33 ತ್ರಯಸ್ತ್ರಿಂಶದಶಕಃ - ಗೌತಮಕಥಾKANNADA NARRATI0N Pr0fManjula Bharadwaj ST0RY@5G

 

https://www.youtube.com/watch?v=CBExhIxZg64

33 ತ್ರಯಸ್ತ್ರಿಂಶದಶಕಃ -    ಗೌತಮಕಥಾ
ಶಕ್ರಃ ಪುರಾ ಜೀವಗಣಸ್ಯ ಕರ್ಮದೋಷಾತ್ಸಮಾಃ ಪಂಚದಶ ಕ್ಷಮಾಯಾಂ .
ವೃಷ್ಟಿಂ ನ ಚಕ್ರೇ ಧರಣೀ ಚ ಶುಷ್ಕವಾಪೀತಡಾಗಾದಿಜಲಾಶಯಾಽಽಸೀತ್ .. 33-1..

ಸಸ್ಯಾನಿ ಶುಷ್ಕಾಣಿ ಖಗಾನ್ ಮೃಗಾಂಶ್ಚ ಭುಕ್ತ್ವಾಽಪ್ಯತೃಪ್ತಾಃ ಕ್ಷುಧಯಾ ತೃಷಾ ಚ .
ನಿಪೀಡಿತಾ ಮರ್ತ್ಯಶವಾನಿ ಚಾಹೋ ಮರ್ತ್ಯಾ ಅನಿಷ್ಟಾನ್ಯಪಿ ಭುಂಜತೇ ಸ್ಮ .. 33-2..

ಕ್ಷುಧಾಽರ್ದಿತಾಃ ಸರ್ವಜನಾ ಮಹಾಽಽಪದ್ವಿಮುಕ್ತಿಕಾಮಾ ಮಿಲಿತಾಃ ಕದಾಚಿತ್ .
ತಪೋಧನಂ ಗೌತಮಮೇತ್ಯ ಭಕ್ತ್ಯಾ ಪೃಷ್ಟಾ ಮುನಿಂ ಸ್ವಾಗಮಹೇತುಮೂಚುಃ .. 33-3..

ವಿಜ್ಞಾಯ ಸರ್ವಂ ಮುನಿರಾಟ್ ಕೃಪಾಲುಃ ಸಂಪೂಜ್ಯ ಗಾಯತ್ರ್ಯಭಿಧಾಂ ಶಿವೇ ತ್ವಾಂ .
ಪ್ರಸಾದ್ಯ ದೃಷ್ಟ್ವಾ ಚ ತವೈವ ಹಸ್ತಾಲ್ಲೇಭೇ ನವಂ ಕಾಮದಪಾತ್ರಮೇಕಂ .. 33-4..

ದುಕೂಲಸೌವರ್ಣವಿಭೂಷಣಾನ್ನವಸ್ತ್ರಾದಿ ಗಾವೋ ಮಹಿಷಾದಯಶ್ಚ .
ಯದ್ಯಜ್ಜನೈರೀಪ್ಸಿತಮಾಶು ತತ್ತತ್ತತ್ಪಾತ್ರತೋ ದೇವಿ ಸಮುದ್ಬಭೂವ .. 33-5..

ರೋಗೋ ನ ದೈನ್ಯಂ ನ ಭಯಂ ನ ಚೈವ ಜನಾ ಮಿಥೋ ಮೋದಕರಾ ಬಭೂವುಃ .
ತೇ ಗೌತಮಸ್ಯೋಗ್ರತಪಃಪ್ರಭಾವಮುಚ್ಚೈರ್ಜಗುಸ್ತಾಂ ಕರುಣಾರ್ದ್ರತಾಂ ಚ .. 33-6..

ಏವಂ ಸಮಾ ದ್ವಾದಶ ತತ್ರ ಸರ್ವೇ ನಿನ್ಯುಃ ಕದಾಚಿನ್ಮಿಲಿತೇಷು ತೇಷು .
ಶ್ರೀನಾರದೋ ದೇವಿ ಶಶೀವ ಗಾಯತ್ರ್ಯಾಶ್ಚರ್ಯಶಕ್ತಿಂ ಪ್ರಗೃಣನ್ನವಾಪ .. 33-7..

ಸ ಪೂಜಿತಸ್ತತ್ರ ನಿಷಣ್ಣ ಉಚ್ಚೈರ್ನಿವೇದ್ಯ ತಾಂ ಗೌತಮಕೀರ್ತಿಲಕ್ಷ್ಮೀಂ .
ಸಭಾಸು ಶಕ್ರಾದಿಸುರೈಃ ಪ್ರಗೀತಾಂ ಜಗಾಮ ಸಂತೋ ಜಹೃಷುಃ ಕೃತಜ್ಞಾಃ .. 33-8..

ಕಾಲೇ ಧರಾಂ ವೃಷ್ಟಿಸಮೃದ್ಧಸಸ್ಯಾಂ ದೃಷ್ಟ್ವಾ ಜನಾ ಗೌತಮಮಾನಮಂತಃ .
ಆಪೃಚ್ಛ್ಯ ತೇ ಸಜ್ಜನಸಂಗಪೂತಾ ಮುದಾ ಜವಾತ್ಸ್ವಸ್ವಗೃಹಾಣಿ ಜಗ್ಮುಃ .. 33-9..

ದುಃಖಾನಿ ಮೇ ಸಂತು ಯತೋ ಮನೋ ಮೇ ಪ್ರತಪ್ತಸಂಘಟ್ಟಿತಹೇಮಶೋಭಿ .
ವಿಶುದ್ಧಮಸ್ತು ತ್ವಯೀ ಬದ್ಧರಾಗೋ ಭವಾನಿ ತೇ ದೇವಿ ನಮೋಽಸ್ತು ಭೂಯಃ .. 33-10..