29 ഏകോനത്രിംശദശകഃ - ദേവീപീഠോത്പത്തിഃ

 

29 ഏകോനത്രിംശദശകഃ -    ദേവീപീഠോത്പത്തിഃ


അഥൈകദാഽദൃശ്യത ദക്ഷഗേഹേ ശാക്തം മഹസ്തച്ച ബഭൂവ ബാലാ .
വിജ്ഞായ തേ ശക്തിമിമാം ജഗത്സു സർവേഽപി ഹൃഷ്ടാ അഭവൻ ക്ഷണശ്ച .. 29-1..

ദക്ഷഃ സ്വഗേഹാപതിതാം ചകാര നാമ്നാ സതീം പോഷയതി സ്മ താം സഃ .
സ്മരൻ വചസ്തേ ഗിരിശായ കാലേ പ്രദായ താം ദ്വൗ സമതോഷയച്ച .. 29-2..

ഏവം ശിവഃശക്തിയുതഃ പുനശ്ച ബഭൂവ ഗച്ഛത്സു ദിനേഷു ദക്ഷഃ .
ദൈവാച്ഛിവദ്വേഷമവാപ ദേഹം തത്പോഷിതം സ്വം വിജഹൗ സതീ ച .. 29-3..

ദുഃഖേന കോപേന ച ഹാ സതീതി മുഹുർവദന്നുദ്ധൃതദാരദേഹഃ .
ബഭ്രാമ സർവത്ര ഹരഃ സുരേഷു പശ്യത്സു ശാർങ്ഗീ ശിവമന്വചാരീത് .. 29-4..

രുദ്രാംസവിന്യസ്തസതീശരീരം വിഷ്ണുഃ ശരൗഘൈർബഹുശശ്ചകർത .
ഏകൈകശഃ പേതുരമുഷ്യ ഖണ്ഡാ ഭൂമൗ ശിവേ സാഷ്ടശതം സ്ഥലേഷു .. 29-5..

യതോ യതഃ പേതുരിമേ സ്ഥലാനി സർവാണി താനി പ്രഥിതാനി ലോകേ .
ഇമാനി പൂതാനി ഭവാനി ദേവീപീഠാനി സർവാഘഹരാണി ഭാന്തി .. 29-6..

ത്വമേകമേവാദ്വയമത്ര ഭിന്നനാമാനി ധൃത്വാ ഖലു മന്ത്രതന്ത്രൈഃ .
സമ്പൂജ്യമാനാ ശരണാഗതാനാം ഭുക്തിം ച മുക്തിം ച ദദാസി മാതഃ .. 29-7..

നിർവിണ്ണചിത്തഃ സ സതീവിയോഗാച്ഛിവഃ സ്മരംസ്ത്വാം കുഹചിന്നിഷണ്ണഃ .
സമാധിമഗ്നോഽഭവദേഷ ലോകഃ ശക്തിം വിനാ ഹാ വിരസോഽലസശ്ച .. 29-8..

ചിന്താകുലാ മോഹധിയോ വിശീർണതോഷാ മഹാരോഗനിപീഡിതാശ്ച .
സൗഭാഗ്യഹീനാ വിഹതാഭിലാഷാഃ സർവേ സദോദ്വിഗ്നഹൃദോ ബഭൂവുഃ .. 29-9..

ശിവോഽപി ശക്ത്യാ സഹിതഃ കരോതി സർവം വിയുക്തശ്ച തയാ ജഡഃ സ്യാത് .
മാ മാഽസ്തു മേ ശക്തിവിയോഗ ഏഷ ദാസോഽസ്മി ഭൂയോ വരദേ നമസ്തേ .. 29-10..