26 ഷഡ്വിംശദശകഃ - സുരഥകഥാ

PPT 26 ഷഡ്വിംശദശകഃ - സുരഥകഥാ​

https://youtu.be/iD2pHq90Y30

 

26 ഷഡ്വിംശദശകഃ  -    സുരഥകഥാ26 ഷഡ്വിംശദശകഃ  -    സുരഥകഥാ
https://onedrive.live.com/edit.aspx?resid=9854A1791CB05F1C!1052&app=PowerPoint&wdnd=1&wdPreviousSession=07a485d6%2De010%2D4134%2D829e%2D58a562c5885c&wdNewAndOpenCt=1693718178575&wdo=4&wdOrigin=wacFileNew&wdTpl=blank&wdPreviousCorrelation=3d55b6f1%2D9bfc%2D429f%2D8bd3%2Df4a4301f1fbf
രാജാ പുരാഽഽസിത് സുരഥാഭിധാനഃ സ്വാരോചിഷേ ചൈത്രകുലാവതംസഃ .
മന്വന്തരേ സത്യരതോ വദാന്യഃ സമ്യക്പ്രജാപാലനമാത്രനിഷ്ഠഃ .. 26-1..

വീരോഽപി ദൈവാത്സമരേ സ കോലാവിധ്വംസിഭിഃ ശത്രുബലൈർജിതഃ സൻ .
ത്യക്ത്വാ സ്വരാജ്യം വനമേത്യ ശാന്തം സുമേധസം പ്രാപ മുനിം ശരണ്യം .. 26-2..

തപോവനം നിർഭയമാവസന്ദ്രുമച്ഛായാശ്രിതഃ ശീതലവാതപൃക്തഃ .
സ ഏകദാ രാജ്യഗൃഹാദിചിന്താപര്യാകുലഃ കഞ്ചിദപശ്യദാർതം .. 26-3..

രാജാ തമൂചേ സുരഥോഽസ്മി നാമ്നാ ജിതോഽരിഭിർഭ്രഷ്ടവിഭൂതിജാലഃ .
ഗൃഹാദിചിന്താമഥിതാന്തരംഗഃ കുതോഽസി കസ്ത്വം വദ മാം സമസ്തം .. 26-4..

ശ്രുത്വേതി സ പ്രത്യവദത്സമാധിനാമാഽസ്മി വൈശ്യോ ഹൃതസർവവിത്തഃ .
പത്നീസുതാദ്യൈഃ സ്വഗൃഹാന്നിരസ്തസ്തഥാഽപി സോത്കണ്ഠമിമാൻ സ്മരാമി .. 26-5..

അനേന സാകം സുരഥോ വിനീതോ മുനിം പ്രണമ്യാഹ സമധിനാമാ .
ഗൃഹാന്നിരസ്തോഽപി ഗൃഹാദിചിന്താം കരോതി സോത്കണ്ഠമയം മഹർഷേ .. 26-6..

ബ്രഹ്മൈവ സത്യം പരമദ്വിതീയം മിഥ്യാ ജഗത്സർവമിദം ച ജാനേ .
തഥാഽപി മാം ബാധത ഏവ രാജ്യഗൃഹാദിചിന്താ വദ തസ്യ ഹേതും .. 26-7..

ഊചേ തപസ്വീ ശൃണു ഭൂപ മായാ സർവസ്യ ഹേതുഃ സഗുണാഽഗുണാ സാ .
ബന്ധം ച മോക്ഷം ച കരോതി സൈവ സർവേഽപി മായാവശഗാ ഭവന്തി .. 26-8..

ജ്ഞാനം ഹരേരസ്തി വിധേശ്ച കിന്തു ക്വചിത്കദാചിന്മിലിതൗ മിഥസ്തൗ .
വിമോഹിതൗ കസ്ത്വമരേ നു കസ്ത്വമേവം വിവാദം കില ചക്രതുഃ സ്മ .. 26-9..

ജ്ഞാനം ദ്വിധൈകം ത്വപരോക്ഷമന്യത്പരോക്ഷമപ്യേതദവേഹി രാജൻ .
ആദ്യം മഹേശ്യാഃ കൃപയാ വിരക്ത്യാ ഭക്ത്യാ മഹത്സംഗമതശ്ച ലഭ്യം .. 26-10..

യ ഏതദാപ്നോതി സ സർവമുക്തോ ദ്വേഷശ്ച രാഗശ്ച ന തസ്യ ഭൂപ .
ജ്ഞാനം ദ്വിതീയം ഖലു ശാസ്ത്രവാക്യവിചാരതോ ബുദ്ധിമതൈവ ലഭ്യം .. 26-11..

ശമാദിഹീനോ ന ച ശാസ്ത്രവാക്യവിചാരമാത്രേണ വിമുക്തിമേതി .
ദേവ്യാഃ കടാക്ഷൈർലഭതേ ച ഭുക്തിം മുക്തിം ച സാ കേവലഭക്തിഗമ്യാ .. 26-12..

സമ്പൂജ്യ താം സാകമനേന ദുർഗാം കൃത്വാ പ്രസന്നാം സ്വഹിതം ലഭസ്വ .
ശ്രുത്വാ മുനേർവാക്യമുഭൗ മഹേശി ത്വാം പൂജയാമാസതുരിദ്ധഭക്ത്യാ .. 26-13..

വർഷദ്വയാന്തേ ഭവതീം സമീക്ഷ്യ സ്വപ്നേ സതോഷാവപി താവതൃപ്തൗ .
ദിദൃക്ഷയാ ജാഗ്രതി ചാപി ഭക്താവാചേരതുർദ്വൗ കഠിനവ്രതാനി .. 26-14..

വർഷത്രയാന്തേ സുമുഖീം പ്രസന്നാം ത്വാം വീക്ഷ്യ തൗ തുഷ്ടുവതുഃ പ്രഹൃഷ്ടൗ .
ദൈവാത്സമാധിസ്ത്വദനുഗ്രഹേണ ലബ്ധ്വാ പരം ജ്ഞാനമവാപ മുക്തിം .. 26-15..

ഭോഗാവിരക്തഃ സുരഥസ്തു ശീഘ്രം നിഷ്കണ്ടകം രാജ്യമവാപ ഭൂയഃ .
മന്വന്തരേ ഭൂപതിരഷ്ടമേ സ സാവർണിനാമാ ച മനുർബഭൂവ .. 26-16..

ത്വം ഭുക്തികാമായ ദദാസി ഭോഗം മുമുക്ഷവേ സംസൃതിമോചനം ച .
കിഞ്ചിന്ന പൃച്ഛാമി പരം വിമൂഢോ നമാമി തേ പാദസരോജയുഗ്മം .. 26-17..