚಾಪ್ಯುಭಯಾತ್ಮಕೈಶ್ಚ .
ಅವಧ್ಯತಾಂ ದೇವಪರಾಜಯಂ ಚ ಲಬ್ಧ್ವಾ ಸ ದೃಪ್ತೋ ದಿವಮಾಸಸಾದ .. 31-2..

ರಣೇ ಜಿತಾ ದೈತ್ಯಭಯೇನ ಲೋಕಪಾಲೈಃ ಸಹ ಸ್ವಸ್ವಪದಾನಿ ಹಿತ್ವಾ .
ದೇವಾ ದ್ರುತಾಃ ಪ್ರಾಪ್ಯ ಶಿವಂ ರಿಪೂಣಾಂ ಸಂಯಗ್ವಧೋಪಾಯಮಚಿಂತಯಂಶ್ಚ .. 31-3..

ತದಾಽಭವತ್ಕಾಪ್ಯಶರೀರಿಣೀ ವಾಗ್ಭಜೇತ ದೇವೀಂ ಶುಭಮೇವ ವಃ ಸ್ಯಾತ್ .
ದೈತ್ಯೋಽರುಣೋ ವರ್ಧಯತೀಹ ಗಾಯತ್ರ್ಯುಪಾಸನೇನಾತ್ಮಬಲಂ ತ್ವಧೃಷ್ಯಂ .. 31-4..

ಯದ್ಯೇಷ ತಂ ಮಂತ್ರಜಪಂ ಜಹಾತಿ ಸ ದುರ್ಬಲಃ ಸಾಧ್ಯವಧೋಽಪಿ ಚ ಸ್ಯಾತ್ .
ಏವಂ ನಿಶಮ್ಯ ತ್ರಿದಶೈಃ ಪ್ರಹೃಷ್ಟೈರಭ್ಯರ್ಥಿತೋ ದೇವಗುರುಃ ಪ್ರತಸ್ಥೇ .. 31-5..

ಸ ಪ್ರಾಪ ದೈತ್ಯಂ ಯತಿರೂಪಧಾರೀ ಪ್ರತ್ಯುದ್ಗತೋ ಮಂತ್ರಜಪಾತಿಸಕ್ತಂ .
ಸ್ಮಿತಾರ್ದ್ರಮೂಚೇ ಕುಶಲೀ ಸಬಂಧುಮಿತ್ರೋ ಭವಾನ್ ಕಿಂ ಜಗದೇಕವೀರ .. 31-6..

ದೈತ್ಯಸ್ಯ ತೇ ಮಂತ್ರಜಪೇನ ಕಿಂ ಯೋ ನೂನಂ ಬಲಿಷ್ಠಂ ತ್ವಬಲಂ ಕರೋತಿ .
ಯೇನೈವ ದೇವಾ ಅಬಲಾ ರಣೇಷು ತ್ವಯಾ ಜಿತಾಸ್ತ್ವಂ ಸ್ವಹಿತಂ ಕುರುಷ್ವ .. 31-7..

ಸಂನ್ಯಾಸಿನೋ ಮಂತ್ರಜಪೇನ ರಾಗದ್ವೇಷಾದಿ ಜೇತುಂ ಸತತಂ ಯತಂತೇ .
ನ ತ್ವಂ ಯತಿರ್ನಾಪಿ ಮುಮುಕ್ಷುರರ್ಥಕಾಮಾತಿಸಕ್ತಸ್ಯ ಜಪೇನ ಕಿಂ ತೇ .. 31-8..

ಏಕಂ ಹಿ ಮಂತ್ರಂ ಸಮುಪಾಸ್ವಹೇ ದ್ವೌ ತೇನಾಸಿ ಮಿತ್ರಂ ಮಮ ತದ್ವದಾಮಿ .
ಮಂತ್ರಶ್ಚ ಮೇ ಮುಕ್ತಿದ ಏವ ತುಭ್ಯಂ ವೃದ್ಧಿಂ ನ ದದ್ಯಾದಯಮಿತ್ಯವೇಹಿ .. 31-9..

ಬೃಹಸ್ಪತಾವೇವಮುದೀರ್ಯ ಯಾತೇ ಸತ್ಯಂ ತದುಕ್ತಂ ದಿತಿಜೋ ವಿಚಿಂತ್ಯ .
ಕ್ರಮಾಜ್ಜಹೌ ಮಂತ್ರಜಪಂ ಸದಾ ಹಿ ಮೂಢಃ ಪರಪ್ರೋಕ್ತವಿನೇಯಬುದ್ಧಿಃ .. 31-10..

ಏವಂ ಗುರೌ ಕುರ್ವತಿ ದೈತ್ಯಭೀತೈಃ ಕೃತ್ವಾ ತಪೋಯೋಗಜಪಾಧ್ವರಾದಿ .
ಜಾಂಬೂನದೇಶ್ವರ್ಯಮರೈಃ ಸ್ತುತಾ ತ್ವಂ ಪ್ರಸಾದಿತಾ ಪ್ರಾದುರಭೂಃ ಕೃಪಾರ್ದ್ರಾ .. 31-11..

ತ್ವದ್ದೇಹಜಾತೈರ್ಭ್ರಮರೈರನಂತೈರ್ದೈತ್ಯಃ ಸಸೈನ್ಯೋ ವಿಫಲಾಸ್ತ್ರಶಸ್ತ್ರಃ .
ದಷ್ಟೋ ಹತಸ್ತ್ವಂ ಚ ನುತಿಪ್ರಸನ್ನಾ ಪಶ್ಯತ್ಸು ದೇವೇಷು ತಿರೋಹಿತಾಽಭೂಃ .. 31-12..

ಸ್ವದೇಹತೋ ವೈ ಭ್ರಮರಾನ್ ವಿಧಾತ್ರೀ ತ್ವಂ ಭ್ರಾಮರೀತಿ ಪ್ರಥಿತಾ ಜಗತ್ಸು .
ಅಹೋ ವಿಚಿತ್ರಾಸ್ತವ ದೇವಿ ಲೀಲಾಃ ನಮೋ ನಮಸ್ತೇ ಭುವನೇಶಿ ಮಾತಃ .. 31-13..