20 വിംശദശകഃ - ദേവകീപുത്രവധം

https://youtu.be/qliA-aGQ8ns

20 വിംശദശകഃ - ദേവകീപുത്രവധം

20 വിംശദശകഃ  -    ദേവകീപുത്രവധം
അഥോരുപുണ്യേ മഥുരാപുരേ തു വിഭൂഷിതേ മൗക്തികമാലികാഭിഃ .
ശ്രീദേവകീശൗരിവിവാഹരംഗേ സർവൈഃ ശ്രുതം വ്യോമവചഃ സ്ഫുടാർഥം .. 20-1..

അവേഹി ഭോ ദേവകനന്ദനായാഃ സുതോഽഷ്ടമഃ കംസ തവാന്തകഃ സ്യാത് .
ശ്രുത്വേതി താം ഹന്തുമസിം ദധാനഃ കംസോ നിരുദ്ധോ വസുദേവമുഖ്യൈഃ .. 20-2..

അഥാഹ ശൗരിഃ ശൃണു കംസ പുത്രാൻ ദദാമി തേഽസ്യാഃ ശപഥം കരോമി .
ഏതദ്വചോ മേ വ്യഭിചര്യതേ ചേന്മത്പൂർവജാതാ നരകേ പതന്തു .. 20-3..

ശ്രദ്ധായ ശൗരേർവചനം പ്രശാന്തസ്താം ദേവകീം ഭോജപതിർമുമോച .
സർവേ ച തുഷ്ടാ യദവോ നഗര്യാം തൗ ദമ്പതീ ചോഷതുരാത്തമോദം .. 20-4..

കാലേ സതീ പുത്രമസൂത താതഃ കംസായ നിശ്ശങ്കമദാത്സുതം സ്വം .
ഹന്താ ന മേഽയം ശിശുരിത്യുദീര്യ തം പ്രത്യദാദ്ഭോജപതിശ്ച തസ്മൈ .. 20-5..

അഥാശു ഭൂഭാരവിനാശനാഖ്യത്വന്നാടകപ്രേക്ഷണകൗതുകേന .
ശ്രീനാരദഃ സർവവിദേത്യ കംസമദൃശ്യഹാസം സകലം ജഗാദ .. 20-6..

ത്വം ഭൂപ ദൈത്യഃ ഖലു കാലനേമിർജഗത്പ്രസിദ്ധോ ഹരിണാ ഹതശ്ച .
തതോഽത്ര ജാതോഽസി സുരാ ഹരിശ്ച ത്വാം ഹന്തുമിച്ഛന്ത്യധുനാഽപി ശത്രും .. 20-7..

ദേവാസ്തദർഥം നരരൂപിണോഽത്ര വ്രജേ ച ജാതാ വസുദേവമുഖ്യാഃ .
നന്ദാദയശ്ച ത്രിദശാ ഇമേ ന വിസ്രംഭണീയാ ന ച ബാന്ധവാസ്തേ .. 20-8..

ത്വം വ്യോമവാണീം സ്മര ദേവകസ്യ പുത്ര്യാഃ സുതേഷ്വഷ്ടമതാം ഗതഃ സൻ .
സ ത്വാം നിഹന്താ ഹരിരേവ ശത്രുരല്പോഽപി നോപേക്ഷ്യ ഇതീര്യതേ ഹി .. 20-9..

സർവാത്മജാനാം നൃപ മേലനേഽസ്യാഃ സർവേഽഷ്ടമാഃ സ്യുഃ പ്രഥമേ ച സർവേ .
മായാവിനം വിദ്ധി ഹരിം സദേതി ഗതേ മുനൗ ക്രോധമിയായ കംസഃ .. 20-10..

സ ദേവകീസൂനുമരം ജഘാന കാരാഗൃഹേ താം പതിമപ്യബധ്നാത് .
തയോഃ സുതാൻ ഷട് ഖലു ജാതമാത്രാൻ ഹത്വാ കൃതം സ്വം ഹിതമേവ മേനേ .. 20-11..

കായേന വാചാ മനസേന്ദ്രിയൈർവാ മാ ജാതു പാപം കരവാണി ദേവി .
മമാസ്തു സത്കർമരതിഃ പ്രിയസ്തേ ഭവാനി ഭക്തം കുരു മാം നമസ്തേ .. 20-12..