devi narayaneeyam १ प्रथमदशकः - देवीमहिमा

१ प्रथमदशकः  -    देवीमहिमा
यस्मिन्निदं यत इदं यदिदं यदस्मात्
     उत्तीर्णरूपमभिपश्यति यत्समस्तम् ।
नो दृश्यते च वचसां मनसश्च दूरे
     यद्भाति चादिमहसे प्रणमामि तस्मै ॥ १-१॥

न स्त्री पुमान् न सुरदैत्यनरादयो न
     क्लीबं न भूतमपि कर्मगुणादयश्च ।
भूमंस्त्वमेव सदनाद्यविकार्यनन्तं
     सर्वं त्वया जगदिदं विततं विभाति ॥ १-२॥

रूपं न तेऽपि बहुरूपभृदात्तशक्ति-
     र्नाट्यं तनोषि नटवत्खलु विश्वरङ्गे ।
वर्षाणि ते सरसनाट्यकलाविलीना
     भक्ता अहो सहृदया क्षणवन्नयन्ति ॥ १-३॥

रूपानुसारि खलु नाम ततो बुधैस्त्वं
     देवीति देव इति चासि निगद्यमाना ।
देव्यां त्वयीर्यस उमा कमलाऽथ वाग् वा
     देवे तु षण्मुख उमापतिरच्युतो वा ॥ १-४॥

त्वं ब्रह्म शक्तिरपि धातृरमेशरुद्रैः
     ब्रह्माण्डसर्गपरिपालनसंहृतीश्च ।
राज्ञीव कारयसि सुभ्रु निजाज्ञयैव
     भक्तेष्वनन्यशरणेषु कृपावती च ॥ १-५॥

माता करोति तनयस्य कृते शुभानि
     कर्माणि तस्य पतने भृशमेति दुःखम् ।
वृद्धौ सुखं च तव कर्म न नापि दुःखं
     त्वं ह्येव कर्मफलदा जगतां विधात्री ॥ १-६॥

सर्वत्र वर्षसि दयामत एव वृष्ट्या
     सिक्तः सुबीज इव वृद्धिमुपैति भक्तः ।
दुर्बीजवद्व्रजति नाशमभक्त एव
     त्वं निर्घृणा न विषमा न च लोकमातः ॥ १-७॥

सर्वोपरीश्वरि विभाति सुधासमुद्र-
     स्तन्मध्यतः परिवृते विविधैः सुदुर्गैः ।
छत्रायिते त्रिजगतां भवती मणिद्वी-
     पाख्ये शिवे निजपदे हसिताननाऽऽस्ते ॥ १-८॥

यस्ते पुमानभिदधाति महत्त्वमुच्चै-
     र्यो नाम गायति शृणोति च ते विलज्जः ।
यश्चातनोति भृशमात्मनिवेदनं ते
     स स्वान्यघानि विधुनोति यथा तमोऽर्कः ॥ १-९॥

त्वां निर्गुणां च सगुणां च पुमान् विरक्तो
     जानाति किञ्चिदपि नो विषयेषु सक्तः ।
ज्ञेया भव त्वमिह मे भवतापहन्त्रीं
     भक्तिं ददस्व वरदे परिपाहि मां त्वम् ॥ १-१०॥

CLICK BELOW FOR RECITATION LESSONS

DEVINARAYANEEYAM LESSON DASAKAM1:1

DASAKAM1:2

DASAKAM1:3

DASAKAM1:4/1

DASAKAM1:4/2

Devi narayaneeyam lesson dasakam 1:5/1

Devi narayaneeyam lesson dasakam 1:5/2