27 സപ്തവിംശദശകഃ - ശതാക്ഷ്യവതാരഃ

https://www.youtube.com/watch?v=gMhPk4tmE_M​ ​ 

ppt

PPT SLIDES

https://onedrive.live.com/edit.aspx?resid=9854A1791CB05F1C!1050&ithint=file%2cpptx&ct=1693710021241&wdOrigin=OFFICECOM-WEB.MAIN.EDGEWORTH&wdPreviousSessionSrc=HarmonyWeb&wdPreviousSession=a7e616b5-a679-4b18-91d3-cd844004783f&wdo=2

27 സപ്തവിംശദശകഃ -    ശതാക്ഷ്യവതാരഃ
ദൈത്യഃ പുരാ കശ്ചന ദുർഗമാഖ്യഃ പ്രസാദിതാത്പദ്മഭവാത്തപോഭിഃ .
അവൈദികം വൈദികമപ്യഗൃഹ്ണാന്മന്ത്രം സമസ്തം ദിവിഷജ്ജയൈഷീ .. 27-1..

വേദേ ഗൃഹീതേ ദിതിജേന വിപ്രാഃ ശ്രുതിസ്ഥിരാ വിസ്മൃതവേദമന്ത്രാഃ .
സാന്ധ്യാനി കർമാണ്യപി നൈവ ചക്രുഃ ക്ഷിതിസ്ത്വവേദാധ്യയനാ ബഭൂവ .. 27-2..

ഹൃതേഷു മന്ത്രേഷ്വഖിലേഷു പൂജായജ്ഞാദി ഭൂമൗ ന കൃതം മനുഷ്യൈഃ .
സുരാ അശക്താസ്തദലാഭഖിന്നാ ദൈത്യേന യുദ്ധേ ബലിനാ ജിതാശ്ച .. 27-3..

ത്യക്ത്വാ ദിവം തേ ഗിരിഗഹ്വരേഷു നിലീയ വർഷാണി ബഹൂനി നിന്യുഃ .
വൃഷ്ടേരഭാവാദ്ധരണീ ച ശുഷ്കജലാശയാ തർഷനിപീഡിതാഽഭൂത് .. 27-4..

സർവേ തൃഷാർതാശ്ച ഹിമാദ്രിമേത്യ ത്വാം ധ്യാനപൂജാനുതിഭിർഭജന്തഃ .
പ്രസാദയാമാസുരനേകകോടിബ്രഹ്മാണ്ഡകർത്രീമഖിലാർതിഹന്ത്രീം .. 27-5..

ദൃഷ്ടാ ദയാർദ്രാക്ഷിശതാ ത്വമേഭിഃ കൃപാശ്രുവർഷൈർനവരാത്രമുർവ്യാം .
ജലാശയാൻപൂർണജലാംശ്ചകർഥ ജനാഃ ശതാക്ഷീത്യഭിധാം ദദുസ്തേ .. 27-6..

ക്ഷുത്പീഡിതാനാം ച ചരാചരാണാം സർവത്ര നാനാവിധമന്നമിഷ്ടം .
സ്വാദൂനി മൂലാനി ഫലാനി ചാദാഃ ശാകംഭരീതി പ്രഥിതാ തതോഽഭൂഃ .. 27-7..

ദൈത്യസ്തു വിജ്ഞായ സമസ്തമസ്ത്രശസ്ത്രൈഃ സസൈന്യഃ പ്രഹരൻ വപുസ്തേ .
രണാംഗണേ സായകവിദ്ധഗാത്രഃ സശബ്ദമുർവ്യാം തരുവത്പപാത .. 27-8..

സ ചാസുരാത്മാ ഖലു വേദമന്ത്രാൻ ചിരം പഠംസ്ത്വാമഭിവീക്ഷമാണഃ .
ഗതായുരാവിശ്യ പരാത്മനി ത്വയ്യവാപ മുക്തിം മിഷതാം സുരാണാം .. 27-9..

വേദാൻഹൃതാനബ്ജഭവാനനേ ത്വം പുനശ്ച നിക്ഷിപ്യ ജഗത്സുരക്ഷാം .
കൃത്വാ നുതാ ദേവഗണൈർനരൈശ്ച തുഷ്ടാ തിരോഽഭൂഃ കരുണാർദ്രനേത്രാ .. 27-10..

ഭക്തസ്യ വൈ ദുർഗതിനാശിനീ ത്വം സുഖപ്രദാ ദുർഗമഹന്ത്രി മാതഃ .
ദുർഗേതി നാമ്നാ വിദിതാ ച ലോകേ വിചിത്രരൂപാസ്തവ ദേവി ലീലാഃ .. 27-11..

കോഽപ്യസ്തി ചിത്തേ മമ ദുർഗമോഽയം ജ്ഞാതസ്ത്വയാ നൈവ മയാ തു ദേവി .
യഃ സന്തതം ദ്രുഹ്യതി മേ തമാശു സംഹൃത്യ മാം രക്ഷ നമോ നമസ്തേ .. 27-12..