31 ഏകത്രിംശദശകഃ - ഭ്രാമര്യവതാരഃ

 

https://www.youtube.com/watch?v=48dPM3NINjI
31 ഏകത്രിംശദശകഃ -    ഭ്രാമര്യവതാരഃ
കശ്ചിത്പുരാ മന്ത്രമുദീര്യ ഗായത്രീതി പ്രസിദ്ധം ദിതിജോഽരുണാഖ്യഃ .
ചിരായ കൃത്വാ തപ ആത്മയോനേഃ പ്രസാദിതാദാപ വരാനപൂർവാൻ .. 31-1..

സ്ത്രീപുംഭിരസ്ത്രൈശ്ച രണേ ദ്വിപാദൈശ്ചതുഷ്പദൈശ്ചാപ്യുഭയാത്മകൈശ്ച .
അവധ്യതാം ദേവപരാജയം ച ലബ്ധ്വാ സ ദൃപ്തോ ദിവമാസസാദ .. 31-2..

രണേ ജിതാ ദൈത്യഭയേന ലോകപാലൈഃ സഹ സ്വസ്വപദാനി ഹിത്വാ .
ദേവാ ദ്രുതാഃ പ്രാപ്യ ശിവം രിപൂണാം സംയഗ്വധോപായമചിന്തയംശ്ച .. 31-3..

തദാഽഭവത്കാപ്യശരീരിണീ വാഗ്ഭജേത ദേവീം ശുഭമേവ വഃ സ്യാത് .
ദൈത്യോഽരുണോ വർധയതീഹ ഗായത്ര്യുപാസനേനാത്മബലം ത്വധൃഷ്യം .. 31-4..

യദ്യേഷ തം മന്ത്രജപം ജഹാതി സ ദുർബലഃ സാധ്യവധോഽപി ച സ്യാത് .
ഏവം നിശമ്യ ത്രിദശൈഃ പ്രഹൃഷ്ടൈരഭ്യർഥിതോ ദേവഗുരുഃ പ്രതസ്ഥേ .. 31-5..

സ പ്രാപ ദൈത്യം യതിരൂപധാരീ പ്രത്യുദ്ഗതോ മന്ത്രജപാതിസക്തം .
സ്മിതാർദ്രമൂചേ കുശലീ സബന്ധുമിത്രോ ഭവാൻ കിം ജഗദേകവീര .. 31-6..

ദൈത്യസ്യ തേ മന്ത്രജപേന കിം യോ നൂനം ബലിഷ്ഠം ത്വബലം കരോതി .
യേനൈവ ദേവാ അബലാ രണേഷു ത്വയാ ജിതാസ്ത്വം സ്വഹിതം കുരുഷ്വ .. 31-7..

സംന്യാസിനോ മന്ത്രജപേന രാഗദ്വേഷാദി ജേതും സതതം യതന്തേ .
ന ത്വം യതിർനാപി മുമുക്ഷുരർഥകാമാതിസക്തസ്യ ജപേന കിം തേ .. 31-8..

ഏകം ഹി മന്ത്രം സമുപാസ്വഹേ ദ്വൗ തേനാസി മിത്രം മമ തദ്വദാമി .
മന്ത്രശ്ച മേ മുക്തിദ ഏവ തുഭ്യം വൃദ്ധിം ന ദദ്യാദയമിത്യവേഹി .. 31-9..

ബൃഹസ്പതാവേവമുദീര്യ യാതേ സത്യം തദുക്തം ദിതിജോ വിചിന്ത്യ .
ക്രമാജ്ജഹൗ മന്ത്രജപം സദാ ഹി മൂഢഃ പരപ്രോക്തവിനേയബുദ്ധിഃ .. 31-10..

ഏവം ഗുരൗ കുർവതി ദൈത്യഭീതൈഃ കൃത്വാ തപോയോഗജപാധ്വരാദി .
ജാംബൂനദേശ്വര്യമരൈഃ സ്തുതാ ത്വം പ്രസാദിതാ പ്രാദുരഭൂഃ കൃപാർദ്രാ .. 31-11..

ത്വദ്ദേഹജാതൈർഭ്രമരൈരനന്തൈർദൈത്യഃ സസൈന്യോ വിഫലാസ്ത്രശസ്ത്രഃ .
ദഷ്ടോ ഹതസ്ത്വം ച നുതിപ്രസന്നാ പശ്യത്സു ദേവേഷു തിരോഹിതാഽഭൂഃ .. 31-12..

സ്വദേഹതോ വൈ ഭ്രമരാൻ വിധാത്രീ ത്വം ഭ്രാമരീതി പ്രഥിതാ ജഗത്സു .
അഹോ വിചിത്രാസ്തവ ദേവി ലീലാഃ നമോ നമസ്തേ ഭുവനേശി മാതഃ .. 31-13..