21 ഏകവിംശദശകഃ - നന്ദസുതാവതാരഃ21 malayalam st0ry@5G

 

21 ഏകവിംശദശകഃ -    നന്ദസുതാവതാരഃ
https://youtu.be/FfVNEXPvP2w
'https://youtu.be/FfVNEXPvP2w


സർവേഽപി ജീവാ നിജകർമബദ്ധാ ഏതേ ഷഡാസന്ദ്രുഹിണസ്യ പൗത്രാഃ .
തന്നിന്ദയാ ദൈത്യകുലേ പ്രജാതാഃ പുനശ്ച ശപ്താ ജനകേന ദൈവാത് .. 21-1..

തേനൈവ തേ ശൗരിസുതത്വമാപ്താ ഹതാശ്ച കംസേന തു ജാതമാത്രാഃ .
ശ്രീനാരദേനർഷിവരേണ ദേവി ജ്ഞാതം പുരാവൃത്തമിദം സമസ്തം .. 21-2..
പ്രാഗ്ദമ്പതീ ചാദിതികശ്യപൗ ഹാ സ്വകർമദോഷേണ പുനശ്ച ജാതൗ .
തൗ ദേവകീശൂരസുതൗ സ്വപുത്രനാശാദിഭിർദുഃഖമവാപതുശ്ച .. 21-3..

ത്വം ദേവകീസപ്തമഗർഭതോ വൈ ഗൃഹ്ണന്ത്യനന്താംശശിശും സ്വശക്ത്യാ .
നിവേശ്യ രോഹിണ്യുദരേ ധരണ്യാം മർത്യോ ഭവേത്യച്യുതമാദിശശ്ച .. 21-4..

പ്രാക്കർമദോഷാത്സ സുഹൃന്മഘോനഃ ക്രുദ്ധേന ശപ്തോ ഭൃഗുണാ മുരാരിഃ .
ദയാർഹസംസാരിദശാമവാപ്സ്യൻ ഹാ ദേവകീഗർഭമഥാവിവേശ .. 21-5..

പൂർണേ തു ഗർഭേ ഹരിരർദ്ധരാത്രേ കാരാഗൃഹേ ദേവകനന്ദനായാഃ .
ജജ്ഞേ സുതേഷ്വഷ്ടമതാമവാപ്തഃ ശൗരിർവിമുക്തോ നിഗഡൈശ്ച ബന്ധാത് .. 21-6..

വ്യോമോത്ഥവാക്യേന തവൈവ ബാലം ഗൃഹ്ണന്നദൃഷ്ടഃ ഖലു ഗേഹപാലൈഃ .
നിദ്രാം ഗതൈസ്ത്വദ്വിവൃതേന ശൗരിർദ്വാരേണ യാതോ ബഹിരാത്തതോഷം .. 21-7..

ത്വം സ്വേച്ഛയാ ഗോപകുലേ യശോദാനന്ദാത്മജാ സ്വാപിതജീവജാലേ .
അജായഥാ ഭക്തജനാർതിഹന്ത്രീ സർവം നിയന്ത്രീ സകലാർഥദാത്രീ .. 21-8..

തവ പ്രഭാവാദ്വസുദേവ ഏകോ ഗച്ഛന്നഭീതോ യമുനാമയത്നം .
തീർത്വാ നദീം ഗോകുലമാപ തത്ര ദാസ്യാഃ കരേ സ്വം തനയം ദദൗ ച .. 21-9..

തയൈവ ദത്താമഥ ബാലികാം ത്വാമാദായ ശീഘ്രം സ തതോ നിവൃത്തഃ .
കാരാഗൃഹം പ്രാപ്യ ദദൗ പ്രിയായൈ സ ചാഭവത്പൂർവവദേവ ബദ്ധഃ .. 21-10..

ത്വദ്രോദനോത്ഥാപിതഗേഹപാലൈർനിവേദിതോ ഭോജപതിഃ സമേത്യ .
ത്വാം പാദയുഗ്മഗ്രഹണേന കുർവന്നധഃശിരസ്കാം നിരഗാദ്ഗൃഹാന്താത് .. 21-11..

സ പോഥയാമാസ ശിലാതലേ ത്വാം സദ്യഃ സമുത്പത്യ കരാദമുഷ്യ .
ദിവി സ്ഥിതാ ശംഖഗദാദിഹസ്താ സുരൈഃ സ്തുതാ സ്മേരമുഖീ ത്വമാത്ഥ .. 21-12..

വധേന കിം മേ തവ കംസ ജാതസ്തവാന്തകഃ ക്വാപ്യവിദൂരദേശേ .
മാ ദ്രുഹ്യതാം സാധുജനോ ഹിതം സ്വം വിചിന്തയേത്യുക്തവതീ തിരോഽഭൂഃ .. 21-13..

സ ഭോജരാട് സ്വാന്തകനാശനായ സർവാൻ ശിശൂൻ ഹന്തുമരം ബലിഷ്ഠാൻ .
വത്സാഘമുഖ്യാനസുരാന്നിയുജ്യ കൃതാർഥമാത്മാനമമന്യതോച്ചൈഃ .. 21-14..

കംസോഽസ്തി മേ ചേതസി കാമലോഭക്രോധാദിമന്ത്രിപ്രവരൈഃ സമേതഃ .
സദ്ഭാവഹന്താ ഖലു നന്ദപുത്രി തം നാശയ ത്വച്ചരണം നമാമി .. 21-15..